ROMENA 9

JAF SA ISRAYELLA HIƊI JAF-SUM SEGENA

Jaf ma Lawna vilekemna

Gal 4:22-31

1Nan di gasita hay Kristu, nan ka sinɗi. Tap-wida vanu li di-goyt kanu hay Ŋusta-Peldetta, 2Nan ka yor ŋolo, dikan ka tan ŋolo dok-doko. 3Kay nan kay tuwanu mini a fi be'da-goyta, a jaran ma ja goy hiɗi Kristu kay ɓosiyonna, sumiyan sa hay sliwna, 4nisi sa Israyella, si sa vuɗina; gajijita, bonota, gatta, girifta, hiɗi deŋga kaf visi nisiya, 5sumayna visi ka'a, sa Kristu may goy visi pa kuɗ sliwna, nam mi Lawna ma suw slen pet, bolda ka kalamu ta-ta hay vatɗita, Amen.

6May kayni may di ala yoboyna vi Lawna muɗawa waa'a naɗi. Kay sum sa may goy hay Israyel pana nisi may si sa Israyella kafɗi, 7kay nisi hay jafna vi Abraham, nisi may gurona valamu kuɗ na'ta kafɗi kaw; may dit di ala: Hay Isaak sem jafna vaŋu ma yi'e. 8Kayn min di ala gurona vi Lawna kayni may si guro sa hay sliwnɗi, may kayni si gurona vi deŋga, sa ɗuwi ki jafna valam nala. 9Kayni mi yoboy ma hay deŋga na'ta: Nan ma hotiya hay liyn ki kayn nala, hay na'ta Sara ma fi goora.

10May kayni kepɗi, kayni li nala kaw hiɗi Rebekka, na'a sli haya hiɗi kepe, kayni Isaak buya. 11Hay li ma nisi bay vuɗ tuwa, bay li ŋaa'a, bay li joo'o tuwa kaw -- kay ŋaɓta vi vilekka vi Lawna fi col dono'o, may kuɗ lopnaɗi, may kuɗ minda vi nam ma ka yi'e. 12Hay na'ta nam di tam Rebekka ala: Ma ŋolla ma sun ma goora; ki ɗo'ay nala: 13Yakub nan minimiya, may Esaw nan kaam gawi.#9:13 Ɗuw hay Ct 25:23.

Vilekka vi sa waana

14La nala nay ma di mige? Bay-ɗigerta ka hay Lawna su? Mayɗi. 15Kay nam di tam Musus ala: Nan min li slugota tam sa ma nan min lum slugota, nan as wi hawta vi sa ma kiran hawi kaw. 16La nala, kayni may li kuɗ minda vi sanɗi, kuɗ jaŋga vi sanɗi kaw, may kuɗ minda vi Lawna ma li slugota. 17Kay ɗota di tam Farawn ala: Nan fokaŋ kulo'o kayni kuɗ minda vanu, kay ɗek donota van goy hay naŋu, kay semda vanu ma yiys goy hay nagat kafe. 18Nala, sa ma nam min lum slugota nam as lumta, sa ma nam min so'otom dikamu nam as a so'otom dikam kaw.

19Naŋ as dan ala nam law ɦiy kay mige? Naŋ as dan nala su? Kay sa ma fok kulo'o kat minda valamu mi gige? 20May naŋ sana, naŋ mi gige ma hot dita tam Lawna? Va ma kotina fi di tam ma kotomna ala naŋ kotan nala kay mige? Nam fi di nala su? 21Sa ma kot dowayna di law naga-dirginna mi namu ɗisu? Hiɗi naga namna kepe, nam as kot doway ma jifiyna, kot ma joona kaw ɗisu?

22Nay dum mige lo? La Lawn min ɗek ɦiyda valam goyo, min ala sumun wi donota valamu kaw, hiɗi ŋalda ŋolo nam zam ɓam dowayna vi ɦiyda ma koti kay ba-goyta. 23Kay nam fi ɗek goyo asta ŋolda vi gajijita valamu tam dowayna vi slugota ma nam goy voko kay gajijita. 24Nay sa nam yayna, goy jar sa Yudiyan kepɗi, may jar sa bay-vina kaw, 25Ki nam di hay Hoseya nala:

Nan min yisi sumuna vanu nisi sa ay sumuna vanɗi,

na'a ta jewe bay dara,

nan min dara'a, ya' ala ta hayan ka'ta kaw.#9:25 Ɗuw hay Hos 2:21-23.

26Hay li ma dit ma di tisi ala:

Nigi may si sumuna vanɗi,

hay liy namna nisi ma yisi ala gurona vi Lawn ma Irina.

27Esaya kaw siwel goy kay sa Israyella ala:

La ŋaɓta vi sa Israyel ka ŋolo ki ŋesl ma goloŋ kel niyna nala kaw,

cawsi ɦawa'a ma fi su'da.#9:27 Ɗuw hay Es 10:22-23.

28Kay dita vi Bum-Sumuna ta nam da' kay nagata nam ma hoba' vuna' kaf, ma la' koloyo kaw.

29Ki Esaya di jew ala:

Lali Bum-Sumuna vi vok-ma-duura hinay jafna hiniɗi,

nay muɗ ɗawn ki Sodoma nala,

nay muɗ ɗawni ki Gomora nala.#9:29 Ɗuw hay Es 1:9.

Sa Israyella hiɗi ɗigerta ta may kuɗ vida

Gal 3:8-14, 21-29

30La nala nay ma di mige? Sa waana sa gar ɗigertaɗi, may nisi fi ɗigerta, kayni ɗigerta vi vida. 31May sa Israyella sa gar vun-ma-gatna vi ɗigerta, nisi may co tam vun-ma-gatna namnaɗi. 32Kay mige? Kay nisi garam hiɗi vidaɗi, may hiɗi lopna, nisi dab ta hiɗiy ma dab semna. 33Ki ɗo'ay nala:

Humgiya, nan tun hay Siyon hiɗiy ma dab semna,

hiɗiyna ma ci dugumna,

sa ma vi hayamu as muɗ goy zulo'o noŋɗi.#9:33 Ɗuw Es 8:14.

Currently Selected:

ROMENA 9: Massana

Highlight

Copy