1. Samuel 21

David bie däm Priesta Ahimelech un en Gat

1Un David stunt opp un veleet. Jonatan jinkj trigj no de Staut. 2Dan jinkj David no däm Priesta Ahimelech en Nob. Däm Priesta räajd daut opp, daut David doahan kjeem, un hee säd: Wuarom best du gaunz auleen jekomen. #1Sam 22,9.19 3Un David säd to Ahimelech: De Kjennich haft mie no waut jeschekjt, un hee säd ekj sull kjeenem irjent waut sajen waut miene Oppgow es. Un miene Mana hab ekj no eene besondre Städ jeschekjt. 4Oba waut hast du hia fa Väarot? Jeff mie fief Brood un waut du sest noch hast. 5Un de Priesta säd: Ekj hab hia kjeen jeweeneljet Broot, bloos daut jeweide Broot. Du kaust daut haben, wan diene junge Mana sikj von Frues wajchjehoolen haben. #2Mo 19,15; 3Mo 24,5-9 6Un David säd: Oba gaunz rein haben sikj miene Mana von Frues jehoolen. Daut doo wie emma, uk wan wie bie jeweenelje Oabeit sent. Aus ekj veleet wieren de Kjarpa von de Mana nich orrein. Wooväl sechra doch vondoag, daut wie dise Oppgow haben. 7Un de Priesta jeef am daut jeweide Broot, wiels doa kjeen aundret Broot wia, aus daut Broot von de Jäajenwuat. See hauden daut von däm Desch jenomen, wiels see aul freschet doahan jesat hauden. #Mat 12,3-4

8Doa wia dän Dach bie däm Priesta een Maun, dee eent von Saul siene Deena wia. Hee wia doa om eene jesazliche Sach to moaken. Sien Nomen wia Doeg un hee wia een Edomita, de väaschta von Saul siene Hoads. #2Mo 21,13; 3Mo 13,4.31; 1Sam 22,9.18 9Un David säd to Ahimelech: Hast du hia een Spies ooda Schwieet, waut ekj brucken kaun? De Kjennich schekjt mie soo haustich wajch, daut ekj nich emol Tiet haud mien Schwieet ooda aundret Jewäa met to nämen. 10Un Ahimelech säd: Goliat, de Filista, dän du en daut Ieekjen Tol doot muakst, sien Schwieet es hia. Daut es en een Kodda enjerolt un licht doa hinja dän Efod. Wan du west dan nemm daut. Hia es kjeen aundret Jewäa. Un David säd: Doa es noanich een Schwieet soont aus daut. Jeff mie daut. #Rech 8,27; 1Sam 17,50-51

11Un David muak sikj oppem Wajch un veleet dän Dach von Saul. Hee jinkj no däm Kjennich Achisch, dee en Gat wia. #Psa 56,1 12Un Kjennich Achisch siene Deena säden to am: Es dis David nich de Kjennich en daut Launt? Es dit nich deeselwja fa wäm see daunzten un sungen: Saul haft siene dusende jeschloagen, un David siene tieendusende? #1Sam 18,7 13Dit beduad David sea, un hee wia Angst fa däm Kjennich Achisch. 14Hee stald sikj aundasch opp, un wan hee ver an wia, deed hee soo aus wan hee errsennich wia. Hee vekrauzt an daut Stautspuat, un leet sien Kjwiel velenjd sien Boat ranen. #Psa 34,1 15Dan säd Achisch to siene Mana: Kjikjt bloos. Dis Maun es errsennich. Wuarom hab jie am no mie jebrocht? 16Hab wie nich jenuach errsennje Menschen, daut disa uk noch mott ver mie komen? Mott hee en mien Hus nenn komen?

Currently Selected:

1. Samuel 21: PB

Highlight

Copy

Compare