1. Chronik 19

De Amonita Kjennich deed David siene Bootschofta beleidjen

(2Sam 10,1-5)

1Nohäa storf Nahasch, de Amonita äa Kjennich, un sien Sän wort Kjennich en siene Städ. #1Sam 11,1 2Dan docht David: Ekj well Hanun, däm Sän von Nahasch, daut bewiesen daut ekj sien Frint sennen well, wiels sien Voda haft mie fa sienen Frint jehoolen. Un soo schekjt hee Mana met däm Oppdrach han, Hanun äwa däm Velust von sienen Voda to treesten. Un aus dee, dee David jeschekjt haud, en daut Launt von de Amonita kjeemen om Hanun to treesten, 3säden de väaschte Mana von de Amonita to Hanun: Jleefst du werkjlich, daut David siene Mana jeschekjt haft, om dienen Voda to ieren un die to treesten? Sent de jeschekjte nich bloos jekomen, om to forschen, un uttofinjen woo daut Launt entonämen jeit? 4Dan neem Hanun de jeschekjte Mana von David un schäad an de Hoa un dän Boat auf un schneet äare Kjleeda haulf auf bat aun de Lint un leet an gonen. 5Un see jinjen wajch; oba David wort daut jemalt, woo see siene Bootschofta behaundeld hauden. Un hee schekjt an dan wäm entjäajen, wiels de Mana soo sea toschaund jemoakt wieren, un leet an sajen: Blieft en Jericho, bat jun Boat jewossen es; dan komt trigj.

De Siech äwa de Amonita un Aramäa waut sikj toopstunden

(2Sam 10,6-19)

6Aus de Kjennich Hanun un de Amonita daut moakjten, daut see David läwensjefäadlich beleidicht hauden, schekjten see Unjahendla met 1.000 Zentna Selwa no Mesopotamien, no Maacha en Sierien un no Zoba, om äwaraul Mana met Kaumf Woages un Rittasch auntowoawen. 7Un see kjrieejen 32.000 Mana met Kaumf Woages un däm Kjennich Maacha met sien Volkj loos. Un dee kjeemen un loagaden sikj ver Medeba. Un de Amonita saumelden sikj uk ut äare Städa un kjeemen toom Kaumf. 8Aus David daut hieed, schekjt hee Joab met daut gaunze Häa von Helden doahan. 9De Amonita stalden sikj ver daut Stautspuat von äare Hauptstaut Raba toom Kaumf opp. Oba de aundre Kjennichs, dee jekomen wieren an to halpen, deeden sikj opp daut opne Flekj toom Kaumf oppstalen. 10Aus Joab sach, daut de Fiend am von väaren uk von hinjen aunjriepen wudden, wäld hee ut de gaunze junge Maunschoft en Israel goode Mana ut, un stald sikj met dee jäajen de Aramäa. 11Daut äwaje Kjrichsvolkj leet hee unja sienen Brooda Abischai siene Oppsecht jäajen de Amonita kjamfen. 12Joab säd to Abischai: Wan de Aramäa fa mie too stoakj woaren, dan komm mie halpen! Wan oba de Amonita fa die too stoakj woaren, dan kom ekj die halpen. 13Sie jetroost un lot ons jetroost fa ons Volkj un fa onsen Gott siene Städa kjamfen. De Har woat daut soo lenkjen, aus am daut jefelt! 14Un Joab jinkj met daut Volkj, daut bie am wia, loos jäajen de Aramäa to kjamfen, un dee jeewen no un randen fa am. 15Un aus de Amonita daut sagen, daut de Aramäa sikj oppe Flucht jeewen, flichten see uk fa Abischai un trocken sikj trigj en de Staut nenn. Un Joab jinkj met sien Häa wada trigj no Jerusalem. 16Aus de Aramäa daut sagen, daut see von Israel besiecht wieren, schekjten see Mana no de aundre aramäische Volkjsstam von hinja däm Eufrat Riefa, un roopten dee to Help. Un dee kjeemen, unja de Aunleidunk von Schobach, Hadad Eser sienen Kjrichsfiera. 17Aus David daut jemalt wort, roopt hee aule Mana toop waut en Israel fäich wieren toom kjamfen, un jinkj met an toop äwa dän Jordan. Un aus hee bat dicht bie de Aramäa kjeem, stald hee sikj reed toom kjamfen, un de Kaumf funk aun. 18De Aramäa musten fa de Israeliten oba nojäwen un ranen. Un David venicht von de Aramäa 7.000 Woages un schluach 40.000 Mana, waut tofoot kjamften, doot. Un uk de Kjrichsfiera Schobach, wort dootjeschloagen. 19De aramäische Kjennichs, dee fa Hadad Eser en disen Kjrich gonen musten, sagen daut oba en, daut see Israel unjadon sennen musten, un schlooten Fräd met David un unjastalden sikj am. Un de Aramäa wullen de Amonita nich mea halpen.

Currently Selected:

1. Chronik 19: PB

Highlight

Compare

Copy