1. Petrus 2
2
De läwendja Steen un daut heilje Volkj
1Dan lajcht nu aulet schlajchte auf. Siet nich hinjalestich. Heichelt nich un siet nich aufjenstich, un habt kjeen Jepluda. #Jak 1,21 2Soo aus niejebuarne Kjinja no reine Malkj schrieen, sell jie een velangen no jeistliche Noarunk haben, daut jie doaderch waussen un toonämen, #Mat 18,3; Heb 5,12-13 3wan jie jeschmakjt haben, daut de Har goot es. #Psa 34,9 4Dan komt no am, dän läwendjen Steen, dee von de Menschen veschmäten wort, dee oba von Gott jewält un wieetvoll es. #Psa 118,22; Mat 21,42 5Un lot von junt, soo aus von läwendje Steena, een jeistlichen Tempel jebut woaren, daut jie een heiljet Priestatum woaren, derch Jesus Christus jeistliche Opfa to brinjen, aun dee Gott een Jefaulen haft. #Reema 12,1; Efs 2,21-22; Heb 3,6 6Wiels daut steit jeschräwen:
“Kjikjt emol, ekj laj en Zion een utjewälden un sea wieetvollen, harlichen Akjsteen,
un wäa aun dän jleewen woat, woat nich toschaund woaren.” #Jes 28,16
7Fa junt, dee jie jleewen, es dee sea wieetvoll; oba fa dee, dee nich jleewen, es “jrod dee Steen dän de Bulied veschmeeten, de wichtichsta Akjsteen jeworden; 8een Steen äwa dän Menschen faulen woaren”; een Steen dee an woat tofaul brinjen wuatoo see bestemt sent, wiels see daut Wuat nich jleewen. #Psa 118,22; Jes 8,14; Luk 2,34; Reema 9,33 9Oba jie sent een utjewäldet Volkj, dän Kjennich sien Priestatum to sennen, een heiljet Volkj, Gott sien ieejnet Volkj, daut jie aundre sajen sellen woo wundavoll dee es, dee junt utem diestren rut jerat, un en sien wundaboaret Licht jestalt haft. #2Mo 19,6; 5Mo 4,20; 7,6; Jes 43,21; Efs 5,8; Opb 1,6 10Jie talden emol äwahaupt “nich aus een Volkj”. Nu oba sent jie “Gott sien Volkj”. Jie stunden to eene Tiet nich unja de Jnod, nu oba hab jie Jnod jefungen. #Hos 2,25; Reema 9,24-26
Frie to doonen waut goot es
11Leefste Frind, jie sent hia framd, un reisen hia bloos derch, wiels jun werkjeljet Tus em Himmel es. Doawäajen bedd ekj junt, hoolt junt frie von de beese Lost en dise Welt, dee es nich fa junt, dee well june Seelen en de Grunt brinjen. #Psa 39,13 12Siet väasechtich, daut jie junt mank june onbekjieede Nobasch jescheit benämen, soo daut, wan see junt opp Vedocht haben, un junt aus ojjerajcht stamplen, see doch Gott woaren lowen motten fa june goode Woakjen, wan Jesus Christus komen woat. #Mat 5,16
13Om Gott sient Wellen hoolt june Rejierunk äare Jesazen, auf daut de Kjeisa selfst es, #Reema 13,1-7; Tit 3,1 14ooda dee, dee hee jeschekjt haft, dee to strofen, dee doa orrajcht doonen, un dee to lowen dee daut rajchte doonen. 15Wiels Gott well, daut jie derch goodet doonen de Schosel daut Mul toostoppen sellen, dee doa jäajenaun sent un nich bäta weeten. #Tit 2,8; 1Pet 3,16 16Jie sent frie vom Jesaz, oba daut meent nich, daut jie june Frieheit brucken kjennen schlajchtet to doonen. Jie sellen june Frieheit brucken Gott to deenen. #Gal 5,13; 2Pet 2,19 17Jäft aule Menschen Respakjt, siet de Breeda goot, fercht Gott un ieet dän Kjennich! #Spr 24,21; Reema 12,10
Christus aus Biespel
18Jie Kjnajchts, ieet june Haren un siet an unjadon, un nich mau de frintelje un leeftolje, oba uk de veschrowne un vedrisselje. #Efs 6,5; Tit 2,9 19Wiels daut es werkjlich Jnod, wan jie doawäajen lieden motten, daut jie een reinet Jewessen ver Gott hoolen wellen. 20Waut halpt junt daut wan jie jeduldich lieden, wan jie Strof vedeent haben? Oba, wan jie rajcht un goot doonen, un doafäa jestroft woaren, un dan jeduldich lieden, dan haft Gott siene Freid aun junt. #Mat 5,10; 1Pet 3,14 21Dit es wuatoo Gott junt beroopen haft, wiels Christus uk fa junt jeläden haft un junt doarenn een Väabilt jeloten, daut jie en siene Footspoaren gonen sellen. #(21-24) 1Pet 3,18; Mat 16,24 22Jesus haud kjeene Sind jedonen, äwa siene Leppen sent kjeene Läajes jekomen; #Jes 53,9; Joh 8,46 23hee schull niemols trigj wan see am schullen, hee dreiwd nich Rach to eewen wan hee lieden must, hee jeef Gott daut aun Haunt, dee doa rajcht rechten woat. 24Jesus selfst neem onse Sinden opp sien ieejen Kjarpa met opp däm Kjriez nopp, daut wie fa de Sind doot sent un fa de Jerajchtichkjeit Läwen kjennen; wiels derch siene Wunden sent wie jeheelt worden. #Reema 6,8.11; Gal 3,13; 1Joh 3,5 25Wiels jie erden aus vebiestade Schop, oba jie haben junt nu oppjemoakt to dän Hoad, dee äwa june Seelen woakt. #Jes 53,6; Joh 10,11
Currently Selected:
1. Petrus 2: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
