1. Samuel 22

Aundre komen no David opp siene Flucht

1Un David veleet doa un jinkj no de Heel Adullam. Aus siene Breeda un de aundre en siene Famielje daut enworden, jinjen see doahan no am. #Psa 57,1; Jos 15,35 2Un Menschen, dee vejoacht wieren, ooda en Schult jeroden wieren, ooda sest nich tofräd wieren, saumelden sikj met am. Un hee wia äa Leida. Doa wieren bie 400 Mana, waut bie am bleewen. #Rech 11,3 3Un David jinkj von doa no Mizpe en Moab. Un hee säd to dän Kjennich en Moab: Lot bitscheen mienen Voda un miene Mutta hia bliewen, bat ekj weet waut de Har fa mie doonen woat. #2Sam 8,2; Rut 1,1 4Un hee leet an met däm Kjennich en Moab. Dee bleewen doa soo lang aus David en de Heel bleef. 5Dan kjeem de Profeet, Gad, un säd to David: Bliew nich lenja en dise Heel, oba go en daut Launt Juda. Un David veleet un jinkj en dän Heret Woolt nenn. #Psa 63,1

6Dan hieed Saul, daut see David un siene Mana jefungen hauden. Saul wia don en Gibea, un saut unja dän Tamariskenboom, dee doa opp däm Boajch es. Hee haud sien Spies en siene Haunt, un siene aunjestalde stunden aula rom am. 7Un Saul säd to de Mana rom am: Horcht emol, jie Mana von Benjamin. Woat Isai sien Sän junt aula Flekja un Wiengoades jäwen? Un woa jie aula Leida woaren äwa 1.000 ooda äwa 100, 8ooda wuarom sent jie aula soo hinjarigjsch to mie? Kjeena sajcht mie, wan mien Sän met Isai sien Sän een Vespräakjen moakt. Kjeena unjastett mie, ooda lat mie weeten, daut mien Sän mienen Deena, David, oppjereizt haft jäajen mie, un nu jrod wua no mie luat. #(9 un 10) Psa 52,2; 1Sam 21,1-10 9Dan säd Doeg, de Edomita, dee bie Saul stunt: Ekj sach Isai sienen Sän en Nob, un daut hee no Ahimelech, Ahitub sien Sän, jinkj. 10Un Ahimelech fruach däm Harn no Rot fa am, un hee jeef am to äten un uk daut Schwieet von Goliat, dän Filista. 11Un Saul leet däm Priesta Ahimelech un aul sien Frintschoft dee uk Priesta en Nob wieren, komen. Un aus dee ver am wieren, 12säd Saul to Ahimelech: Horch emol häa, Ahitub sien Sän! Un Ahimelech säd: Ekj sie hia fa die, mien Kjennich. 13Un Saul fruach am: Wuarom hast du hinjarigjsch met däm Isai sien Sän jäajen mie jeplont? Wuarom hast du am Broot un een Schwieet jejäft un fa am von Gott om Rot jefroacht, soo daut hee jäajen mie es, un uk krakjt vondoag no mie luat. 14Un Ahimelech säd toom Kjennich: Es doa sest wäa von diene aunjestalde däm soo to truen es aus David, dien ieejna Schwieesän, de väaschta von diene Wajchta, un aunjeseenen mank diene Deena? #1Sam 18,22.27 15Meest du, daut dit daut ieeschtemol es daut ekj vom Harn fa am jefroacht hab? Daut es daut nich. Un von hinjarigjsch jäajen die plonen, doa weet ekj nuscht von, un uk kjeena von miene Famielje. 16Un de Kjennich säd: Du Ahimelech, un dien Voda siene gaunze Famielje woaren fa dit stoawen. 17Un de Kjennich säd to siene perseenelje Wajchta: Schlot däm Harn siene Priesta doot; dee haben David jeholpen. See wisten, daut David oppe Flucht wia un see säden mie daut nich. Oba däm Kjennich siene Deena deeden däm Harn siene Priesta nuscht aun. 18Dan säd de Kjennich to Doeg: Nemm du un schlo dee doot. Un Doeg, de Edomita, neem un schluach de Priesta doot. Dän Dach schluach hee 85 Mana doot, dee dän lienzeichnen Efod druagen. 19Un en Nob, de Priesta äare Staut, schauft hee Mana, Frues, Kjinja, un Schootkjinja auf, un uk Rinda, Äsels un Schop. #1Sam 21,2

20Bloos Abjatar, eent von Ahimelech siene Säns, dee uk Ahitub sien Grootsän wia, kjeem met sien Läwen doavon. Hee rand wajch un jinkj no David. #1Sam 23,6; Mrk 2,26 21Aus hee David säd, woo Saul aul däm Harn siene Priesta aufjeschauft haud, 22säd David to am: Aus ekj Doeg dän Dach doa sach, wist ekj daut hee secha Saul doavon sajen wudd. Ekj sie schuldich fa dän Doot von aul dien Frintschoft. #1Sam 22,9 23Bliew hia bie mie, un enjst die nich. Saul, dee mien Läwen nosteit, steit uk die no. Wan du bie mie blifst, woascht du secha sennen. #1Kjen 2,26-27

Currently Selected:

1. Samuel 22: PB

Highlight

Copy

Compare