Proverbios 15
15
1Llampu simiqa piñakuytam tanichin,
nanay simim ichaqa aswan mismirichin.
2Yachayniyuq runapa siminmantaqa
yachaymi lloqsimun,
mana yachayniyuqpa siminmantañataqmi
mana allin rimaykunalla lloqsimun.
3Tayta Diospa ñawinqa
tukuy hinastinpim kachkan,
allin runatapas mana allin runatapas qawaspan.
4Llampu simiqa kawsay qokuq sacha hinam,
mana allin rimaymi ichaqa sonqota llakichin.
5Mana yachayniyuq warmaqa
taytanpa corregisqantam wischupakun,
chaskikuq warmam ichaqa
yachayniyuq kayninta qawachikun.
6Allin ruwaq runapa wasinpiqa
imapas achkanpim tarikun,
mana allin runamanmi ichaqa
ganakusqanpas sasachakuyllata apamun.
7Allin yachayniyuq runakunapa siminqa
yachaytam tarpun,
mana yachayniyuq runakunam ichaqa
mana chaynataqa ruwankuchu.
8Tayta Diosqa millakunmi
mana allin runakunapa ofrendantaqa,
allin ruwaq runakunapa mañakuynintam ichaqa
kusikuywan chaskiykun.
9Tayta Diosqa millakunmi
mana allin runapa ñannintaqa
allin kawsakuq runatam ichaqa kuyan.
10Allin ñanta saqeruq runataqa
allinniqtam corregina,
corregisqa kayta mana munaq runaqa
wañunqapunim.
11Wañuywan wañusqakunapa kasqanpas
Tayta Diospa qayllanpim kachkan,
aswanraqmi runakunapa imaynam kawsasqanqa
paypa rikusqallan kachkan.
12Mana kasukuq runaqa
qaqchaykuqnintapas cheqninmi,
yachayniyuq runakunawanpas manam hukllawakunchu.
13Kusisqa sonqoqa
runapa uyantam kuyapata ruwan,
onqosqa sonqom ichaqa
runata llakichin.
14Allin tanteakuq runaqa
yachaytam maskan,
mana yuyayniyuq runam ichaqa
mana allin rimasqanta mikunqa.
15Llakisqa sonqoyuq runapaqqa
sapa punchawmi sasachakuylla,
kusisqa sonqoyuq runapaqmi ichaqa
sapa punchaw kusikuylla.
16Wakchalla kaspapas Diosta kasukuymi aswan allinqa,
apu kachkaspa sasachakuypi kawsanamantaqa.
17Cheqnikuywan poqosqa torota mikunamantaqa,
kuyakuywan yuyuta mikukuymi aswan allinqa.
18Chaylla piñakuruq runaqa piñanakuyllatam hatarichin,
llampu sonqo runam ichaqa tanichin.
19Qella runapa ñanninqa
kichkakunapa huntasqan ñan hinam,
allin kawsakuq runapa ñanninmi ichaqa
hatun ñan hinaraq.
20Yachayniyuq warmaqa
taytantam kusichin,
mana yachayniyuq warmam ichaqa
mamanmantapas penqakun.
21Mana yachayniyuq runaqa
pantasqanwanmi kusikun;
yachayniyuq runam ichaqa
pantaruspanpas allin ñanman kutirikun.
22Imataña ruway munasqapas
mana tapurikuspa ruwasqaqa
manam allinqa lloqsinchu;
tapukacharikuspa ruwasqam ichaqa
ima tanteasqanchikpas allin lloqsinqa.
23Runaqa tupaqninpi contestasqanwanmi kusikun,
¡mayna allinraqmi tiempollanpi rimayqa!
24Kawsay ñanqa wichaymanmi rin,
yachayniyuq runatam wañuymanta libran.
25Hatun tukuq runapa wasintaqa
Tayta Diosmi tuñichin,
viudapa herenciantam ichaqa takyachin.
26Tayta Diosqa millakunmi
mana allin runakunapa tanteasqantaqa,
sumaq rimaykunawanmi ichaqa kusikun.
27Apuyayllata maskaq runaqa
wasintam tuñichin,
sayniyachikuyta cheqniqmi ichaqa kawsakunqa.
28Allin ruwaq runaqa
manaraq rimachkaspam allinta tanteakun,
mana allin runam ichaqa
siminpa atipasqanta mana allinllata kacharin.
29Mana allin runamantaqa
Tayta Diosqa karupim kachkan,
allin ruwaq runapa mañakuynintam ichaqa uyarin.
30Allin ñawiwan qawariyqa
sonqotam kusichin,
allin willakuyqa
musoq kallpatam qokun.
31Allin kawsananpaq rimapayasqata chaskikuq runaqa
yachayniyuqkunawanmi kawsanqa.
32Corregisqa kayta mana munaq runaqa
kikillanmi penqayman churakun;
corregisqa kayta chaskikuqmi ichaqa
yachayta tarin.
33Tayta Diosta kasukuyqa
yachayta haypaymi,
hatunchasqa kayqa
uchuychakuywanmi qallarin.
Currently Selected:
Proverbios 15: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012