1. Chronik 15

Doa woat reedjemoakt om de Bundeskjist no Jerusalem to brinjen

1David leet en de Davidstaut fa sikj Hiesa buen un bestemd uk eenen Plauz fa de Bundeskjist un leet uk fa dee een Zelt oppstalen. 2Dan säd David: Gott siene Kjist saul kjeen aundra droagen aus de Leviten, wiels dee haft de Har doatoo jewält, daut see däm Harn siene Bundeskjist droagen un am aulen Tiet deenen sellen. 3Dan leet David gaunz Israel no Jerusalem tooproopen, om dän Harn siene Kjist no däm Plauz to brinjen, waut hee fa dee reedjemoakt haud. 4Besondasch enjelot wieren de Priesta, de Nokomen von Aaron, un de Leviten. 5Von Kehat siene Nokomen wieren: Uriel, de väaschta, met siene Breeda toop 120 Mana. 6Von Merari siene Nokomen wieren: Asaja, de väaschta, met siene Breeda toop 220 Mana. 7Von Gerschon siene Nokomen wieren: Joel, de väaschta, met siene Breeda toop 130 Mana. 8Von Elizafan siene Nokomen wieren: Schemaja, de väaschta, met siene Breeda toop 200 Mana. 9Von Hebron siene Nokomen wieren: Eliel, de väaschta, met siene Breeda toop 80 Mana. 10Un von Usiel siene Nokomen wieren: Aminadab, de väaschta, met siene Breeda toop 112 Mana.

11Un David roopt de Priesta Zadok un Abjatar un de Leviten, Uriel, Asaja, Joel, Schemaja, Eliel un Aminadab, #(11 un 12) 2Sam 15,29 12un säd to an: Jie sent de Leida von de levitische Volkjsgruppen; doot junt un june Breeda reinjen un Gott weien, wiels jie sellen däm Harn, Israel äaren Gott, siene Bundeskjist no däm Plauz brinjen, waut ekj fa dee väajeseenen hab. 13Wiels daut ieeschtemol, aus jie nich doa wieren, muak de Har, ons Gott, eenen schwoaren Schlach unja ons, wiels wie am nich jefroacht hauden, woo sikj daut jehieed. #1Chr 13,9-11 14Dan weiden de Priesta un Leviten sikj, om dän Harn, Israel äaren Gott, siene Bundeskjist to droagen. 15Un de Leviten druagen Gott siene Kjist met Stangen opp äare Schulren, soo aus Moses an daut no däm Harn sien Wuat väajesajcht haud. #2Mo 25,14; 4Mo 4,15 16David säd to de väaschte Mana von de Leviten, daut see äare Staumbreeda, waut sinjen un spälen deeden, aunstalen sullen, daut see däm Harn to ieren met freiden Leeda sungen. See sullen daut lud met Seidenspell, met Zitta un Hoapen, un met Zimbeln bejleiten. 17Dan stalden de Leviten Heman, Joel sienen Sän aun, un von siene Breeda Asaf, Berechja sienen Sän, un von äare Staumbreeda, von Merari siene Nokomen, Etan, Kuschaja sienen Sän. 18Un von äare Staumbreeda von de tweede Ordnunk kjeemen doatoo Secharja, Jaasiel, Schemiramot, Jehiel, Unni, Eliab, Benaja, Maaseja, Matitja, Elifelehu, Mikneja, Obed Edom un Jeiel, de Puatenwajchta. 19Heman, Asaf un Etan wieren Sinja, un see schluagen met Schlach Instrumenten, de hal kjlinjende bronsne Zimbeln. #1Chr 6,18.24.29; 25,1 20Secharja, Jaasiel, Schemiramot, Jehiel, Unni, Eliab, Maaseja un Benaja spälden de Hoapen met huage Teen. 21Matitja, Elifelehu, Mikneja, Obed Edom, Jeiel un Asaja spälden Zitta met acht Seiden. 22Kenanja, de väaschta von de Meistasch em sinjen mank de Leviten, jeef an em sinjen Aunleidunk, wiels hee vestunt daut goot. 23Berechja un Elkana wieren de Wajchta ver de Bundeskjist. 24Un de Priesta Schebanja, Joschafat, Netanel, Amasai, Secharja, Benaja un Elieser, blosden met de Trompeeten ver Gott siene Kjist; un hinja an foljden Obed Edom un Jehija aus Wajchta.

David holt de Bundeskjist no Jerusalem

(2Sam 6,12-19)

25Soo jinjen David un de Leida von Israel un de väaschte Mana von siene Truppen han, om dän Harn siene Bundeskjist met freiden ut daut Hus von Obed Edom to holen. 26Un wiels Gott de Leviten holp, waut de Kjist met däm Harn sienen Bunt druagen, opfaden see ut Dank säwen junge Bolles un säwen Schopsbakj. 27David druach eenen Äwarock von feinet wittet Lienzeich. Un soo wieren uk de Leviten jekjleet, waut de Bundeskjist druagen, un de Sinja un Kenanja, de väaschta em Jesank. Un David selfst druach uk daut Priesta Schalduak von Lienzeich. #2Mo 25,7 28Gaunz Israel stemd met freiden en, en däm Klank von de Posaunen, Trompeeten un hale Zimbeln, Zitta un Hoapen. Soo bejleiten see däm Harn siene Bundeskjist, aus dee no äaren nieen Plauz jebrocht wort. 29Aus de Bundeskjist en de Davidstaut nenn jedroacht wort, stunt David siene Fru Michal, Saul siene Dochta, aum Fensta. Un aus see däm Kjennich David daunzen un ut Freid sprinjen sach, veacht see am en äa Hoat.

Currently Selected:

1. Chronik 15: PB

Highlight

Compare

Copy