1. Chronik 16
16
De Bundeskjist woat oppjestalt un de Deensten woaren jeräajelt
1Un aus see Gott siene Kjist nenbrochten, saden see dee en daut Zelt, waut David fa dee reedjemoakt haud, un opfaden Brauntopfa un Dankopfa ver Gott. 2Un aus David de Brauntopfa un Dankopfa jebrocht haud, dan säajend hee daut Volkj en däm Harn sienen Nomen 3un deeld aun aule Israeliten, aun Mana uk aun Frues, een Tweebak Broot, een Stekj Fleesch un eene Rasienen Kuak ut. 4Un hee bestald waut Mana von de Leviten toom Deenst ver däm Harn siene Bundeskjist, daut see däm Harn, Israel äaren Gott, met Leeda preisen, danken un lowen deeden. 5Hee sad Asaf aus äaren Leida en, un Secharja aus tweeden, un de aundre wieren: Jaasiel, Schemiramot, Jehiel, Matitja, Eliab, Benaja, Obed Edom un Jeiel. See sullen biem sinjen met Zitta un Hoapen spälen, Asaf oba sull met Zimbeln taktschlonen, 6un de Priesta Benaja un Jahasiel sullen de gaunze Tiet ver Gott siene Bundeskjist met Trompeeten blosen.
Een Dankleet von David
(Psa 105,1-15; 96,1-13)
7Aun däm Dach leet David toom ieeschtemol von Asaf un siene Staumbreeda dit Leet däm Harn to ieren sinjen:
8Dankt däm Harn,
roopt sienen Nomen aun,
moakt siene Doten ver aule Velkja bekaunt!
9Sinjt un loft am,
un rät von aul siene Wunda!
10Veharlicht sienen heiljen Nomen;
siet en jun Hoat voll Freid,
jie waut däm Harn sieekjen!
11Froacht no däm Harn un no siene Macht,
sieekjt siene Jäajenwuat aulen Tiet!
12Denkjt aun siene Wunda, waut hee jedonen haft,
aun siene Tieekjens un aun de Jerechts Uadeelen waut hee utjesproaken haft,
13jie, de Nokomen von sienen Deena Israel,
jie Nokomen von Jakob, siene jewälde!
14Hee es de Har, ons Gott,
hee es Rechta äwa de gaunze Welt.
15Denkjt emma aun sienen Bunt met ons!
Siene Jesazen jellen 1.000 Jennerazionen.
16Soo haft hee Abraham daut toojesajcht,
un Isaak daut met eenen Eit bestädicht.
17Un von Jakob faust velangt,
aus een eewja Bunt met Israel,
18un hee säd: Die well ekj daut Launt Kanaan jäwen,
un die daut toodeelen, daut et dient sennen saul.
19Aus see aun Zol noch weinich wieren,
un framde enjewaundade em Launt,
20dan trocken see von een Volkj nom aundren,
un von een Kjennichrikj no daut aundre.
21Gott leet kjeenem an Schoden doonen,
un wees Kjennichs om äat haulwen trajcht: #1Mo 12,17; 20,3-7; 26,9
22Doot miene enjesade Deena nuscht aun,
un doot miene Profeeten kjeen Schoden!
23Lot de Menschen von de gaunze Ieed, fa däm Harn sinjen,
un moakt aule Dach bekaunt daut hee rat!
24Vetalt de Velkja woo harlich hee es,
un aule Velkja von siene Wunda!
25Wiels de Har es groot un sea to lowen,
un mea to ferchten aus aule Jetta.
26Aule Velkja äare Jetta sent doodje Jetta,
de Har oba haft dän Himmel jemoakt.
27Huage Pracht es runtom am,
von Macht un Freid es siene Woninj voll.
28Moakt junt opp nom Harn, jie Velkja!
Bewiest däm Harn, daut jie am ieren,
un unjaordnet junt siene Macht! #(28 un 29) Psa 29,1-2
29Brinjt däm Harn de Iea, waut sienen Nomen traft,
brinjt am june Opfagowen!
Doot junt ver am han schmieten,
wan hee sikj en siene Heilichkjeit openboat!
30De gaunze Welt saul am ferchten!
Hee haft de Ieed faust jemoakt,
daut dee nich schwäakjt.
31De Himmel saul sikj freien, un de Ieed saul froo sennen,
un sajcht aule Menschen: De Har es Kjennich!
32Daut Mäa saul rummuaren met aules waut doa bennen läft!
Daut Akalaunt saul schaftich sennen
met aules toop, waut doabowen waust!
33De Beem em Woolt sellen fa freid juchen,
wiels de Har kjemt de Ieed to rechten.
34Dankt däm Harn, wiels hee es frintlich,
un siene truhoatje Leew hieet niemols opp! #2Chr 20,21
35Sajcht to am: Rad ons,
Gott, ons Heilant,
un rad ons un saumel ons ut aule Velkja,
daut wie dienen heiljen Nomen preisen un die lowen!
36Jeloft best du Har, Israel äa Gott,
von Eewichkjeit bat Eewichkjeit!
Un aul daut Volkj säd: Amen! Un: Loft dän Harn! #Psa 41,14
De Ordnunk em Gottesdeenst en Jerusalem un Gibeon
37Opp David siene Aunordnunk bleewen Asaf un siene Staumbreeda bie däm Harn siene Bundeskjist, om aule Dach dän needjen Deenst to doonen. 38Uk Obed Edom, Jedutun sien Sän, un siene Staumbreeda neemen äaren Deenst aus Puatenwajchta opp. To an jehieed uk Hosa. Un aules toop wieren daut 68 Mana. 39De Priesta, Zadok un sien Frintschoft, stald David aun toom Deenst bie däm Harn siene Woninj, waut opp dän Opfa Plauz en Gibeon stunt. #1Chr 21,29 40See sullen däm Harn aule Dach aum Morjen uk aum Owent, opp däm Brauntopfa Aultoa Brauntopfa brinjen, soo aus en däm Harn sien Jesaz jeschräwen steit, waut hee Israel aunjeordnet haft. #2Mo 29,38-39 41Un met an wieren de Sinja Heman un Jedutun un de aundre utjewälde, waut met Nomen bestemt wieren, däm Harn räajelmässich met Jesank to danken: Daut siene truhoatje Leew niemols opphieet! 42See deeden de Leeda met Trompeeten, halkjlinjende Zimbeln un met Seidenspell to Gott siene Iea bejleiten. Aus Puatenwajchta worden Jedutun siene Säns aunjestalt. 43Aum Schluss jinkj daut gaunze Volkj wada trigj no äare Woninjen, un uk David jinkj no Hus, om siene Famielje to säajnen.
Currently Selected:
1. Chronik 16: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
