1. Chronik 20
20
De Amonita woaren an unjadon jemoakt
(2Sam 12,1-31)
1Un daut näakjste Farjoa, en dee Tiet, waut de Kjennichs toom kjriejen nuzten, jinkj Joab met daut Kjrichshäa wada loos toom Kaumf jäajen de Amonita. See deeden daut Launt vestieren, un kjeemen bat de Staut Raba un beloagaden dee. David selfst bleef oba en Jerusalem. Un Joab neem de Staut Raba en un vestieed dee. 2Dan kjeem uk David un neem däm amonitischen Kjennich de goldne Kroon vom Kopp. Dee wuach een Zentna un haud eenen sea dieren Steen. Un dee wort David oppjesat. Buta däm neem hee noch väle wieetvolle Sachen ut de Staut met. 3Hee stald de Enwona aun de Oabeit; see musten met Steensoagen, iesane Hoakes un Akjsen oabeiden. Soo deed David daut met aule Städa von de Amonita. Un dan jinkj David met daut Kjrichsvolkj toop wada trigj no Jerusalem.
De Helden Doten em Kaumf jäajen de Filista
(2Sam 21,18-22)
4No däm kjeem daut bie Gesser toom Kaumf met de Filista. Dan schluach Sibbechai von Huscha dän Saf doot, waut von daut Riesenjeschlajcht staumd, un de Filista musten an unjadon sennen. #1Chr 27,11 5Un daut jeef noch eenen Kaumf met de Filista. Doa schluach Elhanan, Jair sien Sän, dän Lachmi von Gat doot, waut Goliat sien Brooda wia, un dee soon dikjen Stock aum Spies haud aus een Wäwaboom. 6Aus daut no däm dan bie Gat toom Kaumf kjeem, kjeem doa een besondasch groota Ries äwadäl. Dee haud aun jieda Haunt sas Finjasch un aun jieda Foot sas Teeen, daut muak aules toop 24. Un hee wia eena von daut Riesenjeschlajcht. 7Dee spott äwa de Israeliten, oba Jonatan, dee David sien Brooda Schama sien Sän wia, schluach däm Ries doot. #1Sam 17,10 8Dise Riesen staumden ut Gat un wieren Nokomen von Rafa. Un dee worden von David un siene Mana dootjeschloagen.
Currently Selected:
1. Chronik 20: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
