1. Chronik 12

De ieeschte Aunhenja waut David en Ziklag haud

1Dit sent de Mana, waut no David kjeemen aus hee sikj en Ziklag opphilt, aus hee vom Kjennich Saul, Kisch sienen Sän, wajchbliewen must. See wieren Helden, dee am don aul kjamfen holpen. #1Sam 27,6 2See wieren met Flizboages un Feilen bewaufnet, un kunnen met de rajchte uk met de linkje Haunt, met däm Schleida Steena, un met däm Flizboagen Feilen scheeten. Von Saul siene Staumbreeda, ut däm Staum Benjamin, kjeemen no David: 3Ahieser, de väaschta, un Joasch, Schemaa von Gibea sien Sän; Jesiel un Pelet, Asmawet siene Säns; Beracha un Jehu, von Anatot, 4Jischmaja von Gibeon, eena von de 30 Helden, waut de väaschta mank an wia, 5Jirmeja, Jahasiel, Johanan, un Josabad von Gedera, 6Elusai, Jerimot, Bealja, Schemarja un Schefatja von Haruf, 7Elkana, Jischija, Asarel, Joeser un Joschobam von Korach siene Nokomen, 8Joela un Sebadja, Jeroham siene Säns von Gedor.

9Ut däm Staum Gad jinkj uk eene Grupp stoakje Kjrieja äwa no David, aus hee bie sienen sechren Plauz enne Wiltnis von Juda wia. See wieren met Schilt un Spies bewaufnet, un kjamften soo aus de Leiws un wieren oppe Boaj soo fekjs aus de Ree. 10De väaschta wia Eser, de tweeda Obadja, de dredda Eliab, 11de vieeda Mischmana, de fefta Jirmeja, 12de sasta Atai, de säwenda Eliel, 13de achta Johanan, de näajenda Elsabad, 14de tieenda Jirmeja, un de alfta Machbanai. 15Dise wieren ut däm Staum Gad, see wieren Befälshaba em Kjrichshäa, un de jerinjsta von an wia äwa 100, un de stoakjsta wia äwa 1.000. 16Dit sent dee, dee en eenen Kaumf en de ieeschte Moonat äwa däm Jordan kjeemen aus dee bat aun beid Kaunten voll wia, un aule Läajchten nom Oosten uk nom Wasten too wieren.

17Ut de Stam Benjamin un Juda kjeemen oba uk waut Mana no David no de aufjesechade Städ manke Boaj. 18Un David jinkj rut no an un säd: Kom jie en Fräd no mie om mie to halpen, dan saul mien Hoat met junt sennen. Kom jie oba met Lest, om mie aun miene Fiend to veroden, soo weet de Har, onse Vodasch äa Gott daut, un woat daut bestrofen, wiels ekj hab kjeen orrajcht jedonen. 19Vom Jeist Gottes jedräwen neem Amasai, de väaschta äwa 30, daut Wuat un säd: Wie jehieren die, David, un met die well wie daut hoolen, du Sän von Isai! Fräd, Fräd saul met die sennen! Fräd saul uk met diene Helpasch sennen, wiels dien Gott die halpt! Dan neem David an opp un sad an en aus Befälshaba äwa siene Baunden.

20Un ut däm Staum Manasse jinjen uk waut Mana äwa no David. Dit passieed en dee Tiet, aus hee opp de Filista äare Sied jäajen Saul toom Kaumf jinkj. Daut kjeem oba nich doatoo, wiels de Filista äare Volkjsleida beroden sikj doaräwa un schekjten am trigj un säden: Wan hee opp eemol doch no sienen Harn Saul äwajeit, dan kaun ons daut dän Hauls kosten. #1Sam 29,3-4 21Aus David dan wada trigj no Ziklag jinkj, kjeem noch dise Grupp Mana ut däm Staum Manasse no am: Adnach, Josabad, Jediael, Michael, Josabad, Elihu un Zilletai. See wieren Befälshaba äwa 1.000 em Staum Manasse. 22See holpen David jäajen de Baunden von de Amalekita to kjamfen, wiels see wieren aules stoakje Kjamfa, un worden Befälshaba äwa David siene Armee. 23Soo kjeemen aule Dach fresche Lied no David, om am to halpen, bat daut to een grootet Häa wort, soo aus Gott sien Häa.

De Kjrieja, waut en Hebron no David kjeemen

24Un dit sent de Zolen von de Mana waut sikj toom Kjrich reedjemoakt un en Hebron no David kjeemen, om am no däm Harn sien Wuat no, toom Kjennich to moaken en Saul siene Städ. 25Von Juda wieren 6.800 Mana, waut met Schilt un Spies toom Kjrich bewaufnet wieren. 26Von Simeon wieren 7.100 stoakje Helden em Kjrichsdeenst. 27Un ut däm Staum Levi wieren 4.600; 28un de Priesta Jojada, de väaschta äwa Aaron siene Nokomen, wia noch met 3.700; 29un Zadok, een junga Kjamfa met eenen Heldenmoot, met siene Grupp von 22 Hauptmana. #2Sam 15,24; 1Chr 5,34 30De Mana von Benjamin, Saul siene Staumbreeda, wieren 3.000, wiels to dee Tiet hilden sikj noch väle von an aun Saul siene Famielje. 31De Mana von Efraim wieren 20.800 stoakje Kjrieja un aunjeseene Mana en äare Volkjsgruppen. 32Von däm haulwen Staum Manasse wieren 18.000, waut met Nomen bestemt un doatoo beoppdroacht wieren, daut see kjeemen un David toom Kjennich muaken. 33De Mana von Isachar, waut Ensecht hauden un Rot jäwen kunnen, waut Israel to rajchte Tiet doonen sull, wieren 200 Aumtslied, un aul äare Breeda deeden, waut see an väasäden. 34Von Sebulon wieren 50.000 Mana, waut Kaumf fäich un met aule Sorten Jewäaren bewaufnet wieren, un sikj gaunz hanjeewen om David to halpen. 35Von Naftali wieren 1.000 Hauptmana, un met an noch 37.000, waut met Schilt un Spies bewaufnet wieren. 36Vom Staum Dan wieren 28.600, waut toom Kaumf bewaufnet wieren. 37Von Asser wieren 40.000 bewaufnete Mana. 38Von aun jantsied Jordan, von de Stam Ruben un Gad, un dän haulwen Staum Manasse, wieren 120.000 met aulahaunt Jewäaren toom Kaumf bewaufnet.

39Aul dise kjrichsfäje Mana kjeemen jeordnet un bewaufnet no Hebron met eenstemje Aufsecht, om David toom Kjennich äwa gaunz Israel to moaken. Un disen Wunsch hauden uk aule Israeliten. 40See bleewen dort dree Doag bie David en Hebron. Un fa Äten un Drinkjen sorjden de Enwona von de Staut. 41Uk dee, dee doa nich wiet auf wonden, von Isachar, Sebulon un Naftali, brochten opp Äsels, Kameelen, Mulasch un Rinda, Noarunk doahan. See brochten Broot, Kuaken von Fiejen un Rasienen, Wien, Eelj, un doatoo noch väl Rinda un Schop, wiels de Freid en Israel wia groot.

Currently Selected:

1. Chronik 12: PB

Highlight

Compare

Copy