Neh 2
2
Taq' nimaqkawil Artajerjes anb'il tu'n txi' Neemiy Jerusalen
1Jun q'ij toju' xjaw Nisan, toj tjunaqi'n (20) ab'q'i nkawin nimaqkawil Artajerjes, tej intoq xinq'o'ne' tk'wa' b'in, oktka'yi'n nimaqkawil inxi'x chin b'isune' 2ex tzaj tqani'n weye':
—In nka'yine' twitza inxi'x b'isun. ¿Titi' niq'ina? mujqa yab'a, atilo jun ti'xti' myab'a'n, chij.
Tojtzu'n kmoj lu nna'ye' jun ninxob'el, 3ex xinma'ne' te nimaqkawil:
—¡Tz'anq'inxwita kukxju' nimaqkawil! ¿Se'ntaq'wi lay chin b'isune', extzun xitjniju' nintnam ja ta'qe' muqb'il kye qtzan nmane' ex b'ajniqe'ju' tjpel tu'n q'aq'? nchije' te.
4—¿Titi' b'a'n tu'n nb'inchanteye' teya? chiju' nimaqkawil tzaj tqani'n.
Kub'tzun nq'o'n wib'tze' toj tq'ob' Qman Dyos toj kya'j, 5xi'tzun ntzaq'we'ntze' te nimaqkawil ikjalu:
—Qa b'a'n toj twitza nimaqkawil, exqa matzaj q'aq'an tk'u'ja wi'je', a kxel nqani'nju'ye' teya tu'n nxitchq'o'na toj Juda toju' nintnam ja mqu'na'qe' qtzan nmane', tu'ntzun tjaw nb'incha'n jumajtle', nchije' te.
6Tzajtzun ttzaq'we'n nimaqkawil weye' tuk'i'lu' t-xu'jil q'uqloktoq tk'etz:
—¿Jte'tzunlo q'iju' tb'eya?
¿Jtojtzunlo tz'anjtzti'ja? chij.
Xinma'ne' tajlal xjaw te, ex kub' toj twitz tu'n nxi'ye'. 7Expe' xinma'ne' te, qa b'a'ntoq toj twitz, tu'n ttzaj ttz'ib'a'n jun u'j kyeju' kawil toj tkub'exq'ij te nin a' Ewprates, tu'n wik'x kytzaqpi'ne' tzmax ajnpone' toj Juda; 8ex tu'n ttzaj ttz'ib'a'n juntl u'j te Asap, ju' xq'uqil tk'ul nimaqkawil, tu'n ttzaj tq'o'n tze weye' tu'n kyb'inchetl tjpelju' nintnam jata' tja Dyos, ex tjpelu' nintapi ti'ju' nintnam ex tjpelju' ja jatu'n nnajana'ye'. Ex tzaj tq'o'n nimaqkawil tkyaqil weye' qu'n o'ni'nqintoqe' tu'n Qman Dyos nchin k'ulune' te.
9Tetzunj npone' kywitzju' kawil toj tkub'exq'ij teju' a' Ewprates, b'ajx nq'o'nju'ye' u'j e'tzaj tq'o'n nimaqkawil kye, expe' e'tzaj tchq'o'n nimaqkawil jun tnej xjal te q'oj ti'j chej wuk'i'le' toj kychaq'b'il nejenel kye xjal te q'oj. 10Ate'toqtzun kab'e' ichan, aju' jun Sanb'alat tb'i aj Oron, atzu'n juntl Tob'iy tb'i, aj Amon nim toklen toju' kawb'il, tzaj kytx'u'jil b'a'nxi'x tej kyb'inte qa matxi'toq pon jun ati tb'is tk'u'j onilkye aj Israel.
Aq'untl tu'n tjaw b'inchet Jumajtlu' nintapi
11In pontzune' toj Jerusalen. Tojtzun toxi'n q'ij npomlene', 12injawe'ye' te qonik'an, k'le'nqe' junjun xjal wu'ne', ex mixti'xte xinma'ne' kye titi' matxi'toq tzaj t-xewsa'n Dyos weye' tu'n nb'inchanteye' ti'j Jerusalen. Mixti' juntl chej xi'wiq'i'ne', o'kxju' iqalweye'. 13Tojxu' qonik'an lu netze' ttziju' tjpel tnam te b'ya', tu'me'lju' t-xiklil a' wakxkan tb'i ex toju' tjpel te xob'l tz'is, b'aj nka'yi'ne' nintapi ti'j Jerusalen, kub'ni xitj ex b'ajni tz'e'yju' tjpel. 14Xi'tzun nljo'n nb'etze' tu'me'lju' tjpel te t-xiklil a' exju' tpil nimaqkawil; naqtzun a mixti' b'ent tik'xju' ncheje' atzu'. 15Qonik'anxtoq, njaxe' ttziyileju' a', tb'ajlenxi'tzun nka'yi'ne' nintapi, anjtz wi'je', noktze' toju' tjpel tu'me'l b'ya'.
16Mixtoqti' b'i'n kyu'nju' kawil jamatxi'toq chin tx'anja'ye', ex titi' matxitoq chin tx'anje' b'inchalte. Ex na'mxtoq t-xinma'n tpakb'ale' kye aj Juda, aye' pale, e'nimaq kyoklen, e'kawil ex txqantl xjal atitoq tu'n kyten toju' aq'untl. 17Xinma'ntzuntze' kye:
—B'i'n kye'kyu'n qa ch'uẍxi'x to'qo', qu'n kub'ni xitju' Jerusalen ex b'ajniqe' tz'e'yju' tjpel. Kymujb'am kyib'e' wuk'i'le' ex qb'incha'nktz jumajtlju' nintapi ti'j Jerusalen, tu'ntzun lan qo oktl te xmayb'il, nchije' kye.
18Tetzunj txi' nchik'b'a'ne' tu'me'l tb'anilxi'x matxitoq tz'onina' Dyos wi'je' kye, exqe' tyolu' nimaqkawil ojetoq tzaj tma'n weye', tzaj kytzaq'we'n:
—¡Qtzyu'kna' tu'n tjaw qb'incha'n jumajtl! chechij.
Ex inxi'xtoq che tzalaj, b'aj kyq'uqb'a'n kyk'u'j kyxolilex. 19Tetzunj kyb'inte Sanb'alat, Tob'iy ex Kyesem aj Arab'ya, e'xmayin qi'je' ex tzaj kyma'n qeye' tuk'i'l ik'jtib'il:
—¿Titi' nkyb'icha'ne'? ¿Ma kyajb'ile' tu'n tjaw kyiq'inkyib'e' ti'ju' nimaqkawil? chechij.
20Xi'tzun ntzaq'we'ne' kye:
—Ate Qman Dyos toj kya'j k'onilqeye'. Tmajin qo'ye', k'okyel qtzyu'ne' tu'n tjaw qb'incha'n jumajtle', aye'tzunkye' myana' aj Israel qe'kye', mixti'kye' kyoklen tu'n kykawine' toju' nintnam lu ex myaye' junkye' ate'qe' toju' tqanil qtaname', nchije' kye.
Currently Selected:
Neh 2: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999