JOSUE 22
22
BUKAERA (22,1—24,33)
Ekialdeko leinuak etxera itzuli
1Josuek Ruben eta Gaden leinuetakoei eta Manasesen leinu erdikoei dei egin 2eta esan zien: «Bete duzue Moisesek, Jaunaren zerbitzariak, agindu zizuen guztia eta egin duzue nire esana agindu dizuedan gauza guztietan. 3Urte luze hauetan ez dituzue zeuen herritarrak bakarrik utzi, Jaunaren, zeuen Jainkoaren, agindua arretaz betez. 4Orain, Jaunak, zuen Jainkoak, berak hitzeman bezala, zuen herritarrei atsedena eman dielarik, joan zaitezkete zeuen etxera, Moisesek, Jaunaren zerbitzariak, Jordanen ekialdean jabetzan eman zizuen herrialdera.#joan etxera 1,15. 5Baina saia zaitezte Moisesek —Jaunaren, zeuen Jainkoaren, zerbitzariak— emandako aginduak eta legea sutsu betetzen: maita ezazue Jauna, zeuen Jainkoa, ibili berak erakutsitako bidean, bete aginduak, bizi berari atxikiak eta zerbitza ezazue bihotz-bihotzez eta gogo osoz».#saiatu aginduak betetzen Dt 5,1+. Jauna maitatu Dt 6,5+. bizi berari atxikiak Dt 10,20+. bihotz-bihotzez Dt 4,29+.
6Josuek bedeinkatu eta bidali egin zituen, eta haiek beren etxera itzuli ziren.
7Manasesen leinu erdi bati Moisesek lurraldea emana zion Baxanen; beste leinu erdiari, berriz, Jordanen mendebaldean eman zion Josuek lurraldea, gainerako israeldarren artean. Jordanen ekialdean bizi ziren Manasesen leinu erdikoei, etxera bidaltzeko bedeinkatu zituenean, 8esan zien Josuek: «Aberastasun handiak harturik zoazte etxera: abere-talde ugari, zilarra eta urrea, brontzea, burdina eta janzki asko. Bana itzazue senideen artean etsaiei kendutako harrapakinok».#etsaiei kendutako harrapakinak Ik. Ir 3,22+.
Aldarea eraiki Jordan ibaiertzean
9Ruben eta Gaden leinuetakoak eta Manasesen leinu erdikoak, gainerako israeldarrak Xilon, Kanaan lurraldean, utzirik, Galaaderantz, Jaunaren aginduz Moisesek jabetzan eman zien lurralderantz, abiatu ziren. 10Jordan ingurura#22,10 Jordan ingurura: Edo Jordango Gelilotera, inguru itzulitako hitza izen propiotzat hartuz gero (ik. 18,17). heldu zirenean, artean Kanaanen zirela, aldare handi eta ikusgarria eraiki zuten.
11Jakinarazi zieten israeldarrei Ruben eta Gaden leinuetako eta Manasesen leinu erdiko gizonek aldarea#22,11 aldarea: Xilon (ik. 9 tx.) zegoen elkarte osoaren aldarearen kontrakotzat hartu zuten, jarraian ikus daitekeenez. eraiki zutela Jordan ibai inguruan, Kanaanen aurrez aurre, israeldar lurraldeaz beste aldera; 12eta israeldar elkarte osoa bildu zuten Xilon, leinu haiei erasotzeko asmoz. 13Aurrez, ordea, Pinhas, Eleazar apaizaren semea, bidali zieten Galaadera,#Pinhas 24,33; Ir 6,25; Zen 25,7-13; Ep 20,28. 14herriko hamar ordezkari lagun zituela, israeldar leinu bakoitzeko bat. Ordezkari haiek senitarteburu ziren Israelgo leinuetan. 15Ruben eta Gaden leinuetako eta Manasesen leinu erdiko gizonengana, Galaadera, heldu zirenean, esan zieten: 16«Jaunaren elkarte osoaren izenean diotsuegu: Zer da Israelen Jainkoaren kontra egin duzuen desleialkeria hori? Jaunarengandik aldendu zarete gaur: aldare hori zeuentzat eraikiz, Jaunaren kontra errebelatu zarete.#Jainkoaren kontrako desleialkeria Ik. Lb 17,8-9; Dt 12,4-16. 17Ez al genuen aski Peor-ko bekatuaz? Oraindik ere bekatu haren ondorioak jasaten ari gara, Jaunaren elkarteak izurria jasan behar izan zuen arren.#Peorko bekatua Zen 25,1-9; Dt 4,3. 18Eta zuek Jaunarengandik aldentzen zarete gaur! Zuek gaur beraren kontra errebelatzeagatik, Jauna bihar haserretu egingo da Israel herri osoarekin.#Jauna haserretu 7,1.11-12; Zen 16,22. 19Zuen jabetza den lurraldea kutsatua#22,19 lurraldea kutsatua: Baal Peorko bekatuaren ondorioz (ik. 17. tx.) Jordan ibaiaz ekialdeko lurraldea kutsatutzat jotzen dute. dagoela eta Jaunaren kulturako desegokia dela iruditzen bazaizue, zatozte Jaunaren jabetza den herrialdera, han baitu Jaunak bere bizilekua, eta jar zaitezte gure artean bizitzen. Baina ez zaitezte Jaunaren kontra eta gure kontra jarri, Jaunaren, gure Jainkoaren, aldareaz gainera beste bat zeuentzat eraikiz.#han du Jaunak bizilekua Ir 25,8.22; Lb 15,31+. 20Gogora ezazue Akan, Zerahen semea. Ez zuen leial jokatu, Jerikon dena suntsitzeko agindua hautsi zuelako, eta Israel herri osoak jasan behar izan zuen Jaunaren haserrea, erruduna bera bakarrik izan arren».#Akanen desleialkeria 7,1-26.
