1. Petrus 3

Aunwiesungen fa Ehelied

1Jrod soo uk jie Frues, siet june Mana unjadon, daut soone dee noch nich no Gott sien Wuat horchen wellen, onen väl to sajen, kjennen jewonnen woaren, #1Kor 7,16; Efs 5,22 2wan see äare Frues äaren reinen, aunstendjen Waundel seenen. 3Lot jun Schmuck nich doarenn sennen, daut jie junt straum auntrakjen un de Hoa flajchten un Golt aunhenjen. #Jes 3,18-23; 1Tim 2,9 4Lot jun Schmuck leewa een stella, leeftolja Jeist em Hoat sennen! Doaraun haft Gott een grooten Jefaulen. 5Daut es wuamet sikj de heilje Frues frieejoa utstraumden, dee äare Hopninj opp Gott saden, un wieren äare Mana unjadon. 6Sara jehorcht äaren Abraham un nand am Har. Un wan jie daut uk soo doonen, dan sent jie äare Dajchta jeworden, un doonen waut rajcht es. Dan hab jie kjeene Uasoak junt to ferchten. #1Mo 18,12

7Un jrod soo jie Maunslied, got veninftich om met june Frues, daut june Jebäda nich vehindat woaren, un denkjt doaraun daut see schwaka sent, un daut see jrod soo goot Aundeel aun de Jnod un daut eewje Läwen haben. #1Kor 7,5; Efs 5,25

Daut lieden fa waut rajcht es

8Jie motten junt to goodalatst em Jeist eenich sennen, metlieden haben, breedalich goot sennen un von Hoaten deemootich sennen. 9Tolt orrajcht nich met orrajcht trigj. Schelt nich trigj wan jie jeschullen woaren. Säajent leewa, wiels daut es wuatoo jie beroopen sent, daut jie kjennen jesäajent woaren. #1Tess 5,15

10Wiels “wäa doa läwen un goode Doag seenen well,

mott äwa siene Tung harschen, daut dee nich schlajchtet rät,

un doano seenen, daut nuscht faulschet äwa siene Leppen kjemt. #Jak 1,26

11Dee mott vom schlajchten wajch bliewen un goodet doonen.

Hee saul Fräd sieekjen, un dän seenen to hoolen.

12Wiels Gott haft siene Uagen op äwa de jerajchte,

un siene Uaren hieren äare Jebäda.

Gott haft sikj oba jäajen dee jesat, dee doa schlajchtet doonen”. #Psa 34,13-17

13Wäa kaun junt schoden aundoonen, wan jie iewrich sent to doonen, waut rajcht es? 14Un wan jie uk om Jerajchtichkjeits haulwen wudden lieden motten, jie sent jesäajent. Fercht junt nich fa äa dreiwen un lot junt nich enenjsten, #Mat 5,10; 1Pet 2,20 15oba heilicht Gott däm Harn en junem Hoat. Siet emma met eene Auntwuat reed fa dee, dee een Grunt fodren fa dee Hopninj, dee jie haben, bloos doot daut leeftolich un respakjtvoll. 16Hoolt jun Jewessen rein; dan motten dee sikj schlieslich schämen, dee doawäajen äwa junt schlajchtet räden, daut jie Christen sent. 17Wiels daut es bäta, wan jie doawäajen lieden motten, wan jie goodet jedonen haben, wan Gott daut soo wull, aus wan jie lieden motten, wiels jie schlajchtet doonen.

18Wiels Christus storf #3,18 Eenje oole Schreften sajen leet. uk eemol fa aul ons Sinda, dee Jerajchta fa de ojjerajchte, daut hee ons met Gott toopbrinjen kunn. Sien Kjarpa wort dootjemoakt, oba sien Jeist läwd wieda. #1Pet 2,21-24 19Un en dän Jeist jinkj hee uk un prädijd de Jeista em Jefenkjnis, #1Pet 4,6 20dee dan nich horchen wullen, aus Gott noch met an Jedult haud, aus Noah daut Schepp bud. Doa wieren oba mau een poa, daut es acht Menschen, dee derch daut Wota jerat worden. #1Mo 7,7; 2Pet 2,5 21Doaraun wia to seenen, waut Deepen fa ons bedieden saul. Daut es nich, daut ons doaderch de Drakj vom Kjarpa jewoschen woat, oba daut wie Gott no een goodet Jewessen froagen, wiels Jesus Christus vom Doot oppjestonen #Efs 5,26; Heb 10,22 22un em Himmel nenn jefoaren es, un sienen Plauz bie Gott to rajchte Haunt jenomen haft, un Enjel, Autoritäten un Jewaulten am unjadon sent. #Efs 1,20-21

Currently Selected:

1. Petrus 3: PB

Highlight

Copy

Compare