Neh 3
3
Kub' kyaq'pu'n aq'untl kyxol
1A Elyasib' kynejel pale kyuk'i'lju' pale, eb'inchanteju' tjpel tnam, rit tb'i. Okkyq'o'n ptzo'n tzuyb'ilte ex okkyq'o'n tjpel, ex jaw kyb'incha'ntlu' nintapi tzajx tk'etzju' ja nimin twe' Syen tb'i ex ponx tk'etzju' ja nimin twe' Ananel tb'i. 2Atzu'n jun tnejtl nintapi jaw kyb'incha'ntlu' xjal aj Jeriko, ex jun tnejtl jaw tb'incha'ntl Sakur, tk'wal Inb'ri. 3Aye'tzu'n tyajajil Senaa jaw kyb'incha'ntlu' tjpel, kyiẍ tb'i, okkyq'o'n ptzo'n tzuyb'ilte ex eb'jo'k kyq'o'nju' tjpel kyuk'i'lxi' jpub'lte ex t-xq'e'l. 4Atzu'n jun tnejtl nintapi oktkuwsa'n Meremot, tk'wal Uriy ex tchman Kos; atzun jun tnejtl nintapi a Mesulam, tk'wal B'erekyiy ex tchman Mesesab'el jaw b'inchante; atzun jun tnejtl nintapi jaw tb'incha'ntl Sadok, tk'wal B'aana. 5Atzu'n jun tnejtl aye' eb'aj b'inchanteju' aye' aj Tekoa, maskye min kyaju' kyxjal nimaq kyoklen tu'n kyonin kyi'ju' nejenel ti'ju' aq'untl. 6Aye' Joyada, tk'wal Pasea, ex mesulam, tk'wal B'esodiy, eb'inchanteju' tjpel Jesana tb'i. Okkyq'o'n ptzo'n tzuyb'ilte ex b'jo'k kyq'o'n tjpel kyuk'i'lxi' jupb'ilkye ex t-xq'e'l. 7Atzu'n jun tnejtl nintapi b'aj kyb'incha'n Melatiyas aj Kab'aon ex Jadon aj Meronot, exqe' xjal aj Kab'aon ex aj Mispa, ju' najb'il ate'qe' tjaq' tkawb'ilju' kawil toj tkub'exq'ij te nin a' Ewprates. 8Atzu'n jun tnejtl nintapi b'aj tb'incha'n Usyel, tk'wal Arayiy, aq'unal ti'j saqpwaq; atzun jun tnejtl b'aj tb'incha'n Ananiy, aq'unal ti'j k'ok'sb'il; kykab'il eb'aj b'inchanteju' nintapi ti'j Jerusalen tzmax tk'etzu' tapi nim twitz. 9Atzu'n jun tnejtl b'aj tb'incha'n Repayiy, tk'wal Ur, alkalt te nik'jan ttx'otx' Jerusalen. 10Atzu'n jun tnejtl tapi b'aj tb'incha'n Jedayiy, tk'wal Arumap, qu'n tpentoqu' tja ta'ya', atzun jun tnejtl b'aj tb'incha'n Atus, tk'wal Asab'niy. 11Aye'tzu'n Malkyiy, tk'wal Arim, ex Asub', tk'wal Paat-moab', b'aj kyb'incha'n jun tnejtl tapi exju' ja nimin twe' Orni tb'i. 12Atzu'n jun tnejtl b'aj kyb'incha'n Salum, tk'wal Aloes, ju' alkalt te nik'jantl ttx'otx' te Jerusalen, kyuk'i'lju' tmyal. 13Atzu'n Anun kyuk'i'lju' xjal najlqe' toj Sanoa b'aj kyb'incha'n tjpel b'ya' tb'i; b'aj kyb'incha'ntl ex b'jo'k kyq'o'n tjpel kyuk'i'lxi' jupb'ilte ex t-xq'e'l, ex jawkyb'incha'ntl junaq jun ky'jaj tk'i' nik'jan (21.53) tqanu' nintapi, tzmax tk'etzju' tjpel xob'l tz'is tb'i. 14Atzu'n Malkyiy, tk'wal Rekab', kawil toju' tx'otx' B'et-akyerem, b'inchantetlju' tjpel xob'l tz'is tb'i, b'jo'k tq'o'n tjpel kyuk'i'lxi' jupb'ilte ex t-xq'e'l. 15Atzu'n Salum, tk'wal Kolose, kawil toju' tx'otx' Mispa, b'inchantetlju' tjpel, t-xiklil a' tb'i: b'aj tb'incha'ntl ex jawx tq'o'n twi', ex b'jo'k tq'o'n tjpel kyuk'i'lxi' jupb'ilte ex t-xq'e'l, ex b'aj tb'incha'ntlju' nintapi tzajx jata' k'ub'l a', Siloe tb'i, tk'etzu' tawal nimaqkawil, pon tzmax ja ta'qe' peta'n nche ku'tz toju' Ninttanam Dab'i. 16Atzu'n Neemiy, tk'wal Asb'uk, kawil toj nik'janju' ttx'otx' B'et-sur, jaw b'inchante jun tnejtl nintapi tu'n tpon tzmax kywitzju' muqb'il te Dab'i, tu'n tpon tzmax tk'etzu' tkb'el a' ex tzmax tk'etz kyja xjal te q'oj.
