LAW MA NIR-NIRAMNA 7
7
1Goora vanu, vaŋ yoboyna vanu,
ŋomaŋ gatta van hay ɓaŋ kafe.
2Laŋ kuɗ dita vanu,
nala naŋ ma mus iriya;
ŋomaŋ hatta vanu ki wal-iraŋ nala.
3Naŋ ma juna' hay cita-ɓaŋu,
naŋ ma ɗo' gaa hay tablena vi dikaŋu.
4Daŋ tam yalda ala:
Naku ti ɓasunta!
Wida-yalla naŋ ma ya' ala banaŋga!
5Kay nisi ma ŋomaŋ kay cata pulta,
cata pulta ta di yoboy ma lumaɗna.
6Nan ay coli hay ir-ziyda van zaw,
nan ka sar jar kawayna vi ir-ziyda.
7Nan wi goor ma joriyo kep jar sa to'ofayna,
jar guro joriyona nan wi goor mara kep nam ɦay-ɦaya.
8Nam jik hay hagata,
goboy hiɗi gef-hagata ta cata ta pulta kep ka coli hay zaw,
nam tuɗ ŋali ŋali kat ziyna va'a.
9Kayni hay li ma liyn tun caw zima hay vulatita,
jar henjeta hiɗi jufunda.
10Wum pa kayni, cat kep co talamu,
na' li tuwa' ki cata-gawlaŋga nala,
hiɗi ɗutta hay dika'a.
11Cat kayni pat winek ŋolo,
tuwa' wira'ɗi;
se' may joy gaa vo hay ziyna va' noŋɗi;
12wum pa kayn na' goy hay hagan zaw',
wum pa kayn na' hay liy ma lakŋa vi sumun zaw,
wum pa kayn na' hay gef-hagan zaw,
na' ka gar sumuna.
13Na' bow goor ma joriyona firiyimu,
ka dum hiɗi del ma ɗutna ala:
14Nan min li ɗifini vi lop ma slugona,
vaydi nan yi va kanu.
15Kuɗ na'ta kayni nan kalay goy kiraŋu.
kay garaŋu, may nan faŋawa.
16Va ma buura vanu nan bar borgonawa gaa kalamu,
nan kotomawa hiɗi tapina ma Egiptena;
17Liyn ma buura vanu nan kotom tuwamawa hiɗi urdina miir,
urdina alowes hiɗi urdina sinamom.
18Naŋaya, ɦoyay tuway hiɗi darta ta-ta goy grawta,
hobay hayay hiɗi darta.
19Kay jufan may voɗi,
nam kalay hay rogoyta ta gineta;
20birimta valam ta gurjuna nam sla' kalamu,
nam hotay vo ɗawn hay til ma vokŋa.
21Na' nemenu hiɗi kaslana va'a,
na' tanam kuɗa'a hiɗi yoboy ma ɗutna vi vuna'a.
22Nam tun caw tuɗ kuɗa' de'
ki putna ma naram hay liy ma ŋatna nala,
ki sa ma ɦoyayna ma sumun junumu kay watamu nala.
23Ta-ta nam co tam liyn ma ɓarawt duɓum gilesemu,
ki layta zum kulo hay dena nala,
bay wi ala irita valam ma ba'a.
24Wulin kayni, gurona vanu, humangiya,
tun ŋalda vigi tam goboyna vi vunanu.
25Hin dikgi muɗ kuɗ boyn sa ki kayn nalaɗi,
viy tuwgi goyo hay haga ma gurayna visiɗi.
26Kay boy sa ki kayn nala vat sumunawa goy ŋolo,
sum sa boyn ki kayn nala cisi goy mati nisi ka ŋolo.
27Ziyna vi boy sa ki kayn naana
mi hagata ma nar san hay liyna vi mitta.
BIBALDA TA PELDETTA © L'Alliance Biblique du Cameroun, 2001