LAW MA NIR-NIRAMNA 3
3
Tun vida vaŋ kay Lawna
1Goora vanu, yaŋ ma jok hatta vanɗi,
naŋ ma ŋom dita vanu,
2Kay kayni ɦur buura hiɗi busata vi irita vaŋu,
kay kayni ma vulaŋ sle'ta suwa.
3Kay ŋaata hiɗi ɗigerta ma noyaŋ goyɗi,
naŋ ma gaɓam kulo kelaŋu,
naŋ ma ɗom hay tablena vi dikaŋu.
4Nala naŋ ma fi slugota hiɗi varta ŋaata,
vok ir Lawna, vok ir sumuna kaw.
5Vul tuwaŋ hay ɓam Ma-Vatɗina hiɗi dikaŋ kaf,
tun ŋalda vaŋ kay yalda vaŋɗi;
6Naŋ ma wumu hay hagata vaŋ kafe,
nala nam ma par hagata vaŋ goyo.
7Naŋ ma ɗuw tuwaŋ ki naŋ yali naɗi,
may laŋ nar kuɗ Ma-Vatɗina,
calaŋ goyo kay joota.
8Kay kayni mi va ma vul yerta-goyta mi tuwaŋu,
kay kayni ma sleɗaŋ zokaŋu kaw.
9Slaŋ yam Ma-Vatɗin kulo'o hiɗi farayna vaŋ kaf,
hiɗi vun-jaf ma jewna vi sle ma naŋ fumna kaf,#3:9 Ɗuw hay Mal 3:10; Luk 14:13.
10Ki kayn nala feera vaŋ ma hob hiɗi slena,
doway-firina vaŋu ma hob hiɗi vin ma jibetna.
11Goora vanu,
naŋ ma ɗuw gatta vi Ma-Vatɗin birek-cekɗi,
naŋ ma li nari kay watta valamɗi kaw;
12Kay Ma-Vatɗina wat sa ma nam minimna,
ki bumna wat goor ma dikam kalamna nala kaw.
13Sle'ta ka kay sa ma fi yaldawa,
sle'ta ka kay sa ma ka hiɗi wida-yalla kaw.
14Kay sle ma san fum kuɗ kayni suw doorota,
faytana ma san fum kuɗ kayni suw ora;
15nam ŋaa'a ŋolo suw kermena,
nam tek ŋolo suw sle ma gusta valam ŋolla.
16Hay ɓalam ta jufta irita ta mus ta-tata ka'a,
hay ɓalam ta gulda farayna hiɗi gajijita ka'a kaw.
17Hagata valamu ti hagata ta ŋaata,
hagata ta gurayta valamu kaf mar sle'ta.
18Na'a mi guna vi irita kay nisi sa va'a,
nisi sa fa'awa haysi sleɗiya.
19Ma-Vatɗina kot nagat kayni hiɗi yalda,
nam tun sem dukalawn gaa kayni hiɗi yamda-wida.
20Vun-zul ma wiŋŋa mali goy kayni kuɗ yal ma ŋolla valamu,
ɗugulla toɗ maɗayn gaa kayni kuɗ yalla valamu.
21Goora vanu,
hatta kayni hina' tuɗ goy gine hiɗi naŋɗi,
ŋomaŋ yalla hiɗi varta:
22Nam ma vul irita mi ciwta vaŋu,
nam ma muɗ mi ganta ta kelaŋu.
23Nala naŋ ma poy goy butiya hay hagata vaŋu,
seŋ ma tupa tam vaɗi.
24La naŋ burawa gaa'a,
tuwaŋ li narɗi,
hay li ma naŋ burawa gaa'a,
naŋ ma kal sen hiɗi sle'ta.
25Tuwaŋ ma li nar kay va ma co kaŋ tukusinaɗi,
tuwaŋ ma li nar kay mot ma sum sa joona ma motaŋŋaɗi;
26kay Ma-Vatɗina ma lin mi sa ma ŋomda vaŋu,
nam ma ŋomaŋ seŋu kay dugumna marige kaf.
27Naŋ ma tel kay li ŋaata tam sa ma nagay ka'naɗi,
hay li ma gaŋeraŋa vaŋ ka'a kay lum ŋaata.
28La va ma naŋ vul mi sugoloŋŋa ka'a,
naŋ ma dum ala tuɗaŋu hotaŋiya,
nan ma vulaŋga grawta naŋ ma dum naɗi.
29Hay li ma sugoloŋŋa ka musi galaŋ ŋal kiliŋ damna,
naŋ ma var va ma joo kalamɗi.
30La san bay laŋ va ma joo'o,
naŋ ma ci way hiɗi nam goy waa ɗarɗi.
31Naŋ ma tun varta vaŋ kay sa ma waskaynɗi,
naŋ ma sli hagata valam tara kep noŋɗi'
32Kay Ma-Vatɗina ka gaw hiɗi sum sa joona,
may namu mi bana sum sa ɗigera.
33Be'da vi Ma-Vatɗina ka vo hay ziyna vi sum sa joona,
may nam gi bol kay ziyna vi sum sa ɗigera;
34Nam cen kuɗ sum sa burahta,
may nam li slugot mi sum sa hot yisi gaana;
35Sum sa yalla ma yaw gajijit voco'o,
may sa ɦay-ɦayna ir ɓurawta visi ti zulota.
BIBALDA TA PELDETTA © L'Alliance Biblique du Cameroun, 2001