LAW MA NIR-NIRAMNA 4
4
Gatta vi bumna tam goora valamu
1Gurona vanu, humgi hatta vi bugiya,
lakgi ŋal kiliŋ kay hum caw yalda;
2Kay nan vulgi gatta ta ŋaata,
noygi hatta van goyɗi.
3Nan ay mi goora vi bunu,
goor ma lumaɗna,
goor ma valam kepna kaw kuɗ sunu.
4Bunu ay vulan hatta,
nam ka di tanu:
Naŋ ma ŋom yoboyna vanu hay dikaŋu,
humaŋ kuɗ gatta vanu, nala naŋ ma mus iriya.
5Gara'n yalda, garaŋ yamda-wida,
yaŋ ma jok yoboy ma hay vunannaɗi,
naŋ ma cal goyɗi kaw.
6Naŋ ma noy yalda goyɗi,
nala na' ma ŋomaŋu, naŋ ma mina'a,
nala na' ma koɗ ŋarak kaŋu.
7Kayni mi tun cawta vi yalla: Garaŋ yalda,
hiɗi slena vaŋ kaf ma ka hay ɓaŋu naŋ ma gar yamda-wida.
8Naŋ ma tiya' se'a, nala na' ma slaŋ yaŋ kulo'o,
nala na' ma vulaŋ gajijita, la naŋ firi hiɗi na'a.
9Na' ma tun bogorayna vi slugota kaŋu,
na' ma ganaŋ hiɗi jakawata ta jifiyta.
10Humaŋu goora vanu, vaŋ yoboyna vanu,
nala buura vi irita vaŋu ma li ŋolo.
11Nan ɗekaŋ hagata vi yalla,
nan naraŋ hay hagata vi ɗigerta.
12La naŋ ka tuɗa, seŋ as cal goy noŋɗi,
la naŋ ka jaŋa, seŋ as sli zlaraŋgaɗay noŋɗi.
13Ŋomaŋ hatta, naŋ ma ga' goyɗi,
naŋ ma ŋoma'a, kay na'a ti irita vaŋu.
14Naŋ ma tuɗ hay hagata gurayta vi sum sa joonɗi,
poy hay hagata vi sa sulukŋɗi kaw.
15Tel tuwaŋu, jik haya'ɗi,
calaŋ goyo, jikaŋ goy hay liy mara'a.
Joota vi nemda
16Kay la nisi bay li joo, nisi as kal senɗi,
la nisi bay gi sa gaa'a, senda as visiɗi.
17Kay nisi tum mi tina vi joota,
kay nisi cum mi vinna vi waskayta.
18Hagata vi sum sa ɗigera ki haraŋa ma wile'e nala,
ma haraŋa valamu jor voko ta-ta hay falay calak' nala.
19Hagata vi sum sa joona ki jufunda nala;
va ma min puksi gaana nisi may wumɗi.
20Goora vanu, jak humaŋ tam yoboyna vanu,
tun humaŋ tam ɓakŋa vanu.
21Hinim tuɗ goy gine hiɗi naŋɗi,
ŋomom hay dikaŋ kalafi;
22Kay kayni mi irita kay nisi sa fumu,
mi yerta-goyta kay tuwsi kafe.
23Ŋom dikaŋu suw sle hegen kafe,
kay irita may goy hay nam pa.
24Yaw sinda goy hay vunaŋu,
yaw ɗutta goy hay vunaŋu,
hina' goy gine hiɗi naŋu.
25Hin iraŋ ɗuw vokaŋ ɗiger,
hin goŋ cuk vokaŋ ɗiger.
26Kotaŋ hagata ta naŋ jik haya'ta,
hin hagata vaŋ koti ŋaa'a.
27ɦod iraŋ goy gal jufɗi, gal gulɗi kaw,
tel tuwaŋ kay joota.
BIBALDA TA PELDETTA © L'Alliance Biblique du Cameroun, 2001