LAW MA NIR-NIRAMNA 6
6
Gatta tara'a tara'a
1Goora vanu, la naŋ col tuwaŋ hay baŋal sugoloŋu,
la naŋ col tuwaŋ hay baŋal sa mara'a,
2la naŋ juni kay yoboyna vi vunaŋu,
la yoboyna vi vunaŋ vaŋawa,
3Goora vanu, kayni ma va ma naŋ ma lumu:
naŋ ma tuɗ talamu kay naŋ pukawa gaa'a kuɗ gaŋeraŋa valamu,
nala naŋ ma tuɗ talamu,
girifaŋ gaa'a, giɗelem delemu.
4Hin iraŋ duk gaa senɗi,
hin goŋ-iran duk gaa mirikɗi.
5Piraŋ goyo,
ki dukga pir goy hay ɓam sa ma li gawna nala.
Ki layta hay ɓam sa ma vi layna nala.
6Naŋ sa ma zulomda, tuɗaŋ tam telella,
saraŋ poyta valamu, muɗaŋ yali.
7Telella sa ma ŋolla valam mayɗi,
Sa ma ŋomda valam mayɗi,
sa ma gatta mayɗi kaw.
8Nam kot tina valamu hay menda,
hay liyna vi feɗna nam tok sle ma tina.
9Naŋ sa ma zulomda,
naŋ ma bur gaa na waŋ' ta-ta lancitige?
Naŋ ma zliy kulo'o hay senda lancitige?
10Naŋ min kal sen neeɗa,
naŋ min tun sukaŋ neeɗa,
naŋ min slew ɓaŋ war-digaŋ neeɗa, kal sene.
11Nala hawta ma bowoŋu ki sa ma cigeɗna nala,
kiɗata ma co kaŋu ki sa ma duura nala.
12Sa ma bay-yalla mi sa ma bay-ɗigera,
nam tuɗ hiɗi sinda hay vunamu.
13Nam ci iram mirik-mirik',
law hiɗi gayamu, ɗek slen hiɗi cita-ɓalamu;
14joota ka hay dikamu,
nam var sle ma joona hay buur kaf,
nam mar cirepta.
15ki kayn nala ɓulakka valamu ma co koloyo,
nam ma kirap goy gosoyo bay fi gu ma muɗum goy ŋaa'a.
16Slen ma Ma-Vatɗina ka gaw hiɗi namu ka karkiya,
ma kir Ma-Vatɗin bisna ka siɗiya noŋo:
17Ira ma subur tuwamna,
vun ma ɗutna,
ɓamna ma ɦok busuw sum sa bay li joon goyna,
18dikga ta var vaara ma bay-ɗigera,
gayna ma jaŋ kuɗ joota,
19sa li di-goyta ta hobay hiɗi sinda,
hiɗi sa mar cirepta jar ɓosiyom-tuwsina.
Cata ta ɗut sumuna
20goora vanu, ŋomaŋ gatta vi buŋu,
noy hatta vi suŋu goyɗi.
21Naŋ ma ŋoma' hay dikaŋ dono'o,
naŋ ma juna' kulo keleŋu.
22Na' ma ɗigeraŋu hay poyta vaŋu,
na' ma ŋomaŋ hay liyn ma buura vaŋu,
na' ma law hiɗi naŋu hay liyn ma naŋ zliy kulo'o.
23Kay gatta na'a mi fitilla, hatta na'a mi haraŋa,
ɗek-kirta vi gatta ŋom san hay hagata vi irita:
24nam ma ŋomaŋ kay cata liwista,
kay dita ma lumaɗna vi cata pulta.
25Dikaŋ ma dar ca na'ta kuɗ jifiyta va'ɗi,
hin tuwaŋ ɗut kay wal-ira'ɗi.
26Kay kuɗ cata gawlaŋga,
san ba dir funa valamu,
may cata ta kuɗ jufa'ta gan jawta vok irita ŋaata vi sana.
27San as vi kut hay war-digamu
bay sligara valam do kuwa su?
28San as tuɗ kulo kay veŋ ma kuta
bay selem loɗ goy su?
29Sa ma tuɗ gar cata vi sugolomna nam ki kayn nala kaw,
sa ma jo cata vi sugolomna nam hin bay fi kitatɗi.
30La sa kul va'a kay nam min tumu,
hay li ma mayt ka cumu, san kayni joo dok-doko.
31La vumawa hay kulda,
nam ma wurak va namna goy sem siɗiya,
nam ma vul sle ma ka vo hay ziyna valamu kaf.
32May sa ma li zlata bulo'o hiɗi ca'a nam bay yali,
sa ma min ba tuwam goyo nam ki kayn nala kaw.
33Nam ma fum mi milla hiɗi zulota tuta,
zulota valamu ma ɦas goy noŋɗi.
34Kay hunayta muɗ san ɦiy ŋolo,
kir-hawta valamu mayɗi hay li ma nam min job yalamu;
35nam may min wurakŋaɗi,
la naŋ vulum slen ŋol dak-dak kaw,
nam may vumɗi.
BIBALDA TA PELDETTA © L'Alliance Biblique du Cameroun, 2001