ROMENA 11

Lawna may noy sumuna valam goyɗi

1La nala, nan di ala Lawna noy sumuna valamawa goyo su? May noŋɗi. Kay nanu kaw mi sa ma Israyella kuɗ jafna vi Abraham, hay jaf Benyamin. 2Sumuna vi Lawna sa nam wisi jewna nam may cuksi goyɗi. Nigi bay wi va ma ɗota di kay Eliyas su? Nam col vok Lawna, law kay sa Israyella ala: 3Bum-Sumuna, nisi ci sa jobta vaŋawa goyo, giwin-ma-ɗifinna vaŋu nisi ɦoomawa gaa'a, hini mi nan kepe, nisi gar a yaw irita van goyo kaw.#11:3 Ɗuw hay 1 Mul 19:10. 4May Lawna hot diti talam anige? Nan ŋom sum sa jufayn goy birim siɗiya, sa bay girif ŋulofsi gaa vok Baal tuwa.#11:4 Ɗuw hay 1 Mul 19:18. 5Nala kaw, kuɗ liyn ma wulinna, dir sumuna ma hinin ka'a, kayni kuɗ vilekka vi slugota. 6Yo, la kayni kuɗ slugota, nam may lum kuɗ lopna loɗi. La naɗi slugota may ti slugota loɗi. La kayni kuɗ lopna, nam may kuɗ slugota loɗi. La naɗi lopna may mi lopna loɗi kaw.

7Meloge! Va ma sa Israyella garamna, nisi may fumɗi, may sa vilekayna fumawa, segena nam so'otsi diksiya: 8Ki ɗo'ay nala:

Lawna vulsi ŋusta zulomda,

vulsi ira may, kay nisi ma ɗuw hiɗi namɗi,

vulsi humda, may kay hum hiɗi na'ɗi kaw,

ta-ta hay fatta vaydita.#11:8 Ɗuw hay Es 29:10.

9David di'e:

Hin tina visiya muɗ goy jawta hiɗi dena voksiya,

hinim muɗ mi va ma dabsi sesiya, wurakŋa visiya kaw.

10Hin irsi muɗ jufunu kay nisi fi wiɗi,

rotsi pelsi gaa dok-doko kaw.#11:10 Ɗuw hay Nul 69:23-24.

Su'da vi sa waana hiɗi hamda cawta vi sa Israyella

Efes 2:7-13

11La nala nan min di ala: Sesi dab kayni kay puk gaa su? May noŋɗi -- May hiɗi ni-gaata visiya su'da coowa tam sa waana, kay kayni ma zliy hunayta kulo haysiya. 12May la ni-gaata visiya muɗ goy asta kay sa nagatna, la gi-goyta visiya muɗ goy asta kay sa waana, yawta-kulota visiya ma li suw kayni sem gaage?

13May nan di tigi nigi sa waana, kay la nanu mi apostolla vi sa waana, nan subur lopna van namna, 14kay la nan asa, nan fi kal hunayta jar sa hay jafna vanu, kay suɗ segen jarsiya. 15Kay la kuɗ gi-goyta visiya sa nagatna toyawa hiɗi Lawna, a hot tapsi kulo kayni, irita ma may goy hay mitta paɗi su?

16May la vun jaf ma niyi jewna ka peldete, ma bugolda kaf ka nala kaw, la sutayn kaf ka peldete, ɓam-guna ka nala kaw. 17May la ɓam gu-olive mara'a ka haway goyo, la naŋu, gu-olive ma fulla, naŋ piy kulo'o hay baŋalamu, la naŋ tapay kepe tam sutayna hiɗi niy-gun olive, 18naŋ ma subur tuwaŋ kat ɓam gunɗi. May la naŋ subur tuwaŋ talamu, waŋ goy ala ziy sutayn kayni may mi naŋɗi, may sutayn ka ziyaŋ naŋu.

19Naŋ di ala: ɓam-guna kusi goyo kay nan pi hay baŋalamu. 20Awa, kay bay-vida visiya nisi kusi goyo. May naŋ ka piy zawn kuɗ vida vaŋu. La nala subur tuwaŋɗi, may laŋ nari: 21Kay la Lawna hin ɓam-gu ma gasinɗi, nam as hinaŋ naŋɗi kaw. 22Kay na'ta ɗuwaŋ ŋaata hiɗi dikga-kuta vi Lawna: Dikga-kuta kay nisi sa ni gaa'a, may kaŋu ŋaata vi Lawna ka'a, la naŋ mus hay ŋaata valamu ta-ta. May la naɗi, naŋ kaw ma kaaŋis goyo. 23May nisi kaw ma hot piys kulo hayamu, la nisi lak hay bay-vida visi loɗi. Kay donota vi Lawna ka'a kay hot pisi hay lo. 24Kay la nam hawaŋ naŋay goyo hay hay gu-olive ma ful pa paŋ hay gu-olive ma ŋaana, nisi sa ɓam-gu ma gasina nam as hot pisi hay ɓam-guna visi ma jewna bay lopo.

25Kay ɓosiyonna, nan min ala nigi ma lak hay bay-wida kuɗ ŋayayta kayniɗi, a nigi ma sar tuwgi ki nigi yal ŋolo naɗi. Kay galla vi sa Israyella so'ot diksiya ta-ta sum sa waana kaf cuk kalafi. 26Nala sa Israyella kaf ma fi su'da. Ki ɗo'ay nala:

Goy hay Siyon pa sa ma su'da ma ma'a,

nam ma digiɗ jiw-zlata goy vi Yakub pa.

27Kayni bonota vanu hiɗi nisiya,

hay li ma nan ma yaw sulukŋa visi goyo.#11:27 Ɗuw hay Es 59:20-21.

28Kuɗ labara ma firina, nisiya si sa gawta kuɗgi nigiya, may kuɗ vilek-goyta, nisiya sa hayam kisina kay semda vi sumaysiya. 29Kay vulda-slugota vi Lawna hiɗi yita valamu nam as muɗumɗi. 30Kay ki nigi jewe ŋel vun Lawna, may wulini nigi fi slugotawa kuɗ ŋel-vunda visiya, 31nala kaw nisi wulini ŋel vunawa, kay nisi kaw ma fi slugota hiɗi slugota ta nigi fa'ta. 32Kay Lawna vul sumun kaf goy hay ŋel-vunda, kay nam min li slugota mi kafe.

33Hih! Ŋolda vi asta vi Lawna, ŋolda vi wida valamu hiɗi yalda valamu zul ŋolo natige! Kitana valamu sa as fekemɗi, hagata valamu bay balami kaw. 34Sa ma wi varta vi Bum-Sumuna mi gige? Lebo sa ma ɗiger lawta hiɗi namu mi gige?

35Lebo sa ma vulum va jewe a nam ma hot wurakamta mi gige? 36Kay goy hay nam pa, hiɗi namu, talam namu kaw slen pet ka'a. Talam namu gajijita hay vatɗita vatɗita. Amen.

Currently Selected:

ROMENA 11: Massana

Highlight

Copy