LAW MA NIR-NIRAMNA 8
8
Yalda muɗi goy sa'a
1Yalda may siwelɗi su?
Yamda-wida may siwel dela' kuloɗi su?
2Na' ka coli kulo kay liyn ma ɗiŋiriŋŋa goboy hiɗi hagana,
na' ka coli jar haga ma gra-grana;
3na' ka coli tam vun-ziyna,
tam vun-galana vi hoyok-ziy ŋulona,
kalaf dig vun-ziyna na' ka di dela' kulo'o:
4Sumuna, nan siwel kayn katgi nigiya,
delan ka di kayni kat gurona vi sum-wurana.
5Nigi sa bay yalla,
hatgi kay poŋ ir slena;
nigi sa ɦay-ɦayna, hatgi wida-yalla.
6Humgiya, kay nan ka hiɗi sle ma ŋulo'o kay di'e:
vunan ka mal goyo kay hat sle ma ɗigera.
7Kay vunan di gasita,
sinanu ka gaw hiɗi sinda;
8yoboy ma hay vunanu kaf mi gasita,
sinda may jaramɗi kaw,
va ma calay goyo may jaramɗi kaw.
9Dita van kaf haraŋi kay sa ka hiɗi yamda-wida,
na' ɗigere kaw kay sa ma fi wida.
10Mingi hatta vanu suw gurjuta,
mingi wida suw or ma ŋaana;
11kay wida na' ŋaa'a suw kermena,
na' tek ŋolo suw sle ma gusta valam lop ŋolo.
12Nanu, yalda,
ziyn ma musta vanu yum ala poŋ ir slena,
nan ka hiɗi wida vi varta.
13Narta kuɗ Ma-Vatɗina kayni mi ka-gawta hiɗi joota,
ɦawlata hiɗi subur-tuwta,
hagata vi joota, vun ma di ma di joota,
lakŋi mi sle ma nan ka gaw hiɗi namu.
14Vul gatta, ɗek yalla kayni mi lopna vanu;
nanu mi yam ta wida,
donota ka hay ɓanu.
15Muliyan ti mulda kayn hiɗi nanu,
gurona vi muliyan di law ma hay liyamna kayn hiɗi nanu.
16Sum sa ŋulona ŋom nagat kayn hiɗi nanu,
sum sa donona hiɗi sum sa ka kitat gaa kay nagat kafe.
17Nan min nisi sa minanu,
nisi sa garanu as fanu.
18Farayna hiɗi gajijita ka hay ɓan nanu,
faray ma mus ta-tana hiɗi ɗigerta kaw.
19Vuɗna vanu nam ŋaa'a suw ora,
suw or ma bay-rigasna,
vuɗna vanu ŋaa'a suw gurjuta.
20Nan poy hay hagata vi ɗigerta,
jar haga gurayna ma bay gunna,
21kay vul farayna mi nisi sa minanu,
kay hob timgilla visiya.
22Ma-Vatɗina tunan jew lop ma nam lumna kafe,
tunan jew lopna valam ma ɓa-ɓana.
23Nan ay tuni (mulu) hay liy ma jew ɓa-ɓana pa,
hay cawa'ta-tunita, jew tun cawta vi nagata.
24Nam vuɗan kayni hay li ma zul ma wiŋŋa ay tuwaɗi,
hay li ma niy ma jaŋ goyna mayɗi;
25jew a hiɗiyna ɓal ɗeŋe,
jew a liy ma ɗiŋiriŋŋa li'e,
nan ay vuɗi ɓa-ɓa;
26hay li ma nam bay kot nagat tuwa,
bay kot sinen tuwa,
bay kot butuw ma dir nagat tun caw hiɗi namna tuwa.
27Hay li ma nam kot dukalawna, nan aya;
hay li ma nam ɓir diŋ-diŋŋa kulo kay zul-ma-wiŋŋa,
28hay li ma nam lak ɗugulla kulo dukalawna,
hay li ma niy-ma-riŋŋa vi zul ma wiŋŋa
ka riŋ goy hiɗi dono'o,
29hay li ma nam ɓir jaara vi niy-lum ma ŋolla,
kay niyna kulfut kulo deŋelɗi,
hay li ma nam tun sem nagat gaa'a,
30nan ay hay lopna hiɗi namu,
nan ay firiyim dikamu hay buurta kafe,
nan ay liw vok iramu dok-doko.
31Nan ay liwa kay yam nagata valamu,
hayan ka sleɗa jar gurona vi sumuna.
32Wulin kayni, gurona vanu, humangiya,
sle'ta ka kay nisi sa sli hagata vanu!
33Humgi hatta, kay nigi ma muɗ yali,
nigi ma noy hatta goyɗi.
34Sle'ta ka kay sa ma humanu,
sa ma mus jiger hay vun-galana vanu hay buurta kaf,
sa ma ŋom vun-galana vanu.
35Kay sa ma fanawa nam fi iritawa,
nam ma fi slugota vi Ma-Vatɗina.
36May sa ma li suluk katanu ka ɓulak ciwta valamu;
nisi kaf sa ka gaw hiɗi nanu min mitta.
BIBALDA TA PELDETTA © L'Alliance Biblique du Cameroun, 2001