Neh 4
4
Kyxmayb'il ajq'oj
1Tej tb'inte Sanb'alat qa intoq jaw qb'incha'ntlju'ye' nintapi ti'jileju' nintnam, tzaj tq'oj, aq'witzuntz tuk'i'l ttx'u'jil xmayil kyi'ju' aj Juda 2xitma'n kyeju' tuk'i'l ex kyeju' xjal te q'oj toj Samarya: ¿Titi' kyximu' ajwe'yaj aj Juda? ¿Ma ktzunlo kxe'lq'o'ntl anb'il kye tu'n kyq'ontl chojb'il toj kywitz? ¿Mujqa kjapumel b'aju' kyaq'un toj jun q'ijx toj kywitz? ¿Mujqa nkyxima'n qa che b'entelju' ab'j b'ajniqe' tz'e'y toju' txqan twab'e'n q'aq' ch'uqu'j te tb'anil ab'j kyu'n? chij.
3Atitoqtzun Tob'iy aj Amon tk'etz, ex axjunte q'mante: Naqpena' jun saqb'in jaku' tzaj tx'uyinte nintapi njaw kyb'incha'n qama jax tib'aj, chij.
Tna'j Dyos Neemiy
4In na'ntzun Dyose' ikjalu: Nman Dyos: b'intza nxi'x che xmayin xjal qi'je'. B'inchama tu'n tokmiltz'uju' taq'wix nkyma'n qi'je' kyib'ajx, ex tu'n tkub'kyij kyu'n kyajq'oj ex tu'n kyxi' iq'i'n toj yajb'il toju' jni'tl tx'otx'. 5Lalun kub' tnajsa'na kyil, ex lalun tzik'tna'lju kyil tu'na, qu'n matxi' che yolin myab'a'n kyi'ju' nche jaw b'inchantetlju' nintapi, nchije' toj nna'j Dyose'.
Xob'tzb'il kyu'n ajq'oj
6Xi'tzun qljo'ne' tu'n tjaw b'inchetju' nintapi, matxi'toq jawlq'e toj nik'jan. Intoq che aq'unankye' xjal tuk'i'l tzalajb'il. 7Atzu'n tej kyb'inte Sanb'alat, Tob'iy, aj Arab'ya, aj Amon exqe' aj Asdod, qa ljo'ntoq t-xi'lq'e tu'n tb'aj b'inchetlu' nintapi ti'jile Jerusalen, exqa matxi'toq tzyet kyjpetu' b'o's b'e, tzaj kytx'u'jil b'a'nxi'x. 8Kykyaqiltzun junx b'aj kyb'incha'n jun nuk'jtib'il tu'n kyok tzaqpaj q'ojil ti'j Jerusalen tu'n tb'aj kyxitu'n. 9Ona'ntzun Dyostze', ex e'kub' qq'o'ne' xq'uqil te q'ijtl ex qonik'an te klol qeye'. 10Kymatzunju' xjal aj Juda: Mache kub' siktiju' iqal tu'n tpaj nimxi'x txqan ttx'anqa'n ab'j, ex lay b'ent tu'n tb'aj qb'incha'ntle' nintapi lu, chechij.
11Chechiloju' qajq'oje qa laytoq qb'iye' tpakb'alil exqa laytoq che qile' ajkyoktz b'yolqeye' ex tu'n tkyaj tzaqpaju' aq'untl. 12Tetzunj ljo'ntoq kyulu' aj Juda najliqe' nqayin kyk'etz q'malte qeye' qatoq che okyel tzaqpaju' xjal lu q'ojil qi'je' toj tkyaqil plaj, 13nchaq'e' tu'n kykub' tenju' xjal teyile junjun jatu'n kyxq'uqin ti'jxi'ju' nintapi ex toju' jachaq kub'ni lq'e ex ja ta'chaq b'o's b'e, tuk'i'l kyk'uẍtx'e'nb'il, e' kych'ut ex kysmaj. 14Tetzunj wlonteye' qa intoq che xob', nkub' weye' ex xinma'ne' kyeju' nimaqxjal, kyeju' kawil ex kye txqantl xjal teju' tnam: Lalun che xob'e' kye, kyna'ntze' qa nim te Qman Dyos tipumal ex xob'ajilx, ex che kuwan qeye' tu'n kykletju' txqantl kywnaqile', e'kyk'wale' ex kmyale', e' kxu'jile' ex kyjaye', nchije' kye.
15Tetzunj kyb'inteju' qajq'oje qa nk'u'ntltoq qib'e' ex matxitoq kub' t-xitu'n Qman Dyosju' nk'u'ntl ti'j kyu'n, qkyaqilxe' anjqi'je' tk'etzju' nintapi, teyile junjun xi' toju' taq'un. 16Tzajxtzuntz teju' kmoj lu, nik'janju' nxjale' nche aq'unan toju' aq'untl, atzu'n nik'jantl b'incha'n kyib' iq'i'n kyq'ojb'il, kych'ut, kykolb'il, kysmaj ex kolb'ilkyi'j. Kyaq'kyib'ju' nejenel tu'n kyonin kyi'ju' xjal aj Juda 17ju' intoq jaw kyb'incha'ntlju' nintapi. Xikyljo'nju' iqal tu'n kyiqan iqtz, nche aq'unan tuk'i'l jun kyq'ob' ex tzyu'n kyq'ojb'il tu'n juntl kyq'ob'. 18Kykyaqilju' inche aq'unan tu'n tjaw b'inchetlu' tapi majx k'lo'mile kyk'uẍtx'e'nb'il kyk'u'j, ex atiju' q'ajtzalte chun ntx'u'ke', 19qu'n ojetoq txinma'ne' kyeju' nimaqxjal ex kyeju' kawil ex, kyeju' txqantl xjal teju' tnam: nimaqxi'xju' aq'untl ex nimaqkyqan, ex aq'pu'mile qib' ti'ju' nintapi, najchaqchaq kyxol junjun. 20Qu'mtzun, kyb'u'yim kyib'e' qk'etze' ja matxa' kyb'ine' chun, k'onilte Qman Dyos quk'i'l toju' q'oj, nchije' kye.
21Ikytzu'n, nqo aq'unanxi'ye', njawu'l q'ij ex nex q'ij qu'ne' toju' aq'untl. Nik'janju' xjal majx tzyu'nile kych'ut. 22Expe' xinma'ntle' kyeju' xjal, toju' tq'ijlalil lu qa kykyaqilx kyuk'i'lxi'ju' onil, ati tu'n kykyajten qonik'an tojxi' Jerusalen, tu'ntzun kyxq'uqin qi'je' te qonik'an ex tu'n kyaq'unan te q'ijtl. 23Expe' mixti'x inel qiq'i'ne' qi'je', ayine', exqe' nwitze'le' exqe' onil, exqe' xq'uqil nche b'et wuk'i'le', teyile junjun tzyu'nile tch'ut.
Currently Selected:
Neh 4: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999