1. Chronik 13

David holt de Bundeskjist von Kirjat Jearim

(2Sam 6,1-11)

1David berod sikj met de veauntwuatliche Mana, waut de väaschte äwa siene Truppen wieren, 2un dan säd hee to de gaunze Volkjsvesaumlunk von Israel: Wan jie doamet envestonen sent, un de Har, ons Gott, daut soo well, dan lot ons doch Mana met de Norecht no aule Jäajenden em Launt schekjen. See sellen onse Breeda roopen, waut Tus jebläwen sent, un soo uk de Priesta un Leviten, dee en äare Woninjen sent, daut see aula häakomen sellen. 3Un dan well wie aula toop onsen Gott siene Bundeskjist no Jerusalem holen, wiels en Saul siene Tiet hab wie nich no dee jefroacht. 4Dan säd de gaunze Vesaumlunk von Israel: Daut sull wie doonen; un daut gaunze Volkj jefoll daut. 5Dan leet David gaunz Israel tooproopen, von Schihor em Sieden aun de ägiptische Jrens, bat Hamat em Nuaden, om daut see Gott siene Bundeskjist von Kirjat Jearim holden. 6Wiels doa wia de Bundeskjist, waut däm Harn, dee sienen Troon äwa de Cheruben haft, jeweit es, un wua eena sienen Nomen aunroopen kaun. David jinkj met aule Israeliten toop no Baala, daut es Kirjat Jearim, waut en daut Launtstekj von Juda licht. #Jos 15,9 7Un see leeten Gott siene Bundeskjist opp eenen nieen Woagen ut Abinadab sien Hus fieren. Usa un sien Brooda lenkjten dän Woagen. 8David un daut gaunze Volkj daunzten hinjawäajes met eene hanjäwende Enstalunk, om Gott to ieren. Un see sungen Leeda un spälden met Hoapen, Zitta, Klaupasch, Zimbeln un Trompeeten. 9Aus see oba bat Kidon sienen Draschplauz kjeemen, stolpaden de Rinda, dee ver däm Woagen jespaunt wieren, un Usa strakjt siene Haunt ut, om de Bundeskjist to hoolen. 10Dan kjeem dän Harn sien Oaja äwa Usa, wiels hee de Bundeskjist aunjefot haud, un leet am plazlich stoawen. 11Dan jrämd David sikj doawäajen, daut de Har däm Usa soo wajchreet, un see nanden de Städ “Perez Usa”, soo aus dee bat disen Dach jenant woat. 12Un aun janen Dach fercht David sikj ver Gott un säd: Kaun ekj daut dan noch woagen, Gott siene Bundeskjist no mie to holen? 13Doawäajen leet hee de Bundeskjist nich no sikj en de Davidstaut brinjen, oba hee leet dee en Obed Edom, dän Gatita, sien Hus nenn brinjen. 14Dort bleef de Bundeskjist dree Moonat stonen. Un de Har säajend daut Hus von Obed Edom un aules waut hee haud.

Currently Selected:

1. Chronik 13: PB

Highlight

Compare

Copy