1. Chronik 10

Saul sien Unjagank

(1Sam 31,1-13)

1Bie däm Boajch Gilboa kjeem daut to eenen Kaumf tweschen Israel un de Filista. Un de Mana von Israel musten nojäwen un flichten; un väle von an worden von de Fiend doljeschloagen un bleewen ligjen. 2Oba de Filista vefoljden Saul un siene Säns. Un de dree Säns: Jonatan, Abinadab un Malkischua kjeemen doa aula to dood. 3Un om Saul wort sea hoat jekjamft aus de Flizboagen Scheetasch am to seenen jekjräajen hauden, un opp am loosjinjen, un Saul wort aunjeschoten. 4Dan säd Saul to sienen Schiltdroaga: Nemm dien Schwieet un moak mie doot! Om daut nich dise onbeschnädne komen un driewen äaren Spott met mie. Oba sien Schiltdroaga fercht sikj daut to doonen, un wull daut nich. Dan neem Saul selfst daut Schwieet un schmeet sikj opp de Spetz von daut Schwieet. 5Aus de Schiltdroaga daut sach, daut Saul doot wia, neem hee uk sien Schwieet un schmeet sikj doanopp, daut hee doot spekjt. 6Soo storwen Saul un siene dree Säns, un doamet uk sien Kjennichshus. 7Un aus de Mana von Israel, waut opp daut jlikje Launt von Jesreel wonden, daut sagen, daut see jeschloagen wieren, un Saul un siene Säns doot wieren, dan veleeten see äare Wonstäden un brochten sikj wajch. Un de Filista kjeemen un bewonden äare Städa. 8Dän näakjsten Dach no däm Kaumf kjeemen de Filista om aule wieetvolle Sachen von de doodje Menschen wajchtonämen, un fungen doabie uk Saul un siene Säns, dee doot opp däm Boajch Gilboa lagen. 9Dan trocken see Saul ut un neemen sienen Kopp un siene Jewäaren un schekjten Menschen doamet derch daut gaunze Filista Launt, un brochten de Siejes Norecht ver daut gaunze Volkj un uk ver äare Jetta. 10Un see läden Saul siene Jewäaren en äaren Gott sienen Tempel nenn, un sienen Kopp muaken see aum Tempel von äaren Aufgott Dagon naun.

11Aus de Enwona von Jabesch en Gilead daut hieeden, waut de Filista Saul aules aunjedonen hauden, 12muaken see sikj opp, aule Mana waut toom Kaumf fäich wieren, un neemen de doodje Kjarpasch von Saul un siene Säns un brochten dee no Jabesch un begrowden dee unja däm Ieekjenboom bie Jabesch, un fausten un truaden säwen Doag. #2Sam 2,4-5 13Soo storf Saul, wiels hee däm Harn ontru jeworden wia, un sikj nich aun däm Harn sien Wuat hilt, un soogoa eene Woasajafru befroagen jinkj, #1Sam 15,23; 28,8 14oba nich däm Harn froagen deed. Doawäajen leet de Har am stoawen un muak David, Isai sienen Sän, en siene Städ toom Kjennich.

Currently Selected:

1. Chronik 10: PB

Highlight

Compare

Copy