21Ruben eta Gaden leinuetako eta Manasesen leinu erdiko gizonek erantzun zieten Israelgo senitarteburuei: 22«Ongi daki Jaunak, jainkoen Jainkoak, eta jakin beza Israelek ere! Jaunak, berarekiko desleial izan bagara eta beraren kontra errebelatu, zigor gaitzala oraintxe bertan!#Jauna, jainkoen Jainkoa Dt 10,17+; Sal 50,1. 23Aldare hau Jaunarengandik aldentzeko, berorren gainean erre-opariak#22,23 erre-opariak: Israelgo santutegi bakarrean baizik ez zitezkeen sakrifizioak eskain., labore-opariak edota elkartasun-opariak eskaintzeko eraiki baldin badugu, eska biezazkigu kontuak!#aldare bakarra opariak eskaintzeko Lb 1,3; 3,2. 24Ez, ez dugu horretarako egin, kezkaturik gaudelako baizik, zuen ondorengoek gureei egunen batean hau esango ote dieten: “Ba al duzue zerikusirik Jaunarekin, Israelen Jainkoarekin? 25Zuen —Ruben eta Gaden ondorengoen— eta gure artean Jordan ibaia ipini zuen Jaunak mugatzat. Zuek ez duzue, beraz, zerikusirik Jaunarekin!” Horrela, zuen seme-alabek eragotzi egingo liekete gureei Jaunari gurtza ematea. 26Horregatik bururatu zaigu aldarea eraikitzea; ez, ordea, erre-opariak eta sakrifizioak eskaintzeko, 27gure eta zuen artean eta gure ondorengo belaunaldien artean ezaugarri izateko baizik; hau da, beraren tenpluan geure erre-opari eta elkartasun-opariak eskainiz Jaunari kultu eman nahi diogula adierazteko ezaugarri. Horrela, zuen seme-alabek ezin esango diete gureei Jaunarekin zerikusirik ez dutela.#ezaugarri Has 31,48; Is 19,19-20. 28Bihar edo etzi, guri nahiz gure ondorengoei horrelakorik esango baligute, guk erantzun ahal izango genuke: “Begira gure gurasoek Jaunari eraiki zioten aldarearen egiturari; ez da erre-opariak eta sakrifizioak eskaintzeko, gure eta zuen artean ezaugarri izateko baizik”. 29Ez dugu inola ere Jaunaren kontra errebelatu nahi izan, ez Jaunarengandik aldendu, ezta Jaunaren, gure Jainkoaren, egoitza aurrean dagoen aldareaz gainera, erre-opariak, labore-opariak eta gainerako sakrifizioak eskaintzeko beste bat eraiki ere».#Jaunaren egoitza aurreko aldarea Dt 12,5-14.
30Pinhas apaizak eta elkartearen ordezkariek —israeldar leinuetako hamar senitarteburuek— ontzat eman zuten Ruben, Gad eta Manasesen leinuetako gizonek emandako argibidea. 31Pinhasek, Eleazar apaizaren semeak, esan zien: «Orain badakigu Jauna geurekin dugula, ez baituzue beraren kontra horrelako desleialkeriarik egin. Horrela, Israel osoa libratu duzue Jaunaren zigorretik».
32Ruben eta Gaden leinuetako gizonak utzirik, Pinhas, Eleazar apaizaren semea, eta herri-ordezkariak Galaadetik Kanaanera itzuli ziren, mendebaldeko israeldarrengana, eta gertatuaren berri eman zieten. 33Israeldarrek ontzat eman zuten azalpena eta Jauna goretsi zuten. Ez zuten berriro aipatu ere egin Ruben eta Gaden leinuetakoei erasotzea eta haien herrialdea hondatzea.#Jauna goretsi 1 Kro 29,20. 34Ruben eta Gaden leinuetakoek «Ezaugarri» izena ezarri zioten aldareari, hau baitzioten: «Jauna Jainko denaren ezaugarri da gu guztiontzat».
Elizen Arteko Biblia (EAB) Biblia en Euskara, Traducción Interconfesional) Copyright © Sociedad Bíblica de España, 2008 Utilizada con permiso