رِسَالَةْ أَفَسُسْ 6

الْفَصْلْ السَّادْسْ

الْعَلَاقَاتْ بِينْ الْوْلَادْ وْوَالِدِيهُمْ

1آ الْوْلَادْ، طِيعُو وَالِدِيكُمْ فْالرَّبّْ، حِيتْ هَادَا هُوَ الْحَقّْ.#كولوسي 3‏:20 2«تّْهَلَّى فْبَّاكْ وْمُّكْ» هِيَ الْوْصِيَّة اللّْوّْلَى اللِّي جَاتْ مْتْبُوعَة بْوَاحْدْ الْوَعْدْ، وْهُوَ: 3«بَاشْ تْكُونْ نَاجْحْ فْحْيَاتْكْ، وْيْطْوَالْ عَمْرَكْ عْلَى الْأَرْضْ». 4وْنْتُمَ آ الْوَالِدِينْ، مَا تْخَلِّيوْشْ وْلَادْكُمْ يْغَضْبُو، وَلَكِنْ رْبِّيوْهُمْ بْالتَّأْدِيبْ وْالتَّعْلِيمْ دْيَالْ الرَّبّْ.#كولوسي 3‏:21

الْعَلَاقَاتْ بِينْ الْعْبِيدْ وْسْيَادْهُمْ

5آ الْعْبِيدْ، طِيعُو سْيَادْكُمْ اللِّي فْالدّْنْيَا بْالْخُوفْ وْالْإِحْتِرَامْ، وْبْقَلْبْ صَادْقْ كِمَا كَتْطِيعُو الْمَسِيحْ،#كولوسي 3‏:22‏-25 6مَاشِي غِيرْ مْلِّي يْكُونُو مْرَاقْبِينْكُمْ بَاشْ تْرْضِيوْ النَّاسْ، وَلَكِنْ طِيعُو بْحَالْ عْبِيدْ الْمَسِيحْ اللِّي كَيْدِيرُو مُرَادْ اللَّهْ مْنْ قَلْبْهُمْ. 7خْدْمُو بْنِيَّة صَادْقَة بْحَالْ إِلَا كَتْخَدْمُو لْلرَّبّْ مَاشِي لْلنَّاسْ. 8وْرَاكُمْ عَارْفِينْ بْلِّي الرَّبّْ غَيْجَازِي كُلّْ وَاحْدْ، سْوَا كَانْ عَبْدْ وْلَا حُرّْ، عْلَى الْخْدْمَة الْمْزْيَانَة اللِّي كَيْدِيرْ. 9وْنْتُمَ آ الْسْيَادْ، دِيرُو بْحَالْ هَكَّا مْعَ عْبِيدْكُمْ. مَا تْهَدّْدُوهُمْشْ، وْعَرْفُو بْلِّي نْتُمَ وْالْعْبِيدْ دْيَالْكُمْ عَنْدْكُمْ سِيّْدْ وَاحْدْ فْالسّْمَا، وْرَاهْ مَا كَيْدِيرْشْ الْوْجْهِيَّاتْ.#كولوسي 4‏:1؛ كولوسي 3‏:25

