RUT 2
2
Rut tuɗ var ɦelena hay sinena vi Bowaz
1Hay na'ta juf Noomi sugolom mara ka'a, sa namna mi sa ma dono'o, faray kaw hay jafna vi Elimelek, semda valamu ala Bowaz.
2Rut ta Mowabta di tam Noomi: Nan min tuɗ goy sine'e kay gar ɦelena kuɗ san gigekaw ma nan fi slugotawa vok iramu. Noomi di ta'a: Tuɗagu goota vanu.
3Na' kaliya, na' co gar ɦelena hay sinena mara kepe bugol sa feɗna. Dolay kayni sine ma na' ka gar ɦelen hayna mi sinena vi Bowaz ma hay jafna vi Elimelekŋa. 4Ɗuw na kayni Bowaz coy goy hay Betlehem pa, nam di tam sa feɗna: Ma-vatɗina li hiɗi nigiya. Nisi hotom dita: Naŋ kaw Ma-vatɗina ma gaŋ bolo. 5Bowaz di tam sa ma sunda valamu ma ka ŋom sum sa feɗna: Cat-goot zawni ti cata vi gige? 6Sa ma ŋom sum sa feɗna dumu: Kayni ti goota Mowabta ta tapay kuɗ Noomi hay li ma na' hotay hay nagata Mowab pa. 7Na' di tuma ala: Hinan tuɗ kuɗ sa feɗna kay vilek ɦele ma hini hay baŋal muɗakŋa. Hay li ma na' co tani grawn pa, na' ka kulo kay se'a ta-ta wulini, na' kal kalaf hay ziyd kay tun suka' kayni ir neeɗa ɦawa.
8Bowaz di tam Rut: Humag ŋaa'a goota vanu, nak ma tuɗ vilek ɦelena hay sinena vi sa maraɗi, nak ma tuɗ goy gine hiɗi sen tanɗi. Tapag tuwag hiɗi boy sa sunda vanu. 9Nak ma cuk irag kay sine ma nisi ka feɗemna, nak ma tuɗ bugolsiya, nan vul hagata kay sa joriyona ma tamagɗi; hay li ma laat vagawa, niy ma sum sa joriyon gomina ka hay genda, nak ma tuɗ ci'e. 10Rut gi tuwa' gaa vokomu, na' girif gaa kay nagata. Na' dumu: Nan ta sa wan noŋɗit zawni naŋ lan sle ma sleɗan hayan nala kay mige? 11Bowaz hot di ta'a: Nan humi goy haraŋ kagu kay lopna ma nak li tam kunakga bugol mitta vi jufagu. Nak hin bugu hiɗi sugu hiɗi nagata ta nak vuɗi haya'ta kaw, nak maawa tam sum sa nak wisi jewɗi. 12Hin Ma-vatɗina lag ŋaata kuɗ va ma nak lumna, Ma-vatɗina Lawna vi Israyel vulag ŋaata, nam sulura' goy kaw, kay nak coowa kay ŋay tuwag gaa kuɗ gilaŋatamu. 13Rut di'e: Nan fi slugotawa vok iraŋu mulanna, naŋ teŋan iranawa, naŋ sleɗ dik ta sunda vaŋawa, nir na'ta kep nan may ŋray hiɗi boy sa sunda vaŋ noŋɗi.
14Hay li ma nisi ka ti'e: Bowaz di tam Rut: ɦurakay goboyo, jutag hambulla, dom hay vin ma zlayna, na; mus gaa tam sa feɗna, Bowaz vula' orge ma hawayna, na' mutumu, hobay kaw, na' ŋomom diram ma hinna. 15Bugol kayni na' fokay kulo'o kay vilek ɦelena lo. Bowaz di tam sa li lopna valamu: Hina' vilek jar muɗakŋa kaw, baya'ɗi. 16Nigi ma cuka' yam wan gaa kep kep kaw kay na' ma vilekemu, nigi may lawa'ɗi.
17Na' vilek ɦelena hay sinena ta-ta hay vulatita. Na' hot to alkamarena ma na' vilekemayna, nam as hob sakka vi orgena kepe. 18Na' slumiya, maram hay hoyok-ziyna, vulum kir kuno'ta. Caw wan (ma hawayna) ma hin ka'na na' butum goyo kaw, vulum mi kuno'ta. 19Kuno'ta joba'a: Nak gar ɦelen ay vaydi arige? Nak li lopnay vaydi arige? San ma tun ŋalda valam kagŋa Lawn gum bolo. Na' vi labar ma li'ay ta'na mi kuno'ta, bugolda na' di ta'a: Sa ma nan li lop ay kuɗumna yum ala Bowaz. 20Noomi di ta'a: Ma-Vatɗina ma li ŋaata tam sa ma irina hiɗi sa mitina kaw gum bol gi ge. San namna kayni goboy hay jafna vaya, namu jar nisi sa yaw vocota vayna. 21Rut ta Mowabta hot di'e: Nam dan lo ala nan ma tap tuwan hiɗi sa sunda valamu ta-ta lopna vi feɗna valam vat goyo. 22Noomi di tam kuno'ta Rut: Nam kayni mi sa ma ŋaa'a goota vanu: Nak ma tap kuɗ sa sunda valamu, tun seg goy hay sine vi sa maraɗi.
23Ki kayn nala Rut ka li lopna hiɗi sa sunda vi Bowaz kay vilek helena ta-ta nisi vat feɗna vi orgena hiɗi alkamarena. Na' ka musi kayni hiɗi kuno'ta may.
Currently Selected:
RUT 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001