رِسَالَةْ أَفَسُسْ 5
5
الْفَصْلْ الْخَامْسْ
عِيشُو فْالنُّورْ
1إِيوَا حِيتْ نْتُمَ وْلَادْ اللَّهْ الْعْزَازْ، دِيرُو بْحَالُه. 2وْعِيشُو فْالْمْحَبَّة، كِمَا بْغَانَا الْمَسِيحْ وْعْطَى حْيَاتُه عْلَى وْدّْنَا، تَقْدِمَة وْدْبِيحَة كَتْرْضِي اللَّهْ.
3وَلَكِنْ الْفْسَادْ وْݣَاعْ الْأُمُورْ الْمْنْجُوسَة وْالطّْمَعْ مَا خَاصّْكُمْشْ حْتَّى تْدْكْرُوهَا بِينَاتْكُمْ، حِيتْ هَادْشِّي مَا كَيْلِيقْشْ بْالْمُومْنِينْ الْمْقَدّْسِينْ. 4وْحْتَّى الْكْلَامْ الْخَايْبْ، وْالْكْلَامْ اللِّي مَا عَنْدُه مْعْنَى، وْالنُّكَتْ الْخَايْبِينْ، رَاهْ مَا كَيْلِيقُوشْ بِيكُمْ، وْفْعُوضْ هَادْشِّي خَاصّْكُمْ تْشَكْرُو اللَّهْ. 5حِيتْ رَاكُمْ كَتْعَرْفُو مْزْيَانْ بْلِّي الْفَاسْدْ، وْالْمْنْجُوسْ، وْالطّْمَّاعْ -حِيتْ الطّْمَعْ هُوَ الْعِبَادَة دْيَالْ الْأَصْنَامْ- مَا غَادِيشْ يْوَرْتُو فْالْمَمْلَكَة دْيَالْ الْمَسِيحْ وْاللَّهْ. 6مَا تْخَلِّيوْ حْتَّى وَاحْدْ يْخْدَعْكُمْ بْالْكْلَامْ الْبَاطْلْ، عْلَاحْقَّاشْ بْسْبَابْ هَادْ الْأُمُورْ كَيْنْزَلْ غَضَبْ اللَّهْ عْلَى النَّاسْ اللِّي مَا كَيْطِيعُوهْشْ. 7إِيوَا مَا تْكُونُوشْ مْشَارْكِينْ مْعَاهُمْ. 8حِيتْ كْنْتُو مْنْ قْبَلْ ضْلَامْ، وَلَكِنْ دَابَا رَاكُمْ نُورْ فْالرَّبّْ، إِيوَا عِيشُو بْحَالْ وْلَادْ النُّورْ، 9عْلَاحْقَّاشْ الْغْلَّة دْيَالْ النُّورْ هِيَ أَعْمَالْ الْخِيرْ وْالتَّقْوَى وْالْحَقّْ. 10مَيّْزُو الْأُمُورْ اللِّي كَتْرْضِي الرَّبّْ. 11وْمَا تْشَارْكُوشْ فْالْأَعْمَالْ دْيَالْ الضّْلَامْ اللِّي مَا كَتْعْطِي غْلَّة، وَلَكِنْ بْالْعَكْسْ خَاصّْكُمْ تْفَضْحُوهَا. 12حِيتْ الْأُمُورْ اللِّي كَيْدِيرُوهَا هَادْ النَّاسْ فْالسِّرْ، رَاهْ حْشُومَة حْتَّى بَاشْ نْتّْكَلّْمُو عْلِيهَا. 13وَلَكِنْ ݣَاعْ الْأُمُورْ اللِّي كَتّْفْضَحْ كَتْوَلِّي بَايْنَة فْالنُّورْ، 14حِيتْ كُلّْ مَا كَيْبَانْ رَاهْ هُوَ نُورْ. وْعْلِيهَا كَيْتّْݣَالْ:
«فِيقْ آ النَّاعْسْ،
وْنُوضْ مْنْ بِينْ الْمُوتَى،
وْالْمَسِيحْ غَيْضَوِّي عْلِيكْ».
