1. Kjennichs 12

Daut Rikj woat oppjespoolt

(2Chr 10,1-15)

1Rehabeam jinkj no Sichem, wua de Menschen von aulawäajen en Israel wieren toopjekomen, om am toom Kjennich to moaken. 2Un aus Jerobeam, Nebat sien Sän, daut hieed, kjeem hee trigj von Ägipten. Hee wia doa wiels hee von Kjennich Salomo wajchrand. #1Kjen 11,40 3Un de tieen Stam kroagden Jerobeam un see jinjen aulatoop no Rehabeam un säden to am: 4Dien Voda läd een schwoaret Joch opp ons. Moak ons daut leichta aus daut Joch daut dien Voda opp ons läd; dan woa wie ons doatoo schekjen, daut du ons Kjennich best. 5Un hee säd to an: Jäft mie dree Doag un dan komt trigj no mie. Un daut Volkj jinkj wajch. 6Un Kjennich Rehabeam fruach de oole Mana, dee ver sienen Voda Salomo stunden, aus dee noch läwd: Waut schlo jie väa? Waut vonne Auntwuat saul ekj dit Volkj jäwen? 7Un dee säden to am: Wan du vondoag woascht een Deena fa daut Volkj sennen un an goot behaundlen, un wan du an woascht toojedonen sennen, wan du an de Auntwuat jefst, dan woaren see opp emma tru to die sennen. 8Oba hee horcht nich no dän Rot dän de oole Mana am jeewen, un räd noch met de junge Rotjäwa, met woone hee toop oppjewossen wia. 9Un hee säd to dee: Waut es june Meenunk? Waut saul ekj dit Volkj sajen, dee mie froagen auf ekj daut Joch nich woa leichta fa an moaken. 10Un de junge Rotjäwa, dee met am toop oppjewossen wieren, säden to am: Dit Volkj woont doa sajcht: “Dien Voda jeef ons een schwoaret Joch, moak ons daut nu leichta”, saust du sajen: Mien kjliena Finja es dikja aus dien Voda siene Lint. 11Mien Voda läd een schwoaret Joch opp junt, un ekj woa daut noch schwanda moaken. Mien Voda haft junt met eene Pitsch jewipt, oba ekj woa junt met Skorpionen trajchtwiesen. 12Dan aum dredden Dach kjeemen Jerobeam un daut gaunze Volkj no Rehabeam, soo aus hee an jesajcht haud: Komt om dree Doag trigj. 13Un de Kjennich räd an strenj aun. Enne Städ daut hee no däm Rot haundeld, dän hee von de oole Mana jehieet haud, #Spr 15,1 14recht hee sikj no daut, waut de junge Mana jesajcht hauden. Hee säd: “Mien Voda läd een schwoaret Joch opp junt, oba ekj woa noch mea von junt velangen. Mien Voda haft junt met de Pitsch jewipt, oba ekj woa junt met Skorpionen trajchtwiesen.” 15De Kjennich horcht nich no waut daut Volkj fruach. De Har haud daut soo romjebrocht, daut hee daut Wuat utfieed, woont hee derch Ahija dän Profeet von Silo to Jerobeam, Nebat sien Sän, jesajcht haud. #1Kjen 11,29-31

De nuadne Stam bliewen nich met David

(2Chr 10,16-19)

16Aus daut gaunze Volkj sach, daut de Kjennich nich no an horchen deed, säd daut Volkj to däm Kjennich: Hab wie irjent een Poat aun David? Hab wie waut to kjrieen von Isai sien Sän? Israeliten, well wie bloos no onse ieejne Städen gonen, un David sienen Nokomen loten fa sien ieejnet Hus oppkomen. Un soo jinjen de Israeliten no äare Städen. #2Sam 20,1 17Un Rehabeam wia de Kjennich äwa de Israeliten dee en Juda wonden. 18De Kjennich Rehabeam schekjt eemol Adoniram, dee äwa de Oabeida wia, waut jedwungen wieren veschiednet fa dän Kjennich to buen, daut hee von Juda no Israel jinkj, oba daut Volkj schmeet Steena no am, daut hee doavon storf. Un de Kjennich Rehabeam jinkj schwind opp sienen Woagen nopp, un spood sikj trigj no Jerusalem. 19Soo jinkj Israel jäajen David siene Nokomen, soo aus daut uk noch vondoag es.

20Un aus daut gaunze Israel daut hieed, daut Jerobeam trigj jekomen wia von Ägipten, roopten see am no een Toopkomen von daut gaunze Volkj un muaken am toom Kjennich äwa Israel. Aule Israeliten jinjen met am, bloos de Staum Juda hilt sikj aun David siene Nokomen. #2Chr 11,1-4

21Aus Rehabeam dan no Jerusalem kjeem, vesaumeld hee von en Juda un von däm Staum Benjamin, 180.000 fäje Mana om jäajen Israel to kjamfen un daut gaunze Israel noch wada unja Salomo sienen Sän Rehabeam to brinjen. 22Oba don kjrieech Schemaja, de Gottesmaun, een Wuat von Gott, un hee säd: 23Saj to Salomo sien Sän Rehabeam, dee nu Kjennich en Juda es, un uk to daut gaunze Juda un Benjamin, un uk to daut aundre Volkj: 24Dit es waut de Har sajcht: Jie sellen nich gonen un jäajen june Breeda de Israeliten kjamfen. Got aula no Hus; dit waut hia jeworden es, es von mie. Un see horchten no daut Wuat waut vom Harn kjeem, un see jinjen trigj, een jiedra no siene Städ, soo aus de Har an jesajcht haud.

25Jerobeam bud Sichem opp en de Boaj en Efraim un wond doa. Un hee jinkj uk un bud Pnuel opp. 26Un Jerobeam säd to sikj: Daut Kjennichrikj kunn goot wada no David siene Nokomen gonen, 27wiels wan de Lied no däm Harn sien Hus en Jerusalem gonen woaren om äare Opfa to brinjen, woaren see von mie vejäten, un see woaren Rehabeam däm Kjennich en Juda aus äaren Kjennich nämen. Dan kunnen see mie ombrinjen un aula trigj no Rehabeam, däm Kjennich en Juda, gonen. 28De Kjennich räd dit derch met sienen Rot, un don muak hee von Golt, twee Bollkjalwa un stald dee opp. Un hee säd to daut Volkj: Daut es too väl daut jie sullen no Jerusalem gonen. Kjikjt, jie Israeliten, hia sent june Jetta, dee junt ut Ägipten rutjebrocht haben. #2Mo 32,4.8 29Un hee stald eent en Betel opp, un daut aundre en Dan. #Rech 18,30 30Un an wort daut to eene Sind, wiels see jinjen no Betel un uk no Dan. #1Kjen 14,16

31Un hee muak uk huage Opfastäden opp de Boaj un sad doa Priesta en, dee nich Leviten wieren. 32Hee muak een Fast aum 15. Dach von de 8. Moonat, un hee brocht Opfa opp däm Aultoa aun dän Dach. De Dotem toom Opfa brinjen, wia krakjt soo aus en Juda. Hee muak en Betel Opfa fa de Kjalwa, dee hee jemoakt haud. Un hee stald doa uk de Priesta aun, bie de huage Opfastäden, dee hee jemoakt haud.

33Aum 15. Dach von de 8. Moonat, eenen Dach dän hee selfst enjesat haud, jinkj hee no Betel un muak doa een Fast fa daut Volkj Israel. Hee opfad doa opp däm Aultoa un brocht uk Ruakopfa.

Currently Selected:

1. Kjennichs 12: PB

Highlight

Copy

Compare