Proverbios 14
14
1Yachayniyuq warmiqa
wasintam takyachin,
mana yachayniyuq warmim ichaqa
makinkunawan tuñichin.
2Allin kawsakuq runaqa
Tayta Diostam kasukun,
mana allinta kawsaq runam ichaqa
Diostapas qepanchan.
3Mana yachayniyuq runapa siminmantaqa
hatun tukuymi lloqsimun,
yachayniyuq runatam ichaqa
simin waqaychan.
4Torokuna mana kaptinqa
taqepas mana imayuqmi kachkan,
torokunapa kallpanwanmi ichaqa
cosechapas achkallaña qespin.
5Allin testigoqa
cheqap kaqllatam willakun,
mana allin testigom ichaqa
llullallata willakun.
6Hatun tukuq runaqa
yachayta maskaspapas manam tarinchu,
yuyaymanayniyuq runapaqmi ichaqa
yachay tariypas mana sasachu.
7Mana yachayniyuq runamanta sapaqchakuy,
paypa siminmantaqa
manam ima yachachikuytapas tariwaqchu.
8Yachayniyuq runataqa
yachaymi imaynam kawsananta yachachin,
mana tanteoyuq runatam ichaqa
mana yachayniyuq kaynin pantachin.
9Mana yachayniyuq runakunaqa
huchanmantapas asikunmi,
allin runakunam ichaqa
Diospa kuyakuyninta tarinku.
10Sonqoqa yachakunmi
imakunam llakichisqantaqa,
paypa kusikuyninwanqa
manam kusikunmanchu sapaq runaqa.
11Mana allin runakunapa wasinqa
tuñichisqam kanqa,
allin ruwaq runakunapa wasinmi ichaqa llanllarinqa.
12 #
Pr 16.25. Runamanqa ima ñanpas allinpaqmi rikchakapun,
tukupayninmi ichaqa wañuyman apakun.
13Asikuypa chawpinpipas
sonqoqa nanakunmi,
kusikuyqa waqakuypim tukun.
14Mana allin runaqa
mana allin ruwasqanwanmi kusikun,
allin ruwaq runam ichaqa
allin ruwayninwan kusikun.
15Mana yuyayniyuq runaqa
imataña nisqankutapas chayllam creerun,
yachayniyuq runam ichaqa
allinta tanteakuykuspan imatapas ruwan.
16Yachayniyuq runaqa
manchakuspam mana allinmanta ayqekun,
mana yachayniyuq runam ichaqa
hatun tukuspa kikillanpi hapipakun.
17Chaylla piñakuruq runaqa
mana allinkunallatam ruwan,
allin tanteakuq runam ichaqa
hawkalla kakun.
18Mana yachayniyuq runakunapa pagonqa
mana yachayniyuq kaymi,
yachayniyuq runakunam ichaqa
yachaywan coronasqa kanqaku.
19Mana allin runakunaqa
allin runakunapa ñawpaqninpim kumuykunqaku,
mana allin runakunaqa
allin ruwaq runakunapa punkunpim qonqoranqaku.
20Wakchataqa amistadninkunapas cheqninkum,
aputam ichaqa achkallaña kuyanku.
21Runamasinta mana llakipayaq runaqa huchallikunmi,
wakchakunata llakipayaqmi ichaqa
ancha kusisqa kanqa.
22Mana allin ruwayta maskaqkunaqa
hatun pantaypim tarikuchkanku;
allin ruwayta maskaqkunam ichaqa
Diospa kuyakuyninta chaskinqaku.
23Imapipas llamkakuq runaqa
allin kaqkunatam tarin,
rimaylla-rimaqmi ichaqa wakchayanqa.
24Yachayniyuq runapa coronanqa yachayninmi,
mana tanteoyuq runapañataqmi
mana yachayniyuq kaynin.
25Cheqap rimaq testigoqa runamasintam libran,
llulla testigom ichaqa llullallata riman.
26Tayta Diosta manchakuqqa
hatun waqaychakuytam tarin,
churinkunapas chaypim hapipakunku.
27Tayta Diosta manchakuyqa
kawsakuypa qallariyninmi,
wañuymantam runata lluptichin.
28Reypa hatunchakuyninqa kachkan
achka runapi munaychakuyninpim,
ichaqa mayna penqakuypaqmi
mana pipas kamachinanpaq kaptinqa.
29Mana chaylla piñakuruq runaqa
ancha yachayniyuqmi,
chaylla piñakuruq runam ichaqa
pasaypaq mana yachayniyuq kasqanta qawachikun.
30Llampu sonqoqa cuerpotam kawsachin,
envidiakuymi ichaqa
tullupi onqoy hina.
31Wakchata ñakarichiq runaqa
unanchaqninpa contranpim hatarichkan,
wakchata llakipayaq runam ichaqa
unanchaqninta hatunchan.
32Mana allin runataqa
mana allin ruwayninkunallam tuñichin,
allin ruwaq runam ichaqa
wañunankama Diosman hapipakun.
33Yachayniyuq runapa sonqonpiqa
yachaymi tarikun,
mana tanteoyuq runam ichaqa
yachaytapas mana reqsinchu.
34Allin kaqkunata ruwayqa
nacionkunatam hatunchan,
hucham ichaqa llaqtakunata penqayman churan.
35Yachayniyuq runaqa
reypa kuyakuynintam tarin,
penqayman churaqninmi ichaqa
piñakuyninta tarinqa.
Currently Selected:
Proverbios 14: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012