LAW MA NIR-NIRAMNA 2
2
1Goora vanu, la naŋ vi yoboyna vanu,
la naŋ ŋom gatta vanu kaw,
2la naŋ jak humaŋ tam yalda,
la naŋ hot varta vaŋ gaa'a kuɗ wida-yalla,
3Awa, la naŋ yi yalda,
la naŋ siwel hiɗi delaŋ kulo'o tam yamda-wida,
4La naŋ gara' ki gurjut nala,
la naŋ sla' se' ki farayn nala,
5Hay na'ta naŋ ma hum caw narta vi Ma-Vatɗina,
naŋ ma fi wida vi Lawna may.
6Kay Ma-Vatɗina vul yalda,
wida hiɗi yamda-wida kalay goy hay vunam pa;
7Nam ŋom su'da kulo'o kay sum sa ɗigera,
nam ŋom kuroŋŋa kay nisi sa tuɗ hay ɗigerta.
8Nam ŋom nisi sa poy hay ɗigerta,
nam ŋom hagata vi sum sa gasina.
9Nala naŋ ma hum caw ɗigerta,
kitata ta hay liya'ta,
gasita hiɗi hagata ta nar san tam ŋaata kafe.
10Kay yalda ma may goy hay dikaŋ pa,
wida ma sleɗaŋ dikaŋu;
11Varta-yalla ma mus jiger ŋomaŋu,
wida-yalla ma ŋomaŋu.
12Kay butaŋ goyo kay hagat vi joota,
goy hay ɓam sa ma ɓak ɓakŋa ma joona,
13Kay butaŋ goyo hay ɓam sum sa noy hagata vi ɗigerta goyo,
nisi sa poy hay hagata vi jufunda.
14Sa diksi li firiya kay li joota,
sa diksi firiya hay joota.
15Sa tuɗ kuɗ hagata ta cali goyta,
sa sli hagata ta gunita;
16Kay butaŋ goyo hay ɓam cata ta pulta,
cata ta pulta ta di yoboy ma lumaɗna,
17ta noy bana'na ma hay wayata va'na goyo,
ta ya' jok bonota vi Lawna goyo;
18Kay ziyna va'a iram muɗi kir mitta,
hagata va'a tuɗaŋ hay liyna vi sa mitina.
19Sum sa tuɗ gara'na mara ma hotay kep kaw mayɗi,
nisi as fi hagata vi irita noŋɗi kaw.
20Naŋ ma poy hay hagata vi sum sa ŋaana,
naŋ ma ŋom hagata vi sum sa ɗigera.
21Kay sum sa ɗigera ma li ziy hay nagata,
sum sa bay-sulukŋa ma lak ziy haya;
22May sum sa joona ma vatis goy hay nagata,
sum sa bay-ɗigera ma patis goyo hiɗi so'olsi pa.
BIBALDA TA PELDETTA © L'Alliance Biblique du Cameroun, 2001