RUT 3
3
1Noomi kuno Rutta di ta'a: Goota vanu, nan min garag liyn ma ŋaana kagu kay tun-sukka. 2Wulini, Bowaz ma nak ka li lop hiɗi boy sa sunda valam kayni, namu mi sugolaynɗi su? Hay henjeta vaydita nam ka sir orgena hay sinena valamu. 3nak ma muz tuwag goyo, li urdin tagu, cuk sligara vag ma ŋaan tagu, tuɗag hay sinena valamu. Nak ma ɗek tuwag kiram jewɗi ta-ta nam ti'e ci'e tuwa. 4Hay li ma nam kalawa bur gaa'a, nak ma sar liyn ma nam buri hayamna goy ŋaa'a, bugol kayni nak ma tuɗ bur gaa kuɗ sligar ma baray gayamna. Nala nam ma dag kay va ma nak ma lumna. 5Rut hota' dita: Slen ma nak dan kalam kafna nan ma lumu.
6Na' kalay ta-ta hay sinena, nala na' li ki kuno'ta ɗeka' nala. 7Bowaz ti'e ci kaw, dikam muɗ firiya. Nam kalay bur goy gal orgena ma molayna. Rut co ŋal yilaŋ', na' yaw vun sligar kulo'o, bur gaa gayamu. 8Hay henjet ŋolda, san kayni muɗ ɦuyum', nam muɗ bugolom kayni cat ka buri gaa gayam waŋ. 9Nam joba'a: Nak ti gige? Na' hotom dita: Nanu ti gorvota vaŋ Rut, gaŋ vun sligara vaŋay goy kanu, kay naŋu mi ma yaw vocota. 10Nam di ta'a: Goota vanu, Ma-vatɗina gag bolo, lita vag na'ta kuɗ gatta kayni na' suw ta jewta lo, kay nak may gar sa joriyonɗi, nak may gar sa farayna hiɗi sa hawnɗi kaw. 11Wulin kayni, goota vanu, lak narɗi, slen ma nak dan kalam kafna nan ma lumu, jufayn kaf sa ɗiger-lawta hay Hoyok-ziyna wi ala nak ti cat ta gasiya. 12May gasiya, nan sa ma yaw vocota, may sa mara ka'a, nam goboy (tag) suwan nanu. 13Burag mag tan waŋ ta-ta goy grawta, la a nam muɗ voco na'ta, nam ma muɗa'a, may la nam min muɗa'ɗi, may la kiram ŋaa'a kay muɗagɗi, nanu nan min muɗagu, Ma-vatɗin ka iriya, burag gaa waŋ' ta-ta goy grawta.
14Na' buri gaa gayamu ta-ta goy grawta. Na' fokay kifit-kifit hay li ma sa wi saɗi. Bowaz varay kayn ala sumun ma wi ala cat kayni buray goy hay liyn ma to orgenaɗi. 15Bowaz di tam Rut: Sligara vag ma cuki kagŋa vanti vunamay goyo, nam ŋa orgena ir dutta-kusta karkiya, nam slum kulo ka'a, bugol kayni na' kalay hay hoyok-ziyna.
16Rut hotay kat kuno'ta. Kuno'ta joba'a: Goota vanu, litige? Rut da' sle ma Bowaz lum ta'na kafe. 17Rut di tam kuna'ta: Nam vulan orgena ir dutta-kusta karkiya, nam di tan ala nak ma hot tam kunokga hiɗi ɓak ɦawaɗi. 18Noomi di ta'a: Goota vanu, kag na dam', ta-ta nak ma wi yam lawt ma dabna. Kay la lawt kayni dira' bay gi goy kay san kayni, nam as fi tun sukɗi.
Currently Selected:
RUT 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001