17Atzu'n jun tnejtl tapi b'aj kyb'incha'n aj Leb'i: a Reum, tk'wal B'ani; atzu'n jun tnejtl b'aj tb'incha'n Asab'iy, kawil toj nik'janju' ttx'otx' Kyeyla, tb'incha toj tb'iju' jankawina'. 18Atzun jun tnejtl tapi jaw kyb'incha'n tuk'i'l: aye' B'ab'ay, tk'wal Enadad, ju' kawil toju' nik'jantl ttx'otx' Kyeyla; 19atzu'n Eser, tk'wal Joswe, kawil toj Mispa, b'aj b'inchante jun tnejtl tu'me'lju' ja k'ub'lkye aq'unb'il te q'oj, ttx'u'k tb'i. 20Atzu'n B'aruk tk'wal Sab'ay, b'aj b'inchante jun tnejtl, txi'x toj ttx'u'k ponx ttziju' tja Elyasib', kynejel pale; 21atzu'n Meremot tk'wal Uriy ex tchman Kos, jaw b'inchante jun tnejtl, tzajx ttzi tja Elyasib' ex ponx japomna' b'aju' ja.
22Atzun jun tnejtl tapi b'aj kyb'incha'n pale najlqe' toju' b'ya' Jordan. 23Aye'tzu'n B'enjamin ex Asub' eb'aj b'inchante jun tnejtl tapi tpenju' kyja. Atzu'n Asariy, tk'wal Maaseyiy ex tchman Ananiy, jaw b'inchante tk'etzju' tja. 24Atzun jun tnejtl b'aj tb'incha'n B'inuy, tk'wal Enadad, tzajx tk'etz tja Asariy, ponx ttx'u'k. 25Atzu'n Palal, tk'wal Usay, b'aj b'inchante jun tnejtl tapi tk'etzju' ttx'u'k ex tpenju' ja nimin twe', nimxi'xtl twe' kyetwitzju' tja nimaqkawil, ju' ati tpen tja xq'uqil. Atzun jun tnejtl b'aj tb'incha'n Pedayiy, tk'wal Paros, 26pon tzmax twitzju' tjpel, a' tb'i, tu'me'l tjawetzq'ij, ex tk'etzu' ja nimxi'x twe'. (Aye'toqu' nche ajb'en toj tja Dyos najliqe' toj Opel). 27Aye'tzu'n aj Tekoa eb'aj b'inchante jun tnejtl tapi, tzajx twitzju' ja nimxi'x twe' kyetwitzju' tapi ex ponx tk'etzju' nintapi Opel tb'i. 28Aye'tzu'n pale eb'aj b'inchante jun tnejtl nintapi, teyile junjun b'aj tb'incha'n tpenju' tja, tzajx twitzju' tjpel chej tb'i. 29Atzu'n Sadok tk'wal Imer, jawb'inchanteju' nintapi tpenju' tja; atzun jun tnejtl jawtb'incha'n Semayiy, tk'wal Sekaniy, ju' toktoq xq'uqil ttziju' tjpel te tjawetzq'ij. 30Atzun jun tnejtl b'aj kyb'incha'n Ananiy, tk'wal Selemiy, ex Anun, twaqaqi'n tk'wal Salap; atzun jun tnejtl b'aj tb'incha'n Mesulam, tk'wal B'erekyiy, tpenxju' tja. 31Atzun jun tnejtl nintapi b'aj tb'incha'n Malkyiy, aq'unal ti'j saqpwaq, pon tzmax tk'etz kyja nche ajb'en toj tja Dyos, ex tk'etz kyja xk'aẍlel, twitzju' tjpel xq'uqb'il tb'i, ponx tk'etzju' ja te xq'uqb'il ttx'u'k. 32Aye'tzu'n aq'unal ti'j saqpwaq kyuk'i'lju' xk'aẍlel eb'aj b'inchante jun tnejtl tapi tzajx tk'etzju' ja te xq'uqb'il toj ttx'u'k ex pon kanun tk'etzju' tjpel, rit tb'i.
Currently Selected:
Neh 3: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999