LAW MA NIR-NIRAMNA 5
5
Joota vi nemda
1Goora vanu,
jak humaŋ tam yalda vanu, jakaŋ humaŋ tam wida vanu,
2kay naŋ ma li ŋomiya hiɗi jiɓera,
kay vunaŋu ma ŋom wida.
3Kay vun cata pulta jibet ki yumda nala,
kay yoboyna va'a sleɗe suw mula.
4May hay dabta yoboyna va' galak ɗiwek ki goyo-goyna nala,
siy hiliw-hiliw ki kew-gaferaŋa ma siyam ma'na nala.
5Gaya'a jik gaa hay liyna vi mitta,
se' co ta-ta hay liyna vi sa mitina.
6Na' may var kay hagata vi iritɗi,
na' viy goyo hay hagata va'a,
na' wi liyn ma na' jik hayamnaɗi.
7Wulin kayni, gurona vanu,
humgi delanu,
calgi goy gine hiɗi ɓakŋa vanɗi.
8Calgi goy hay hagata ta tuɗ hay ziyna va'ta,
Nigi ma tuɗ tam vun-galana vi ziyna va' goboyɗi.
9Kay a nigi ma vul donota vigi goy mi sum saraɗi,
kay a nisi ma vul busata vigi goyo mi sum sa ci matnaɗi.
10Kay la naɗi,
sum sa pulla ma hob haysi hiɗi farayna vaŋu,
kay a sle ma naŋ fum kuɗ lopna vi ɓaŋu
ma hob hay ziyna vi sa maraɗi.
11Kay a naŋ ma tiya hay vun dabta vaŋɗi,
hay li ma sliwaŋu hiɗi tuwaŋu ka loɗ goyo.
12kay a naŋ ma di ala:
Nan noy gatta goyo kay mige?
Dikan ɗuw gatta birek-ceke kay mige?
A naŋ ma di naɗi.
13Nanige nan min hum vun sum sa hatannaɗi,
nan min jak human tam sa ma ɗekannaɗi kay mige?
A naŋ ma di naɗi.
14hini neeɗa ɦawa a nan jugo joot kafe
jar tokŋa hiɗi vokŋa vi sumuna.
15Caŋ niyna vi goloŋga vaŋu,
niyn ma kalay goy hay kaata vaŋ pa:
16Kaata vaŋu naŋ ma hina' niya' yam goy hay liyn mara su?
Niy-ɓatna vaŋu,
naŋ ma hinim jaŋ goy hay liy ma sumun lak hay kafna su?
17Hinim li vaŋ naŋ kepe,
may sa ma pulla ma li hiɗi naŋɗi.
18Hin kaata vaŋu fi bolda,
firiyaŋu hiɗi cata vaŋu ta hay joriyo tuwaŋga,
19Na'a ti dukga ta minda,
buɗugoota ta hobay hiɗi slugota,
naŋ ma li hobay hiɗi darta va'a hay buurta kaf,
minda vaŋ ta ka'ta ma li hobay dok-doko.
20Goora vanu,
dikaŋ as taŋ kay cata pulta kay mige?
Naŋ as vi pona vi cata ta naŋ may wa'ɗita hay ɓaŋu kay mige?
21Kay hagata vi sana ka vok ir Ma-Vatɗina,
Ma-Vatɗina wi hagata valam ta gurayta kafe.
22Sa ma joona sulukŋa valam vumti mi nam kay tuwamu,
sulukŋa valamu slewem tep-tep'.
23Nam ma mita kay sa ma ɗekem mayɗi,
nam ma geɗa kuɗ ɦoyta valam ta ɓa' kalita.
BIBALDA TA PELDETTA © L'Alliance Biblique du Cameroun, 2001