WID-ŊAYAYTA 15

Kaway-ma-cina ma siɗiyana

1Bugolda, nan wi ɗekka tara'a hay wuralawna, ɗekka ta ŋolo ɦuyumda kuɗa'a, sunda-wuralawn siɗiya, bakmaran siɗiya kaw ka hay ɓisiya, bakmara ma cawna, kay Lawna hob vun ɦiyda valam ɗawni hiɗi bakmara namna. 2Nan wi slen ki niy-lum ma ciliŋ ki kristal#15:2 Nay fum cawam ma diy goyna hay 4:6. nala, rigasay hiɗi kuta, hiɗi sa kol kay muura, sa kol kay va ma sli tuw muura hiɗi nimerona vi semda valamu, nisi ka lakay kulo kay niy-lum ma ciliŋ ki kristal nalana. Dilla vi Lawna ka hay ɓisiya. 3Nisi gi nulla vi Musus sa ma sunda vi Lawna, hiɗi nulla vi goor ɦu-dimina kaw di'e: Lopna vaŋu mi lop ma ŋulona hiɗi ɦuyumda kuɗumu, naŋ Bum-Sumuna Lawna ma Gaŋeraŋ-Petna, hagana vaŋu ɗigere hiɗi gasiya, naŋ mulla vi sumun kafe. 4Bum-Sumuna, sa ma as kay li nar kay semda vaŋɗin mi gige? Sa ma as subur semda vaŋɗin mi gige? kay naŋ kepe peldete, jaf-sumuna kaf ma ma'a kay girif gaa vokaŋu, kay mige ɗigerta vaŋu ɗek tuwa'awa goyo.

5Bugolda, hay li ma nan ka ɗuwa, liy ma peldetna vi tabernaklena vi di-goyta hay wuralawna mal goyo. 6Sunda-wuralawna sa siɗiya sa bakmaran siɗiya ka hay ɓisina, kalay goy hay liyn ma peldetna pa, nisi cuki hiɗi baraw ma bay-gesna ma haɓ tal-talla, kanti ma ora ka juni war-digsiya. 7Kep jar sle ma irina ma fiɗina vul kaway-ma-cina ma ora siɗiya mi sunda-wuralawna sa siɗiyana, hobay hob' hiɗi ɦiyda vi Lawna ma ka iriya hay vatɗita vatɗita. 8Nala liy ma peldetna hob hiɗi no'osna, kuɗ gajijita vi Lawna hiɗi donota valamu, sa as kal kalaf hay liy ma peldetna namna noŋɗi, ta-ta bakmara ma siɗiyana vi sunda-wuralawna sa siɗiyana vunam hob kulo tuwa.

Currently Selected:

WID-ŊAYAYTA 15: Massana

Highlight

Copy

Compare