1. Kjennichs 11

Salomo woat von Gott aufjelenkjt un aundre Probleemen

1Oba Salomo jleicht väl Frues von aundre Velkja. Buta de Dochta vom ägiptischen Kjennich, dee hee sikj fried, fried hee sikj uk Frues von de Moabita, Amonita, Edomita, Sidonia un Hetita. #5Mo 17,17 2Hee neem dee aus siene Frues wan de Har doch de Israeliten jesajcht haud, daut see sikj nich met dee befrieen sullen, un dee sikj nich met an, wiels dee wudden an veleiden, daut see äare Jetta aunbäden wudden. Oba Salomo kunn sikj nich von dee wajchhoolen un jleicht dee. #2Mo 34,16 3Salomo haud 700 Frues un 300 Näbenfrues, un dise lenkjten sien Hoat wajch von Gott. 4Bat Salomo oolt wort hauden siene Frues am doatoo jekjräajen, daut hee äare Jetta aunbäden deed. Salomo wia en sien Hoat nich gaunz tru to däm Harn sien Gott, soo aus sien Voda David jewast wia. 5Hee deend Astarte, een Aufgott fa de Sidonia, un uk Milkom, dän oppscheiseljen Aufgott von de Amonita. 6Salomo deed waut däm Harn schlajcht jefoll. Hee deend däm Harn nich vollens, soo aus sien Voda David jedonen haud.

7Salomo bud eene huage Opfastäd toom Kemosch, dän oppscheiseljen Moabita Aufgott auntobäden, un aun de oostne Kaunt von Jerusalem bud hee eene huage Opfastäd toom Moloch de Amonita äaren Aufgott auntobäden. #4Mo 21,29; 2Kjen 23,13 8Soo deed hee fa aul siene Frues von aundre Velkja, dee Weiruak brenden un Opfa brochten fa äare Jetta. 9Un de Har wort sea veläajen met Salomo, daut hee em Hoat wajch dreid von däm Harn, Israel äaren Gott, dee sikj doch tweemol Salomo jewäsen haud. #1Kjen 3,5; 9,2 10Salomo wia nich jehuarsom to daut waut de Har am säd, daut hee nich no framde Jetta gonen sull, 11un doawäajen säd de Har to Salomo: Wäajen du dän Bunt un de Jebooten nich jehoolen hast, dee ekj die säd, woa ekj daut Kjennichrikj von die wajchrieten, un woa eenem von diene Beaumte daut jäwen. #1Sam 15,28 12Oba om dienen Voda David sient haulwen, woa ekj daut nich en diene Tiet doonen, oba ekj woa daut en dienen Sän siene Tiet doonen. #1Kjen 12,19 13Doch om dienen Voda David sient haulwen, un wäajen Jerusalem, de Staut dee ekj mie jewält hab, woa ekj nich daut gaunze Rikj von am wajchrieten, ekj woa am eenen Staum loten.

14Dan leet de Har daut too, daut Hadad, eena von de Kjennichs Famielje en Edom, sikj jäajen Salomo oppstald. 15Eemol aus David en Edom jewast wia, haud Joab de Kommandaunt von de Armee aule Mana en Edom omjebrocht aus hee doahan jinkj siene Doodes to begrowen. #2Sam 8,14 16Joab un siene Armee wieren don sas Moonat en Edom jebläwen bat see aul de Mana doa hauden omjebrocht. 17Doch wieren eenje von Hadad sien Voda siene Beaumte don met Hadad wajchjerant no Ägipten. Hadad wia don noch een junga Jung. 18Dee wieren von Midian no Paran jegonen, wua noch aundre Mana met an met jinjen, un wieren don no Ägipten jereist. En Ägipten haud de Kjennich an een Hus jejäft, un haud am met Äten vesorcht un uk een Stekj Launt. 19De ägiptischa Kjennich jleicht Hadad un jeef am de Sesta von de Kjennijin Tachpenes, daut see siene Fru wort. 20Dise Sesta aun Tachpenes un Hadad hauden eenen Sän, Genubat, un Tachpenes trock disen Jung opp en däm ägiptischen Kjennich sien Hus. Genubat woss met däm Kjennich siene Kjinja toop opp. 21Aus Hadad dan en Ägipten hieed daut David jestorwen wia, un daut Joab de Kommandaunt von de Armee doot wia, säd hee to däm Kjennich: Lot mie trigj no mien Launt trakjen. 22Un de Kjennich säd: Es doa irjent waut, waut die hia fält, wuawäajen du nu trigj no dien Launt gonen west? Un hee säd: Nä, oba lot mie bloos gonen.