15رْدُّو بَالْكُمْ مْزْيَانْ كِيفَاشْ كَتْعِيشُو، مَاشِي بْحَالْ اللِّي طَايْشِينْ، وَلَكِنْ بْحَالْ الْحُكَمَا. 16سْتَغْلُّو الْوَقْتْ فْكُلّْ حَاجَة مْزْيَانَة، عْلَاحْقَّاشْ لِيَّامْ خْيَابْتْ.#كولوسي 4:5 17وْعْلَى هَادْشِّي مَا تْكُونُوشْ بْلَا عْقَلْ، وَلَكِنْ فَهْمُو الْمُرَادْ دْيَالْ الرَّبّْ. 18وْمَا تْسَكْرُوشْ بْالْخْمَرْ حِيتْ كَيْتّْسَبّْبْ فْالْفْسَادْ، وَلَكِنْ تْعَمّْرُو بْالرُّوحْ الْقُدُسْ، 19وْنْتُمَ كَتّْكَلّْمُو مْعَ بْعْضِيَّاتْكُمْ بْالْمَزَامِيرْ وْالتَّرَانِيمْ وْالْأَغَانِي الرُّوحِيَّة، وْسَبّْحُو الرَّبّْ وْحْمْدُوهْ مْنْ كُلّْ قْلُوبْكُمْ.#كولوسي 3:16،17 20وْشْكْرُو اللَّهْ الْآبْ فْكُلّْ وَقْتْ وْعْلَى كُلّْشِي فْإِسْمْ رَبّْنَا يَسُوعْ الْمَسِيحْ.
الْعَلَاقَاتْ بِينْ الْعْيَالَاتْ وْرْجَالْهُمْ
21خْضْعُو لْبَعْضِيَّاتْكُمْ حِيتْ كَتْخَافُو الْمَسِيحْ. 22آ الْعْيَالَاتْ، خْضْعُو لْرْجَالْكُمْ كِمَا كَتْخَضْعُو لْلرَّبّْ.#كولوسي 3:18؛ 1بطرس 3:1 23عْلَاحْقَّاشْ الرَّاجْلْ هُوَ الرَّاسْ دْيَالْ الْمْرَاة، كِمَا الْمَسِيحْ حْتَّى هُوَ الرَّاسْ دْيَالْ الْكْنِيسَة، وْهُوَ الْمُنَجِّي دْيَالْ الدَّاتْ. 24وْكِمَا كَتْخْضَعْ الْكْنِيسَة لْلْمَسِيحْ، هَكَّا حْتَّى الْعْيَالَاتْ كَيْخَصّْ يْخَضْعُو لْرْجَالْهُمْ فْكُلّْشِي. 25آ الرّْجَالْ، بْغِيوْ عْيَالَاتْكُمْ كِمَا بْغَا الْمَسِيحْ حْتَّى هُوَ الْكْنِيسَة وْعْطَى حْيَاتُه عْلَى وْدّْهَا،#كولوسي 3:19؛ 1بطرس 3:7 26بَاشْ يْقَدّْسْهَا وْيْرَدّْهَا طَاهْرَة بْالْمَا وْبْالْكَلِمَة، 27وْبَاشْ يْقَدّْمْهَا لْرَاسُه كْنِيسَة زْوِينَة بْزَّافْ، مَا فِيهَا لَا وْسَخْ وَلَا تْكْمَاشْ وَلَا حْتَّى حَاجَة نَاقْصَة، وَلَكِنْ تْكُونْ مْقَدّْسَة وْبْلَا عِيبْ. 28وْهَكَّا كُلّْ رَاجْلْ وَاجْبْ عْلِيهْ يْبْغِي مْرَاتُه كِمَا كَيْبْغِي الدَّاتْ دْيَالُه. رَاهْ اللِّي كَيْبْغِي مْرَاتُه، كَيْبْغِي رَاسُه. 29حِيتْ عَمّْرْ شِي وَاحْدْ مَا كْرَهْ دَاتُه، وَلَكِنْ رَاهْ كَيْوَكّْلْهَا وْكَيْتّْهَلَّى فِيهَا، كِمَا كَيْدِيرْ حْتَّى الْمَسِيحْ مْعَ الْكْنِيسَة، 30عْلَاحْقَّاشْ حْنَا طْرَافْ فْالدَّاتْ دْيَالُه. 31«هَادْشِّي عْلَاشْ غَيْخَلِّي الرَّاجْلْ بَّاهْ وْمُّه وْغَيْتَّاحْدْ مْعَ مْرَاتُه، وْغَيْوَلِّيوْ بْجُوجْهُمْ دَاتْ وَحْدَة». 32هَادْ السِّرّْ رَاهْ كْبِيرْ، وَلَكِنْ أَنَا كَنْقْصَدْ بِيهْ الْمَسِيحْ وْالْكْنِيسَة. 33وَلَكِنْ نْتُمَ خَاصّْ كُلّْ وَاحْدْ فِيكُمْ يْبْغِي مْرَاتُه كِمَا كَيْبْغِي رَاسُه، وْالْمْرَاة خَاصّْهَا تْحْتَرْمْ رَاجْلْهَا.
Currently Selected:
رِسَالَةْ أَفَسُسْ 5: MSTD
Highlight
Share
Copy
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved