1. Chronik 11

David woat Kjennich äwa Israel

(2Sam 5,1-3)

1Gaunz Israel vesaumeld sikj bie David en Hebron un säd to am: Du best doch ons ieejnet Fleesch un Bloot! #1Mo 29,14 2Aul don, aus Saul noch Kjennich wia, deetst du daut israelitische Häa em Kjrich veropp gonen. Un de Har, dien Gott, haft die toojesajcht: Du saust mien Volkj Israel weiden, un du saust de väaschta äwa mien Volkj Israel sennen. 3Soo säden aule Leida von Israel, waut no däm Kjennich David no Hebron jekomen wieren. Un David muak dort en Hebron ver däm Harn eenen Bunt met an. Un see saulwden David toom Kjennich äwa gaunz Israel, soo aus de Har daut derch Samuel jesajcht haud. #1Sam 16,1.3.11-12

David nemt Jerusalem en un moakt daut to siene Hauptstaut

(2Sam 5,6-10)

4Un David trock met aule Mana von Israel toop no Jerusalem, waut don Jebus heet. Wiels doa wonden to dee Tiet de Jebusita. 5Un de Birja von Jebus säden to David: Hia en dise vesechade Staut woascht du nich nenkomen. David neem de vesechade Staut Zion oba doch en, un dee wort to Davidstaut. 6David säd to siene Mana: Wäa de Jebusita daut ieeschte schleit, dee saul mien väaschta Kjrichsfiera woaren. Dan stieech Joab, de Zeruja äa Sän, daut ieeschte nopp no de Staut, un wort David sien Kjrichsfiera. 7Dan jinkj David un wond en de vesechade Städ, un doahäa wort dee “Davidstaut” jenant. 8David bud de Staut runtom ut, vom Millo aun gaunz runtom. Joab oba bud daut äwaje en de Staut wada trajcht. 9David neem emma mea to aun Macht, un de Har, dee aules rejieet, wia met am.

David siene Helden un äare groote Doten

(2Sam 23,8-39)

10Dit sent de väaschte von David siene Helden, waut sikj tru aun am hilden en sien Kjennichrikj met gaunz Israel. Met daut gaunze Volkj toop muaken see am no däm Harn sien Wuat toom Kjennich äwa Israel. 11Un dit sent de Nomes von David siene Helden: Joschobam, een Nokomen von Hachmoni, wia de väaschta von dree Helden; hee kjamft met däm Spies un spekjt 300 Fiend en eenen Kaumf doot. 12Hinja am wia Eleasar, Dodo sien Sän von Ahoach. Hee wia eena von dree Helden. #1Chr 27,4 13Hee wia doabie, aus de Filista sikj bie Pas Damim jäajen David toom Kaumf vesaumelt hauden. Dort wia een Joascht Flekj. Aus de Israeliten oba fa de Filista nojäwen un ranen musten, 14stald hee sikj medden opp daut Flekj han, un veteidijd daut un see schluagen de Filista trigj. Un de Har jeef Israel eenen grooten Siech.

15Eemol aus de Filista äa Loaga opp daut jlikje Launt Refaim oppjestalt hauden, jinjen dree von de 30 Helden no däm Steen rauf, wua David wia, en de Heel Adullam. #1Sam 22,1 16Dort haud David eene Städ wua hee sechren Schutz haud, un wua hee sikj uk jrod opphilt; oba de Filista hauden en de selwje Tiet uk eene Aufdeelunk en Betlehem un bewoakten daut strenj. 17Un David leet sikj daut jelesten un säd: Mie darscht! Wäa holt mie Wota ut däm Borm waut bie daut Stautspuat en Betlehem es? 18Dan jinjen dree Helden un bruaken en daut Loaga von de Filista nenn, un schapten Wota ut däm Borm, waut biem Puat en Betlehem wia, un brochten daut no David. Hee oba wäad sikj daut to drinkjen, un goot daut ver däm Harn ut aus een Drinkjopfa 19un säd: Doa mucht Gott mie von wajchhoolen, daut ekj soont doo, wiels daut wudd je jrod soo sennen aus wan ekj daut Bloot von dise Mana drunk, waut äa Läwen opp Spell saden om dit Wota to holen. Doawäajen wull hee daut nich drinkjen. Dit deeden de dree stoakje Helden.

20Abischai, Joab sien Brooda, wia de väaschta von de 30 Helden. Hee schluach met sienen Spies 300 Fiend dol. 21Un hee haud daut jratste aunseenen von dise 30 Mana; oba met de aundre Dree kjeem hee nich met.

22Benaja, von Kabzeel, Jojada sien Sän, wia een Helden Kjamfa, dee groote Doten volbrocht. Hee schluach de twee groote Helden von de Moabita, waut aus Leiws von Moab bekaunt wieren. Un aus aun eenen Dach, aus daut jeschniet haud, een Leiw em Borm jefollen wia, dan kroop hee doa auleen nenn un schluach däm doot. 23Hee schluach uk eenen ägiptischen Maun doot, waut fief Ellen huach wia, un eenen Spies enne Haunt haud, waut soo dikj wia aus een Wäwaboom. Oba hee jinkj bloos met eenen Stock opp däm loos, un reet am sienen Spies ut de Haunt un spekjt am doamet doot. #1Sam 17,7 24Derch soone Doten wort Benaja aus eena von de 30 Helden aunerkjant. #1Chr 27,5-6 25Un hee wort huach jeieet mank de 30 Helden, oba met de väaschte dree Helden kjeem hee nich met. David stald am oba aun äwa siene Wajchta.

26De aundre stoakje Helden wieren dise: Asael, Joab sien Brooda; Elhanan, Dodo sien Sän, von Betlehem; 27Schamot von Harod, Helez von Pelon, #1Chr 27,10 28Ira, Ikkesch sien Sän, von Tekoa; Abieser von Anatot, 29Sibbechai von Huscha, Ilai von Ahoach, 30Mahrai von Netofa, Heled, Baana sien Sän, von Netofa, 31Ittai, Ribai sien Sän, von Gibea en Benjamin; Benaja von Piraton, 32Hiddai von Nahale Gaasch, Abiel von Bet Araba, 33Asmawet von Bahurim, Eljachba von Schaalbim, 34Jaschen, de Gunita; Jonatan, Schage sien Sän, von Harar, 35Ahiam, Sachar sien Sän, von Harar, Elifal, Ur sien Sän, 36Hefer von Mechera, Ahija von Pelon, 37Hezro von Karmel, Naarai, Esbai sien Sän, 38Joel, Natan sien Brooda; Mibhar, Hagri sien Sän, 39Zelek, de Amonita; Nachrai von Beerot, Joab sien Schiltdroaga. 40Ira von Jatir, Gareb von Jatir, 41Uria, de Hetita, Sabad, Achlai sien Sän, #2Sam 11,3 42Adina, Schisa sien Sän, een Befälshaba ut däm Staum Ruben waut äwa 30 Mana to jebeeden haud. 43Hanan, Maacha sien Sän, Joschafat von Meten, 44Usija von Aschtarot, Schama un Jehiel, Hotam siene Säns, von Aroer. 45Jediael, Schimri sien Sän, un sien Brooda Joha, von Tiz. 46Eliel von Mahawiem, Jeribai un Joschawja, Elnaam siene Säns, Jitma, de Moabita; 47un Eliel, Obed un Jaasiel von Zoba.

Currently Selected:

1. Chronik 11: PB

Highlight

Compare

Copy