23Un Gott leet daut uk too daut Reson, Eljada sien Sän, sikj jäajen Salomo oppstald. Dee wia emol von sienen Wieet Hadad Eser, dän Kjennich en Zoba, wajchjerant, #2Sam 8,3 24aus David Hadad Eser un de Aramäa bekjamft haud. Reson haud waut Soldoten om sikj jesaumelt, un wia met dee no Damaskus jegonen, wua see don de Jäajent rejieeden. #2Sam 10,18 25Aus Kjennich von Aram, wia Reson een Stachel en Israel äare Sied en dee Tiet aus Salomo Kjennich wia. Hee kunn Israel nich lieden, un beplindad israelitische Städa, soo aus Hadad uk deed.

26Noch eena dee sikj jäajen Salomo stald wia Jerobeam, eent von Salomo aunjestalde Mana. Jerobeam wia Nebat sien Sän, een Efraimita von Zereda. Siene Mutta wia Zerua, eene Wätfru. 27Dit es woo sikj daut romneem, daut hee jäajen Kjennich Salomo wia. Aus Salomo dän Millo oppbud un de Mia rom de Davidstaut toomuak, #1Kjen 9,15.24 28bewees sikj Jerobeam sea fäich. Aus Salomo sach woo jeschekjt hee doa oabeid, stald hee am äwa de Oabeida, waut jedwungen wieren veschiednet fa dän Kjennich en Manasse un Efraim to buen.

29Een Dach aus Jerobeam opp däm Wajch ut Jerusalem rut wia, troff am de Profeet Ahija von Silo. De Profeet haud eenen nieen Rock aun, un aus see sikj troffen wieren see auleen opp de opne Stap. 30Un Ahija neem doa dän nieen Rock, dän hee aun haud, un reet dän en twalw Stekja, 31un hee säd to Jerobeam: Nemm tieen Stekja fa die. De Har, Israel äa Gott, sajcht soo: Horch emol häa. Ekj woa Salomo daut Kjennichrikj ut siene Macht rieten, un ekj woa die tieen Stam jäwen. #1Kjen 12,15; 14,2 32Salomo woat eenen Staum hoolen om mienen Deena David sient haulwen un wäajen Jerusalem. Daut es doch de Staut, dee ekj von mank aul de Stam en Israel jewält hab. #Psa 132,13 33Dit es wiels hee mie veschmäten haft un framde Jetta aunjebät haft. Hee haft Astarte, de Sidonia äare Mutta Aufgott, Kemosch, de Moabita äa Aufgott, un Milkom, de Amonita äa Aufgott aunjebät, un haft nich mienen Wajch biebehoolen. Hee haft nich jedonen, waut ekj von am velangd, un haft nich miene Jebooten un Väaschreften jehoolen, soo aus sien Voda David deed. 34Doch woa ekj am nich daut gaunze Kjennichrikj wajchnämen. Un ekj woa am sien gaunzet Läwen rejieren loten, om David, mien Deena sient haulwen, däm ekj jewält haud, un dee miene Jesazen un Väaschreften hilt. #2Sam 7,12 35Ekj woa daut Kjennichrikj ut sienen Sän siene Macht nämen, un ekj woa die tieen Stam jäwen. #1Kjen 12,16-17 36Oba sienen Sän woa ekj eenen Staum jäwen, soo daut mien Deena David emma woat Nokomen en Jerusalem fa mie haben, de Staut dee ekj jewält hab, daut de Menschen mie doa aunbäden sellen. #1Kjen 15,4; 2Kjen 8,19 37Un ekj woa die, Jerobeam, nämen om Kjennich äwa Israel to sennen. Rejia krakjt doa wua du west. 38Wan du woascht jehuarsom sennen met aules waut ekj die saj, un woascht opp mienen Wajch gonen un doonen waut mie jefelt, doaderch daut du miene Jesazen un Jebooten hoolen woascht, soo aus mien Deena David deed, dan woa ekj met die sennen. Ekj woa diene Nokomen loten Kjennichs äwa Israel sennen, soo aus ekj aul fa David jedonen hab. #1Kjen 9,4 39Un ekj woa David siene Nokomen deemootjen met dit, oba nich opp emma.

40Salomo socht Jerobeam doot to moaken, oba Jerobeam veleet un jinkj no Ägipten, no däm Kjennich Schischak. Hee bleef doa bat Salomo storf. #1Kjen 14,25; 2Chr 9,29-31

41Waut nu sest noch von Salomo to sajen es, waut hee deed un woo weis hee wia, es en daut Buak von Salomo siene Jeschicht jeschräwen. #2Chr 9,29-31 42Salomo wia 40 Joa Kjennich en Jerusalem äwa gaunz Israel. 43Un Salomo storf un wort en de Davidstaut begroft. Salomo sien Sän Rehabeam wort Kjennich no am.

Currently Selected:

1. Kjennichs 11: PB

Highlight

Copy

Compare