LAW MA NIR-NIRAMNA 9
9
1Yalda in ziyna va'awa,
na' ceɗ dolla va' ma siɗiyanawa.
2Na' ŋat putnawa,
na' kot vinnawa tun tablena va'awa kaw.
3Na' cuk boy sa sunda va'awa goyo,
na' ka siwel hay liy ma ŋulona vi hoyok-ziyna ala:
4La sa ma bay-yal ka'a,
nam jik ay tani,
tam sa ma ɦay-ɦayna, na' ka di ala:
5Nigiyaya, tigi funa vanu,
cigi vinna vanu ma nan kotomna kaw;
6hingi bay-yalla goyo,
nala nigi ma lak iriya,
tungi irgi hay hagata vi yamda-wida.
7Sa ma di sa ma burahta kiramu,
mara' kalam ti panta ɦawa,
sa ma ɗek sa ma joona nam fi ŋulda.
8Sa ma burahta naŋ dum kiramɗi,
kay mige nam ɗawn ma kaŋ gawi.
Sa ma yalla naŋ ma dum kiramu,
nam ma minaŋu may.
9Vulaŋ va'a mi sa ma yalla,
nam ɗawn ma muɗ yal suwa,
hataŋ sa ma ɗigerta,
nala nam ma jor wida valamu.
10Tun cawta vi yalla mi narta kuɗ Ma-Vatɗina;
Wida-ŋolda vi sum sa peldetna kayni ti yamda-wida.
11Buura vaŋu ma li dak-dak ɗawn kuɗan nanu,
busata vaŋ hay nagata ma li ŋol dak-daki kaw.
12La naŋ yali, yalda ma gutaŋ naŋu,
la naŋ mi sa ma burahta,
naŋ vaŋ kep ma ziy zumalda.
13Cata ɦay-ɦayta pat winek ŋolo,
na' bay-yali, wi va noŋɗi kaw.
14Na' mus goy hay vun-ziyna va'a,
na' mus kay jaŋgalla,
kulo hay liy ma ɗiŋiriŋŋa vi hoyok-ziyna.
15Kay siwel tam sum sa jik hay hagata
sa cap voksi ɗigera ala:
16La sa ma bay-yal ka'a,
nam kal ay kalaf tani,
na' di tam nisi sa ɦay-ɦayna ala:
17Niy ma cum goy ŋayayna nam ŋaa'a ŋolo,
fu ma tum goy kulla nam jifiy ŋolo.
18Sum sa fi yita va'a may wi ala ɗawni mi liyna vi mittaɗi,
nisi may wi ala kayni mi lokŋa vi mittaɗi.
BIBALDA TA PELDETTA © L'Alliance Biblique du Cameroun, 2001