ROMENA 12

GATTA KAY LI LOP HIƊI NAA'A

Irita wulita hay Kristu

Efes 4:1-16; 1 Kor 12:12-27

1Ɓosiyonna, nan siɗawgiya hiɗi slugota vi Lawna, a nigi ma ɗek tuwgi goyo ki ɗifinna ma irina, ma peldetna, ma kir Lawna ŋaana nala, kayni mi lopna vigiya kuɗ ŋusta tam Lawna. 2Nigi ma ligi tuwgi ŋray hiɗi sa nagatnaɗi, may nigi ma muɗa kuɗ mu'da wulita vi varta vigiya, kay nigi fi wi minda vi Lawna, va ma ŋaana, ma kiram jifiya, ma pasiyakŋa.

3Kay kuɗ slugota ta vuli manu, nan min di tam gige jargi kaf a nam ma niŋa niŋata ta suwtaɗi, ta calay goytaɗi kaw, may nam ma var ŋali, poy ŋali kaw kuɗ vun ɓurawta vi vida ta Lawn vul tam sana sana. 4Kay ki ɓetna ŋolo ka tam tuw kepe, may ɓetna kaf lopna valam kepɗi. 5Nala kaw, nay sa ka hiɗi ɓetna ŋolo, nay tapay kep hay hay tuw ma kepna hay Kristu, nay kaf mi ɓetna vi tuway jar-tuwaya. 6Kay nay fi vulda-slugota tara'a tara'a kuɗ slugota ta nam vul taya, la vuli tay mi lopna vi jobta-Lawna, kayni ma liys kuɗ vida vaya, 7la vuli tay mi lop sunda, kayni ma liys hiɗi dikga vi sunda; la mi sa ma hatta, nam ma jun tuwam tam hatta; 8la mi sa ma vul gatta, nam ma vul gatta valamu, la mi sa ma vul slena, nam ma li kayni hiɗi gasita vi dikamu, la mi sa ma ŋom dakka, nam ma li kayni hiɗi ciwerta, sa ma li slugota, nam ma la' hiɗi firita kaw.

9Hin ti-kamda li bay mileta, ka gaw tam sle ma joona, vigi sle ma ŋaana dono'o. 10Ligi ŋali jar-tuwgiya, tiygi kay tuwgiya, gargi kay sli yam tuwgi kulo'o hena suw hena. 11Lakgi lub-lub' hay ciwerta vigiɗi, may lakgi ciwer hay Ŋusta, sungi Bum-Sumuna. 12Lakgi firiya hay cubta-sle'ta, ŋali hay zumalda, ŋiresl hay siɗawta. 13Ŋomgi ŋil tuw sa peldetna, vigi rogoyna.

14Gigi bol kay sum sa ligi lasi, gigi bolo, beɗgiɗi.

15Firigiya hiɗi nisi sa ka firiya, tiygiya hiɗi nisi sa ka tiya kaw. 16Tapgi varta vigi kepe, vargi kay sle ma suburtaɗi, may vargi kay sle ma kiɗayna, sargi tuwgi ki sum sa wi yal ŋol naɗi.

17Wurakgi joota vi sa hiɗi joot noŋɗi. Gargit mi sle ma kir sumun pet ŋaana. 18La kayni nigi as a lumu, nigi ma lak hay toyta hiɗi sumun pet. 19Sa hayan kigina, hotgi joot kay tuwgiɗi, may hin liyn kay ɦiyda. Ki ɗot ɗo'ay nala:

Hot joota kayni mi nanu,

Nan min vul wurakŋa, din Bum-Sumuna.#12:19 Ɗuw hay Gsm 32:35.

20May, la mayt ci sa ma gawt kaŋŋa, naŋ ma vulum va ma ti'e, la laat lumu, naŋ ma vulum niy ma ci'e. Kay hay li ma naŋ ka li kayni, naŋ ka tok veŋ ma kuta kulo kalamu.

21Hin joot kol kaŋɗi, may naŋ ma kol kay joota hiɗi ŋaata.

Currently Selected:

ROMENA 12: Massana

Highlight

Copy