WID-ŊAYAYTA 17

Ni-gaata vi Babilon

1Bugolda sunda-wuralawna mara kepe jar sa siɗiyana sa kaway-ma-cina ma siɗiyan hay ɓisina ma'a, ka di tan ala: Naŋaya, nan min ɗekaŋ kay kitata vi cata ta viyuw ŋolda, na' ta ka musi kel niy-lum ma ŋolla, 2na' ta muliyan kay nagat li zlata-bulo hiɗi na'a, na'a ta muliyan gaa kay nagata ɦoy tuwsi goyo hiɗi vinna vi viyuwta va'a.

3Hay Ŋusta pa nam kalan goy hay fulda. Nan wi cat kep musi kay muur ma slaw keŋ', hobay cep-cep' hiɗi semda vi ŋulda. Muur namna yalam siɗiya, miyokom doogo may.

4Cata na'ta ganay hiɗi sligar purpella hiɗi sligar ma slaw-keŋŋa, ganay hiɗi ora, hiɗiy ma ŋaana hiɗi kermena. Kaway-ma-cina ma ora ka hay ɓa'a, hobay hob' hiɗi sle ma liwisna hiɗi gesna hiɗi zlata-bulota va'a kaw. 5Hay voka'a semda ka ɗoya, ŋayayta: Babilon ta ŋolda, sum boy sa li tuwsi viyuwu hiɗi sa li tuwsi liwisi gaa kay nagata. 6Nan wi cat na'ta ɦoyay goyo hiɗi busuwna vi sa peldetna hiɗi busuwna vi sa li di-goyta kay Yesu. Hay li ma nan wa'a, nan muɗ ɦuyum' ŋolo.

7Sunda-wuralawna di tanu: Naŋ muɗ ɦuyum kay mige? Nan min daŋ goy kay ŋayayta vi cata hiɗi muura ma ziya'na, ma yalam siɗiya hiɗi miyokom doogona.

8Muura ma naŋ wumna aya, may nam may loɗi. Nam ma jik kulo hay zul ma wiŋŋa pa kal hay ba-goyta, sum sa ka kay nagata ma muɗ ɦuyum', nisi sa hay tun-cawta vi inda vi nagat pa sesi bay ɗo hay defterta vi irita, hay li ma nisi wi muura, a nam aya, wulini nam may loɗi, may nam min ma'a lo. 9Nanige kaw tani yamda-wida ta hiɗi yalla ma li ka'a: Yam ma siɗiyan kayni mi hiɗiy ma siɗiyana, ma cata ka musi kalamna. 10Kayni si muliyan siɗiya: Vasl cuki gaa'a, kepn ka'a, hena bay ma tuwa, hay li ma nam coowa, nam ma mus ir liyn neeɗa ɦawa. 11Muur ma aya, may wulini nam may loɗi, kayni mi mul ma glafandina; namu mi kep jar sa siɗiyana, nam ka tuɗ hay ba-goyta. 12Miyok ma doogo ma naŋ wumna kayni si muliyan doogo, nisi bay fi mulda tuwa, may nisi fi gaŋeraŋa ki muliyan nala ir leer kep ɦawa hiɗi muura. 13Nisiya varta visi kepe, donota visiya hiɗi gaŋeraŋa visiya nisi vulum mi muura. 14Nisi ma dur goor ɦu-dimina, may goor ɦu-dimina ma kol kisiya, kay namu mi Bum-Sumuna vi sumay sumuna, mulla vi muliyana kaw. Sa yiyna, sa vilekay-goyna sa gasina sa ka hiɗi namna ma kol kisiya kaw. 15Nam di tanu: Niyna ma naŋ wumna ma cata viyuwta ka musi kalamna kayni si sumuna, vokŋa vi sumuna, jaf-sumuna kuɗ vunna kaf. 16Miyok ma doogo ma naŋ wumna hiɗi muura ma ka gaw hiɗi cata viyuwta, nisi ma foka' goy nala'a, nisi ma muta' sliwa'a, ma ŋala' goyo hiɗi kuta kaw. 17Kay Lawna tun van kayni hay diksiya kay hob varta valamu, a tap varta visi kep kay vul donota tam muura, ta-ta yoboyna vi Lawna vunam hob goyo. 18Cata ta naŋ wa'ta, kayni mi hoyok-ziyna ma ŋolla ma gaŋeraŋa valam ka kay muliyan gaa kay nagata.

Currently Selected:

WID-ŊAYAYTA 17: Massana

Highlight

Copy

Compare