1. Kjennichs 10
10
Salomo sien Rikjtum woat bewundat
(2Chr 9,1-12)
1Dan aus de Kjennijin von Saba to hieren kjrieech, woo de Har Salomo jesäajent haud, kjeem see om am met schwoare Froagen auftoproowen. #1Kjen 5,14; Mat 12,42 2See kjeem no Jerusalem met sea väl Deena, un met Kameelen, opp dee see Kjriedarie un een Deel Golt un kostboare Steena jebrocht haud. See kjeem no Salomo un fruach am aules waut see sikj denkjen kunn. 3Un Salomo beauntwuad aul äare Froagen. Doa wia nuscht waut hee nich wist ooda beauntwuaten kunn. 4Un aus de Kjennijin von Saba sach, woo kluak Salomo wia, un uk daut Hus, woont hee jebut haud, 5daut Äten, daut hee opp dän Desch haud, de Beaumte, met woone hee eet, woo hee bedeent wort un waut äare Tracht wia, siene Enschenkja, de Brauntopfa dee hee en däm Harn sien Hus brocht, wia see jestuzt un sea vewundat. 6Un see säd to däm Kjennich Salomo: Waut ekj en mien Launt hieed von woo du daut hautst un waut du aules wist es soo. 7Oba ekj jleewd daut nich waut see mie säden, bat ekj daut selfst to seenen kjrieech. Un nu mott ekj sajen, mie wia nich emol de halft jesajcht. Du best noch weisa un läfst noch groosoatja aus mie jesajcht wort. 8Woo jlekjlich sent diene Menschen un diene Deena, dee emma ver die stonen un diene Weisheit hieren. 9Ekj preis däm Harn dienen Gott, dee soon Jefaulen aun die haft, daut hee die opp dän Troon von Israel jesat haft. Wäajen däm Harn siene eewje Leew fa Israel, haft hee die toom Kjennich jemoakt, daut du äwa de Jesazen un daut rajcht seenen saust. #1Kjen 5,21 10Un dan jeef see Salomo äwa 4 Tonn Golt un sea väl Kjriedarie un kostboare Steena. Salomo kjrieech nienich wada soo väl Kjriedarie opp eemol aus waut de Kjennijin von Saba am brocht.
11Hiram siene Schäp, dee von Ofir Golt jebrocht hauden, brochten uk noch sea väl Sandelholt un kostboare Steena. #1Kjen 9,27-28 12De Kjennich leet von daut Sandelholt Sproten moaken fa dän Tempel un uk fa sien Paulaust. Dan muaken see uk noch Zitta un Hoapen fa de Sinja. Soo väl Sandelholt es bat dän vondoagschen Dach nich wada opp eemol jeseenen ooda jebrocht worden.
13Un de Kjennich Salomo jeef de Kjennijin von Saba aules no waut see fruach un waut ar jankad, buta daut waut Salomo ar aul jejäft haud. Un dan muak see sikj reed un reisd trigj no äa Launt. #2Chr 9,13-28; 1,14-17
14De Kjennich Salomo kjrieech jieda Joa äwa 31 Tonn Golt, 15buta daut waut hee von de Jeschaftsmana un von Zoll von Jeschaftslied, un von de arabische Kjennichs un von de Leida en daut Launt kjrieech.
16De Kjennich Salomo muak 200 groote Schilten von jehomadet Golt. Jieda Schilt haud 7 Kilo Golt. #1Kjen 14,26 17Hee muak uk 300 kjlandre Schilten von jehomadet Golt. Jieda kjlienet Schilt haud eent un dreevieedel Kilo Golt. De Kjennich oppbewoad de Schilten en daut Hus woont see dän Libanon Woolt nanden. #1Kjen 7,2
18De Kjennich muak een groosoatjen Troon von Aulfenbeen un betrock dän met daut baste Golt. 19De Troon haud eene Hinjalän met een Kopp von een Boll von hinjen. De Län wia bowen runt. Doa wieren Oarmlänen aun jieda Sied, un biesied jieda Oarmlän wia een Leiw. Doa wieren sas Stoopen verem Troon, 20un twalw Leiws. Doa wia een Leiw opp jieda Stoop un aun jieda Sied vom Troon. Niemols haft noch een Kjennich soonen Troon jehaut. 21Aule Kuffels fa däm Kjennich wieren von Golt jemoakt. Un aul de aundre Dinja en daut Libanon Woolt Hus wieren von dennet Golt jemoakt. Kjeent wia von Selwa, wiels Selwa tald aus nuscht to Salomo siene Tiet. 22De Kjennich haud miere groote Tarsis Schäp opp daut Mäa, dee met Hiram siene Schäp fuaren. Dee kjeemen een mol en dree Joa no Hus un brochten Golt, Selwa, Aulfenbeen, Open un Peiheena.
23Soo kjeem daut, daut Salomo jrata wia aus aule aundre Kjennichs opp de Ieed en siene Pracht un Weisheit. 24Von aulawäajen opp de Ieed kjeemen Menschen om Salomo siene Weisheit to hieren, dee Gott am jejäft haud. 25Un dee waut doa kjeemen, brochten am emma jieda Joa Jeschenkja, woone von Golt un Selwa jemoakt wieren, Kjleeda, Jewäaren, Kjriedarie, Pieed un Mulasch.
26Salomo brocht Kjrichswoages toop un Mana toom de Pieed besorjen un aunhaunt haben. Hee haud 1.400 Kjrichswoages un 12.000 Ritta en de veschiedne Woagenstäda un en Jerusalem biem Kjennich. #1Kjen 5,6 27De Kjennich muak Selwa soo auljeweenlich aus Steena en Jerusalem, un Zeeda soo riew aus de wille Fiejenbeem opp de läaje Boaj em Wasten. 28Salomo leet Pieed von Musri un von Koe komen. De Haundelsmana koften dee fa eenen bestemden Pries en Koe. 29Hee koft Kjrichswoages von Ägipten fa 600 Selwastekja dän Woagen, un Pieed fa 150 Selwastekja daut Pieet. Dise vekoft hee uk wieda derch siene Haundelsmana no de Kjennichs von de Hetita, un de Kjennichs von Aram.
Currently Selected:
1. Kjennichs 10: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
