ROMENA 10
10
1Ɓosiyonna, darta vi dikanu hiɗi siɗawta vanu tam Lawna kisi kayn ala nisi ma fi su'da. 2Nan min li di-goyta kisi ala: Ciwerta visi kay Lawna ka'a, may bay wida-yalla. 3Kay hay li ma nisi bay wi ɗigerta vi Lawna, nisi gar a kot ɗigerta kay tuwsiya, nisi min hin tuwsi hay ɓam ɗigerta vi Lawnɗi. 4Kay Kristu kayni mi dabaŋ-gu'ta vi vun-ma-gatna, kay muɗ ɗigere nisi kaf sa min vi'e.
5Kay Musus ɗo kay ɗigerta ta may kuɗ vun-ma-gatna ala: Sa ma li kuɗ slen kayni, nam mus iriya kuɗum namu. 6May kayni mi va ma ɗigerta vi vida dumna: Sa ma fi jik kulo'o hay wuralawna mi gige? Kayni kay mar Yesu gaa'a. Naŋ as kay di hay dikaŋ kalaf naɗi. 7Lebo, sa ma as jik gaa hay zul ma wiŋŋa mi gige? Kayni kay day Kristu kulo'o jar sa mitina, naŋ as di hay dikaŋ kalaf naɗi kaw. 8May ɗota di ala mige? Yoboyna ka goboy hiɗi naŋu, hay vunaŋu, hay dikaŋu kaw. Kayni mi yoboyna vi vida ma numa kusumna. 9Kay la naŋ di goy hiɗi vunaŋ ala Yesu nam mi Bum-Sumuna, la naŋ vi hay dikaŋ kaw ala Lawna dayam kulo'o hay mitta pa, naŋ ma fi su'da. 10Kay hiɗi dikamu sa vi'e tam ɗigerta, hiɗi vunamu sa ham goy tam su'da. Kay ɗota di'e: 11Gigekaw ma vi hay namu ma muɗ goy zuloɗi.
12Yudiyana hiɗi Grekŋa ma suw jarsi mayɗi. Nisi kaf Bum-Sumuna visi kep, nisi kaf sa siɗawamu nam nagay kisiya. 13Kay gigekaw ma yi semda vi Bum-Sumuna nam ma fi su'da.
Ŋaata vi kusta labara ma firina
14Nam ma nisi bay vi hayamna nisi as siɗawam ir nanige? Nisi fi vi'e hay li ma nisi bay huma ir nanige? Nisi fi huma bay sa kus yoboyn tisiya ir nanige? 15Nisi fi kus yoboyna bay sa cuksiya ir nanige? Ki ɗo'ay nala:
Nisi sa mar labara ma firina sesi ka jifiy ŋolo.#10:15 Ɗuw hay Es 52:7.
16May sumun kaf may hum kuɗ labara ma firinɗi. Kay Esaya di ala:
Bum-sumuna, sa ma vi kuɗ labara ma firina vuma'an gige?
17Nala vida ma'a kuɗ kusta ta san huma'ta, kusta na'ta mi yoboyna vi Kristu.
18May nan di'e: Nisi bay hum su? Awa, nisi humiya. Delsiya kalay goy hay nagata kuɗulu, yoboyna visiya kalay hay vun-dabaŋgu'ta vi nagata kaw.
19May nan di'e: Sa Israyella may wi kaynɗi su? Musus di jew ala: Nan ma kal hunayt hay dikgiya kuɗ sum sa may jaf-sumuɗi, nan ma kal ɦiyd hay dikgiya kuɗ sum sa bay wida-yalla.#10:19 Ɗuw hay Gsm 32:21.
20Esaya di hiɗi kursulit ŋolo lo ala:
Nisi sa garanɗina fanawa yo
Nan vul tuwanawa kir nisi sa job kanɗi.#10:20 Ɗuw hay Es 65:1.
21May kay sa Israyella nam di'e:
Busat kaf nan ka meɗ ɓan goyo,
mi jaf-sum sa ŋel-vunda hiɗi sa ci-wayta kaw.
Currently Selected:
ROMENA 10: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
