RUT 4
4
Bowaz sli Rut
1Bowaz kal hay vun-galana, nam musi gaa'a. Ɗuw na kayni sa ma muɗ vocota ma Bowaz di kalamna ka cap hay hagata. Bowaz (yumu) dumu: Naŋaya, musaŋ gaa tani, naŋ vane. Nam co'o, mus gaa'a. 2Bowaz yi sum sa maariyana vi hoyok-ziyna ay doogo lo: Nam di tisiya: Lakgi gaa tani. Nisi lakay gaa'a may. 3Bugol kayni nam di tam sa ma as muɗ vocota: Noomi ta may goy hay nagata Mowab pata, na' min gus sinena vi Elimelek ma goor-buyn goyo. 4Kay na'ta nan min daŋ labar kayni kay naŋ ma hum goy jewe, naŋ ma muɗ sine namna vok ir sa ŋulona sa hay jafna vayn lakŋi, la naŋ min muɗumu, muɗaŋga. La naŋ asɗi, danu kay nan min wi'e. Kay sa mara'a ma as yaw vocota jewaŋ naŋ mayɗi. Nanu nan bugolaŋu. Nam di'e: Nan min muɗumu. 5Bowaz di'e: Hay buur ma naŋ muɗ sinen hay ɓam Noomi ɗawni, Rut ta Mowabta cata vi ma mitina naŋ ma va'a kaw, kay sli semda vi sa ma mitin kulo hay baŋala'a. 6Sa ma yaw vocota di'e: Nan as muɗum ir vanɗi, kay nan min ɓulak vocota vanɗi, vocota ta nan as kay muɗa'ta naŋ ma muɗa' ir vaŋu, kay nan as kay muɗa'ɗi.
7Jew ɓa-ɓa hay Israyel kayni, kay ɗek ala lawta coliya, la lawta vi gusta lebo mu'da vi slena, san as pat tuguruna valam goyo, vulum mi hena, kayni ɗek di-goyta hay Israyel.#4:7 Ɗuwgi kayni hay Gsm 25:7. 8Nam ma as muɗ vocota di tam Bowaz: Gusaŋgi ir maŋu, nam pat tuguruna valam goyo.
9Ki kayn nala Bowaz di tam sa maariyana hiɗi sumun kaf, vaydi nigi waawa hiɗi irgi ala slena vi Elimelek, Kiliyon hiɗi Makiliyon nan gusumawa hay ɓam Noomi kafe, 10Rut ta Mowabta, cata vi Makiliyon nan gusa'awa, kay na' ma muɗ ti cata vanu, kay nan min sli semda vi sa ma mitina kulo hay baŋala'a, kay vocota valamu ma ɦas goyɗi. Kay semda vi sa ma mitina ma sehis goyo jar ɓosiyomna hay Hoyok-ziynɗi kaw. Nigi kaf ka wi hiɗi irgi vaydi. 11Sum sa tokay hay vun-galana hiɗi sa maariyan kaf di'e: Numa waawa hiɗi irma'a. Cata ta min kalay vo vaŋga ɗawni Ma-vatɗina muɗa' ki Leya hiɗi Rakel nala, nisi ma' pet si sumay jafna vi Israyel. Hina' muɗ ti ta ŋolda hay Efrata, hina' fi semda hay Betlehem. 12Jafna ma Ma-vatɗin min vulaŋga hiɗi cat-goota na'ta ɗawni, hinim muɗ ziyna vaŋu ŋray ca ki ziyna vi Peres ma Tamar vuɗum mi Yudana nala.
13Bowaz sli Rut, na' muɗi cata valamu, nam kalay bur ta'a. Ma-vatɗina mala' hagata kay na' ma sli haya, nala na' vuɗ goor ma juf kep. 14Boyna di tam Noomi: Suburta tam Ma-vatɗina ma vulag sa ma yaw vocota vaydi, sa namna semda valam ma tiy ŋolo hay Israyel. 15Nam hotagiyawa iriya, teŋag iragawa hay maarta vagu. Kay kunokga ta minakga vuɗum ti na'a. Na' ŋaa'a kagu suw guro-jufayn siɗiya. 16Noomi sli goora burum hay ɓala'a, na' muɗi ti ta wulumta. 17Boy sa goboy hiɗi na'na tun sem goora nisi di'e: Goor vuɗawa mi Noomi. Nisi tunum selem ala Obed. Namu mi bum Isay, Bum David.
18Kayni mi jafna vi Peres: Peres vuɗ Hesron.
19Hesron vuɗ Ram; Ram vuɗ Aminadab; 20Aminadab vuɗ Nahson, Nahson vuɗ Salma; 21Salmon vuɗ Bowaz; Bowaz vuɗ Obed; 22Obed vuɗ Isay; Isay vuɗ David.
Currently Selected:
RUT 4: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001