1. Kjennichs 9
9
Gott rät to Salomo
(2Chr 7,11-22)
1Dan aus Salomo foadich wia met däm Harn sien Hus buen un sien Kjennichshus un aules waut Salomo jankad to buen, 2kjeem de Har toom tweeden mol no Salomo, soo aus hee no am bie Gibeon jekomen wia. #1Kjen 3,5 3Un de Har säd to am: Ekj hab dien Jebäd un diene Froagen, dee du utjesproaken hast, jehieet. Un ekj hab daut Hus enjeweit, woont du jebut hast, un hab mienen Nomen doa opp aule Tieden han jedonen. Ekj woa emma doano oppaussen un doarom bedocht sennen. #1Kjen 8,29 4Un äwa die well ekj sajen, daut wan du opprechtich, bestendich un jehuarsom woascht sennen, soo aus dien Voda David wia, un du woascht doonen, waut ekj von die velangt hab, un woascht miene Jesazen un Jebooten hoolen, 5dan woa ekj die un diene Nokomen opp emma opp dän Troon äwa Israel ensaten, soo aus ekj dienen Voda David daut vespruak, aus ekj to am säd: Daut saul nich väakomen daut nich eena von diene Nokomen opp däm Troon von Israel es. #2Sam 7,12; Jer 33,17 6Oba wan du, ooda eena von diene Nokomen, de Jebooten un Jesazen, dee ekj junt jejäft hab, nich hoolen woaren, un woaren gonen aundre Jetta deenen un aunbäden, 7dan woa ekj junt aus Volkj von daut Launt vejoagen, woont ekj junt jejäft hab, un daut Hus, woont ekj fa mienen Nomen enjeweit hab, veloten un doa nich no kjikjen. Israel woat dan vespott woaren un een Nojeräd jäwen mank de Velkja. #(7 un 8) 5Mo 4,26; 8,19-20; Mat 23,38 8Dan woaren dee waut dit Hus seenen, daut nu soo straum es, sikj wundren, daut et soo schlajcht lat. See woaren sikj tieren un froagen, wuarom de Har soont aun dit Launt un dit Hus jedonen haft. 9Un dan woaren see sajen: Daut es wiels see däm Harn äaren Gott veloten haben, dee äare Vodasch ut Ägipten brocht. See haben aundre Jetta aunjenomen un dee aunjebät. Daut es wuarom de Har disen Schoden opp an jebrocht haft.
Salomo jeft Hiram Städa
(2Chr 8,1-2)
10Daut wieren 20 Joa en woone Salomo dän Harn sien Hus un däm Kjennich sien Hus bud. #1Kjen 6,38; 7,1 11De Kjennich Hiram von Tierus haud Salomo Zeeda un Taunenbeem un Golt vesorcht, soo väl aus hee fa de Oabeit wull. Dan jeef de Kjennich Salomo Hiram 20 Städa en Galiläa. #2Chr 8,2 12Oba aus Hiram von Tierus kjeem un de 20 Städa besach, dee Salomo am jejäft haud, jefollen am dee nich. 13Un hee säd: Mien Brooda, waut sent dit fa Städa dee du mie jejäft hast? Doaderch kjrieejen dee dän Nomen, Kabul, soo aus dee noch vondoag jenant woaren. 14Hiram haud Salomo bie 4 Tonn Golt jeschekjt.
Waut Salomo bud
(2Chr 8,3-18)
15Dit es de List von de Oabeit dee Salomo met de Oabeida deed, waut jedwungen wieren veschiednet fa dän Kjennich to buen: de Tempel, sien Paulaust, de Millo, de Mia rom Jerusalem un de Städa Hazor, Megiddo un Gesser. 16(De ägiptischa Kjennich haud emol Gesser en een Kjrich enjenomen un vebrent un de kanaanitische Enwona omjebrocht. Dan haud hee siene Dochta, dee Salomo siene Fru wia, dee jejäft aus see Brut wort. #Jos 16,10; 1Kjen 3,1 17Un Salomo bud Gesser wada opp.) Un hee bud uk daut läajre Bet Horon, 18Baalat un Tamar en de Wiltnis en Juda, 19aul siene Väarotstäda, de Städa fa de Kjrichswoages, un de Städa fa de Oabeida, dee de Pieed besorjden un aunhaunt hauden, un aul daut aundre waut Salomo en Jerusalem, Libanon un aul de aundre Jäajenden, dee hee rejieed, haben wull. #1Kjen 10,26 20Aul de Amorita, Hetita, Perisita, Hiwita un Jebusita, dee waut nich Israeliten wieren 21un doch noch en daut Launt wieren, wiels de Israeliten dee nich gaunz hauden kunt utroden, dee dwunk Salomo veschiednet em Launt fa dän Kjennich to buen, soo aus see noch bat vondoag doonen. #Jos 16,10 22Oba Salomo leet kjeene Israeliten de jedwungne Oabeit doonen om veschiednet fa dän Kjennich to buen. De Israeliten deenden aus Soldoten, Beaumte un Kommandaunten äwa Kjrichswoages un Ritta. 23Doa wieren 550 Beaumte, dee de Äwasecht hauden äwa de Oabeida dee aul daut fa Salomo buen musten.
24Un Salomo siene Fru, dee däm ägiptischen Kjennich siene Dochta wia, trock von de Davidstaut no daut Hus woont Salomo fa ar bud. Dan bud hee uk noch Millo.
25Salomo brocht dree mol em Joa Brauntopfa un Dankopfa opp dän Aultoa, dän hee fa däm Harn jebut haud. Hee brend uk Weiruak fa dän Harn. Soo wort de Tempelbu foadich.
26Salomo bud sikj uk Schäp bie Ezjon Geber. Daut wia nich wiet von Elat aum Schelpmäa en Edom. #(26-28) 4Mo 33,35; 2Chr 8,17-18 27Un Hiram schekjt von siene erfoarne Seemana, daut see met Salomo siene oabeiden deeden. #1Kjen 10,11 28See fuaren met de Schäp no Ofir un brochten Salomo äwa 13 Tonn Golt von doa. #1Mo 10,29
Currently Selected:
1. Kjennichs 9: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
