1. Chronik 14

David en Jerusalem

(2Sam 5,11-16)

1Hiram, de Kjennich von Tierus, schekjt Bootschofta no David, un Zeedaholt un uk Mana, dee doa vestunden Steena to beoabeiden, un uk soone, dee Holt un Buoabeit vestunden to doonen, waut am eenen Paulaust buen sullen. 2Un David wort daut doaraun en, daut de Har am toom Kjennich äwa Israel bestädicht haud, wiels sien Kjennichrikj sea stoakj jeworden wia om daut Volkj Israel äat haulwen. 3Un David neem sikj noch mea Frues en Jerusalem un haud von an noch mea Säns un Dajchta. 4De Säns, dee am en Jerusalem jebuaren worden, heeten: Schamua, Schobab, Natan, Salomo, 5Jibhar, Elischua, Elpelet, 6Nogah, Nefeg, Jafia, 7Elischama, Beeljada un Elifelet.

David schleit de aunjriepende Filista trigj

(2Sam 5,17-25)

8Aus de Filista daut hieeden, daut David toom Kjennich äwa gaunz Israel jesaulft wia, kjeemen see aula opp, om am en äare Jewault to brinjen. Aus David daut hieed, jinkj hee an entjäajen. 9Un de Filista kjeemen un besaden daut jlikje Flekj von Refaim. 10David oba fruach Gott un säd: Saul ekj jäajen de Filista kjamfen gonen, un west du dee en miene Macht jäwen? De Har säd to am: Jriep dee aun! Ekj woa dee en diene Macht jäwen. 11Un David jinkj loos un besiejd de Filista bie Baal Perazim un säd: Soo aus Wota eenen Daum derchbrakjt, soo haft de Har derch miene Haunt de Rieejen von miene Fiend derchjebroaken. Doawäajen nanden see de Städ “Baal Perazim”. 12Un de Filista, dee bosich flichten musten leeten soogoa äare Jetta dort ligjen; un David leet dee vebrennen. #5Mo 7,5.25

13Oba de Filista kjeemen boolt wada un besaden daut jlikje Flekj von Refaim. 14Un David fruach Gott wada, un Gott säd to am: Jriep dee nich aun, go bie an rom, soo daut du von de Bakabeem aun an naun kjemst. 15Wan du dan hieren woascht, daut doa bowen en de Bakabeem een Jeruschel es, aus wan doa wäa derchgonen deit, dan go loos toom Kaumf; dan es Gott ver die loosjegonen, de Filista äa Häa to schlonen. 16Un David deed, soo aus Gott am väajesajcht haud, un see schluagen de Filista äa Häa von Gibeon bat Gesser trigj. 17David sien aunseenen vebreed sikj en aule Lenda, un de Har sorjd doafäa, daut am aule Velkja ferchten.

Currently Selected:

1. Chronik 14: PB

Highlight

Compare

Copy