WID-ŊAYAYTA 16

1Nan hum del ma ŋolla may goy hay liyn ma peldetna pa ka di tam sa sunda-wuralawna ala: Tuɗgiya, ɦokgi kaway-ma-cina ma siɗiyana vi ɦiyda vi Lawna gaa kay nagata. 2Sunda-wuralawna ma jewna kaliya, nam ɦok kaway-ma-cina valam goy kay nagata. Mil guɗoŋ ma guɗulina ma ɓas ŋolo vi sum sa tumda vi muura tisin kaf, hiɗi nisi sa girif gaa vok va ma sli tuw muura kaf kaw.

3Sunda-wuralawna ma ma'na ɦok kaway-ma-cina hay niy-lum ma ŋolla, niy-lum ma ŋolla muɗ busuwu ki busuwna vi sa ma mitina nala, sle ma irina ma hay niy-lum ma ŋolla kaf mitiya.

4Sunda-wuralawna ma ɦidina ɦok kaway-ma-cina valam hay kaara. Kaara muɗ goy busuwu. 5Nan hum sunda-wuralawna vi niyna ka di ala: Naŋ ɗigere, naŋ ma ka'a, ma aya, naŋ ma peldetna, kay naŋ ka kitata vaŋawa. 6Kay nisi ɦok busuwna vi sa peldetna hiɗi sa jobta-Lawna goyo, naŋ vulsi busuwnawa a ci'e may; nisi nagay kay kayni. 7Nan hum giwin-ma-ɗifinna ka di ala: Awa, naŋ Bum-Sumuna Lawna, ma Gaŋeraŋ-Petna, kitana vaŋu ɗigere hiɗi gasiya kaw.

8Sunda-wuralawna ma fiɗina ɦok kaway-ma-cina valam goy kir fatta. Fatta fi donota kay war sumuna hiɗi kuta. 9Zalla ma ŋolla war sumuna goy ŋolo. May nisi ŋul semda vi Lawna ma gaŋeraŋa valam ka'a kay bakmara namna, nisi min ham goyo kay hot vul suburta tam Lawnɗi.

10Sunda-wuralawna ma vaslna ɦok kaway-ma-cina valam goyo kay zlamda-mulda vi muura. Mulda vi muura muɗ jufunu; sumuna ka mut siysiya kay tuw-tita, 11May nisi ŋul sem Lawna ma wuralawna, kuɗ tuw-tita visiya hiɗi moy guɗoŋŋa, hiɗi kayni kaf nisi min ham kay lopna visiɗi.

12Sunda-wuralawna ma karkiyana ɦok kaway-ma-cina valamu goy kay niy-lum ma ŋolla Eufrata, niyna hiɗak goyo kay kot hagata kay muliyan sa may kuɗuw pana. 13Nan wi ŋusiyan ma liwisna ɦidi, sli luura nala, nam kalay goy hay vun guy ma ŋolla, goy hay vun muura, goy hay vun sa-jobta sa bay-gasina kaw. 14Kayni mi ŋusiyana vi fuliyana, nisi li ɗekka, nisi tuɗ tam muliyana vi nagat kafe, kay toksi kay duura vi buur ma ŋolla vi Lawna, ma Gaŋeraŋ-Petna. 15Humgiya, nan ka co'o ki sa ma kulla nala. Sle'ta ka kay sa ma mus jigere, ŋom sligara valamu kaw, kay nam ma poy goy nalaɗi, kay a nisi wi zulota valamɗi. 16Nisi tok tuwsi hay liy ma yum hay vun Hebren ala Harmagedon.#16:16 Harmagedon min di ala hiɗiyta vi Megiddo.

17Sunda-wuralawna ma mul siɗiyana ɦok kaway-ma-cina valamu goy jar simeɗna. Della may goy hay liyn ma peldetna vi Lawn pa, goy tam zlamda-mulda pa ka di ala: Slen laawa. 18Wileta li'e, della di'e, niyna baya, wiira vi nagata li ŋolo, hay tun cawta vi sumun gaa kay nagat pa, wiira-nagata ma ki kayn nala bay li sem kep tuwa. 19Hoyok-ziy ma ŋolla iram ɓuraw goy hiɗi, hoyok-ziyna vi sa waana ɦo gaa'a. Lawna humam gum kay Babilon ta ŋolda, kay vula' kaway-ma-cina vi ɦiyda valam ta ŋolda. 20Jokona kaf muni jaŋi, hiɗiyna sa fum loɗi. 21Mokayna ma ŋulona ma nekka valam ir talente kep kep, kulo hay wuralawn pa cuk gaa kay sumuna; sumuna ŋul Lawna kuɗ bakmarana hiɗi mogayna, kay bakmara namna suwi ŋolo.

Currently Selected:

WID-ŊAYAYTA 16: Massana

Highlight

Copy

Compare