1. Chronik 26

De Endeelunk von de Puatenwajchta

1Uk de Puatenwajchta biem Tempel wieren en Aufdeelungen enjedeelt. Ut Korach siene Grupp kjeem Meschelemja, Kore sien Sän un Abiasaf sien Grootsän. #2Chr 8,14; 35,15 2Meschelemja siene Säns wieren dise: De ieeschtjebuarna Sän Secharja, de tweeda Jediael, de dredda Sebadja, de vieeda Jatniel, 3de fefta Elam, de sasta Johanan un de säwenda Eljoenai. 4Uk Obed Edom jehieed doatoo; un siene Säns wieren: De ieeschtjebuarna Sän Schemaja, de tweeda Josabad, de dredda Joach, de vieeda Sachar, de fefta Netanel, #2Sam 6,11 5de sasta Amiel, de säwenda Isachar un de achta Peuletai. Met soo väl Säns haud Gott am jesäajent. 6Un sienen Sän Schemaja worden uk Säns jebuaren, un daut worden leidende Mana en äare Volkjsgruppen, wiels see wieren aunjeseene Mana. 7Schemaja siene Säns wieren: Otni, Refael, Obed un Elsabad un siene Breeda, Elihu un Semachja, beides aunjeseene Mana. 8Aul dise Puatenwajchta wieren Nokomen von Obed Edom. See met äare Säns un Breeda toop, waut to däm Deenst goot jeieejent wieren, wieren aules toop 62 Mana. 9Von Meschelemja siene Säns un Breeda wieren 18 aunjeseene Mana. 10Hosa siene Säns, dee to Merari siene Nokomen jehieeden, wieren: De ieeschta Sän Schimri, wiels de ieeschtjebuarna Sän wia nich mea doa, doawäajen moak sien Voda am toom ieeschten Sän, 11un de tweeda wia Hilkija, de dredda Tebalja un de vieeda Secharja. De Säns un Breeda von Hosa wieren aules toop 13 Mana. 12Dise Aufdeelungen von de Puatenwajchta, foll no de Zol von de Mana de Oppgow too, soo aus äare Breeda, en däm Harn sien Hus to deenen.

13See losten ut, woone Famieljes de eenselne Puaten bewoaken sullen, un doabie wort de jinjsta krakjt soo behaundelt aus de elsta. 14Daut Loss fa de oostne Sied foll opp Meschelemja. Uk fa sienen Sän Secharja, dee een kluaka Rotjäwa wia, trocken see een Loss, un am foll daut em Nuaden too. 15Opp Obed Edom foll daut Loss em Sieden, un opp siene Säns daut vom Väarotshus. 16Daut Wastpuat un daut Schellechet Puat, wua de Gaus nopp jeit, follen Schuppim un Hosa too. De Wajchta worden soo oppjedeelt: 17Aun de oostne Sied sullen aule Dach sas Mana stonen, aun de nuadne Sied vea, em Sieden uk vea, biem Väarotshus emma twee, 18aun de wastne Sied, wua de Aunbu es, aun de Gaus vea, un bie däm Aunbu twee. 19Daut wieren de eenselne Aufdeelungen von de Puatenwajchta, dee aula to de Nokomen von Korach un Merari jehieeden.

De Oppsechta äwa de Stowen met daut Kaptol

20Eenje aundre Leviten hauden de Oppsecht äwa daut Tempelkaptol un äwa de Gott jeweide Gowen, waut fa däm Tempel väajeseenen wieren. 21Ladan siene Säns, de Nokomen von däm Gerschonita Ladan, wieren Leida en de Jehielita äare Grupp. #1Chr 23,8 22De Säns von de Jehielita, Setam un sien Brooda Joel, wieren äwa daut Kaptol en däm Harn sien Hus aunjestalt. 23Buta an worden uk noch Nokomen von Amram, Jizhar, Hebron un Usiel to dise Oppgow aunjestalt. 24Emol ea wia Schubael, Gerschom sien Sän, dee een Sän von Moses wia, de väaschta äwa daut Kaptol em Heilichtum jewast. #1Chr 23,16 25Von sienen Brooda Elieser, Moses sienen aundren Sän, staumd Rehabja; un däm sien Sän wia Jeschaja, Jeschaja sien Sän wia Joram, Joram sien Sän wia Sichri, un däm sien Sän wia Schelomit. #1Chr 23,17 26Dis Schelomit un siene Breeda wieren enjesat äwa aul daut Kaptol, de jeweide Gowen to woaken, waut de Kjennich David un de Gruppenleida, dee äwa 1.000 un äwa 100 wieren, un de Befälshaba em Kjrichshäa däm Harn jeweit hauden. 27Waut see von äa Kjrichskaptol aufjedeelt hauden, om doamet däm Harn sien Hus to buen. 28Uk aules, waut de Profeet Samuel, Saul, Kisch sien Sän, Abner, Ner sien Sän, un Joab, Zeruja äa Sän, jeweit hauden, fa aul dee äare jeweide Gowen, wieren Schelomit un siene Breeda veauntwuatlich.

De Vewaulta Oppgowen un de Oppgowen von de aundre Leviten

29Von Jizhar siene Nokomen wieren Kenanja un siene Säns buten oppem Launt en Israel aus Aumtslied un Rechta aunjestalt. 30Von Hebron siene Nokomen wieren Haschabja un siene Aunjehieeje, 1.700 aunjeseene Mana, dee aus Vewaultasch von Israel aun de wastne Sied Jordan aule Oabeiten fa däm Harn, un uk fa däm Kjennich to vewaulten hauden. 31De väaschta von Hebron siene Nokomen met aul äare Volkjsgruppen un Famieljes wia Jerija. Em 40. Rejierungsjoa von David wort de gaunze Nokomenschoft von Hebron derchjesocht un see fungen doabie en Jaser em Launt Gilead väl stoakje aunjeseene Mana. 32Un David sad dee met Jerija aus väaschta en daut Oostjordan Launt en, wua de Stam Ruben, Gad un de haulwa Staum Manasse wonden. See wieren dort Oppsechta äwa Gott siene Sachen un uk äwa däm Kjennich siene. Aules toop wieren see 2.700 Mana, waut aules Gruppenleida wieren.

Currently Selected:

1. Chronik 26: PB

Highlight

Compare

Copy