الْمَسِيحِيِّينْ خَاصّْهُمْ يْحَارْبُو الشَّرّْ

10وْفْاللّْخْرْ كَنْݣُولْ لِيكُمْ آ خُوتِي، تْقُوَّاوْ فْالرَّبّْ وْفْالْقُدْرَة دْيَالُه الْقْوِيَّة. 11لْبْسُو السّْلَاحْ الْكَامْلْ اللِّي كَيْعْطِيهْ اللَّهْ لِيكُمْ، بَاشْ تْقَدْرُو تّْبْتُو ضْدّْ الْحِيلَاتْ دْيَالْ إِبْلِيسْ. 12حِيتْ الْحَرْبْ دْيَالْنَا مَاشِي مْعَ بْنَادْمْ اللِّي مْنْ لْحَمْ وْدْمّْ، وَلَكِنْ مْعَ الرُّؤَسَا وْالسُّلُطَاتْ وْالْحُكَّامْ الرُّوحِيِّينْ دْيَالْ هَادْ الزّْمَانْ الْمْضَلّْمْ، وْمْعَ الْأَرْوَاحْ دْيَالْ الشَّرّْ اللِّي فْالسّْمَا. 13عْلَى دَاكْشِّي هْزُّو سْلَاحْ اللَّهْ الْكَامْلْ بَاشْ تْقَدْرُو تْقَاوْمُو فْالنّْهَارْ اللِّي غَيْكُونْ فِيهْ الشَّرّْ، وْتْقَدْرُو تْبْقَاوْ تَابْتِينْ مْنْ بَعْدْمَا تْكَمّْلُو كُلّْشِي. 14إِيوَا وَجّْدُو رَاسْكُمْ وْتّْحَزّْمُو بْالْحَقّْ، وْلْبْسُو الضّْرَّاݣَة دْيَالْ التَّقْوَى. 15وْلْبْسُو فْرْجْلِيكُمْ الْغِيرَة عْلَى الْإِنْجِيلْ دْيَالْ الْهْنَا بَاشْ تْخَبّْرُو بِيهْ. 16وْدِيمَا هْزُّو تُرْسْ الْإِيمَانْ بَاشْ تْقَدْرُو تْطْفِيوْ ݣَاعْ نْبْلَاتْ الشِّيطَانْ اللِّي شَاعْلَة. 17لْبْسُو النّْجَا بْحَالْ الْكَاسْكْ اللِّي كَيْحْمِي الرَّاسْ، وْتّْسَلّْحُو بْسِيفْ الرُّوحْ اللِّي هُوَ كْلَامْ اللَّهْ. 18صْلِّيوْ فْكُلّْ وَقْتْ بْالرُّوحْ الْقُدُسْ فْݣَاعْ الصَّلَوَاتْ وْالدَّعَوَاتْ دْيَالْكُمْ، وْسَهْرُو وْدَاوْمُو عْلَى هَادْشِّي، وْصَلِّيوْ مْنْ جِهْةْ ݣَاعْ الْمُومْنِينْ الْمْقَدّْسِينْ، 19وْمْنْ جِهْتِي حْتَّى أَنَا، بَاشْ مْلِّي نْبْغِي نْتّْكَلّْمْ يْعْطِينِي اللَّهْ الْكْلَامْ مْنْ عَنْدُه وْبْكُلّْ تِقَة نْبَيّْنْ سِرّْ الْإِنْجِيلْ، 20اللِّي عْلَى وْدُّه أَنَا سَفِيرْ وَاخَّا مْشْدُودْ بْالسّْنَاسْلْ، إِيوَا صْلِّيوْ بَاشْ نْتّْكَلّْمْ عْلِيهْ بْلَا خُوفْ كِمَا وَاجْبْ عْلِيَّ.

السّْلَامْ

21 # كولوسي 4‏:7‏،8 رَانِي بْغِيتْكُمْ حْتَّى نْتُمَ تْعَرْفُو الْخْبَارْ دْيَالِي وْأَشْنُو كَنْدِيرْ، رَاهْ خُويَا الْعْزِيزْ تِيخِيكُسْ اللِّي أَمِينْ فْخْدَمْتُه لْلرَّبّْ غَيْخَبّْرْكُمْ بْكُلّْشِي.#الاعمال 20‏:4؛ 2تيموتاوس 4‏:12 22هَادْشِّي عْلَاشْ صِيفْطْتُه لِيكُمْ بَاشْ تْعَرْفُو خْبَارْنَا وْبَاشْ يْشَجّْعْكُمْ.

23اللَّهْ الْآبْ وْالرَّبّْ يَسُوعْ الْمَسِيحْ يْعْطِيوْ الْهْنَا، وْالْمْحَبَّة بْالْإِيمَانْ لْݣَاعْ الْخُوتْ. 24وْالنِّعْمَة تْكُونْ مْعَ ݣَاعْ هَادُوكْ اللِّي كَيْبْغِيوْ رَبّْنَا يَسُوعْ الْمَسِيحْ بْالْمْحَبَّة اللِّي مَا كَتّْبَدّْلْشْ.

Currently Selected:

رِسَالَةْ أَفَسُسْ 6: MSTD

Highlight

Copy

Compare