Proverbios 11
11
1Tayta Diosqa millakunmi suwakuq balanzataqa,
cabal pesaqtam ichaqa allinpaq qawan.
2Hatun tukuq runaqa penqaypim kanqa,
uchuychakuq runam ichaqa yachayniyuq kanqa.
3Allin kawsakuq runataqa
allin kawsakuyninmi kawsachin;
iskay uya runatam ichaqa
iskay uya kaynin chinkachin.
4Juicio punchawpiqa qori-qollqepas
manam imapaqpas valenqachu;
allin kawsakuymi ichaqa
runata wañuymanta libranqa.
5Allin kawsakuyqa
mana huchayuqpa ñannintam allichan;
mana allin runam ichaqa
mana allin ruwayninkunawan wichinqa.
6Allin kawsakuq runataqa
allin kawsakuyninmi libran,
huchasapa runatam ichaqa
kikinpa huchallan chaqnarun.
7Mana allin runa wañuruptinqa,
tukuy ima suyasqanwan imam munasqanpas
paywan kuskam puchukarunqa.
8Allin kawsakuq runataqa
sasachakuymantapas Diosmi libraykun,
hinaspam mana allin runataña
chay sasachakuyman churaykun.
9Iskay uya runaqa
rimayninwanmi runamasinta tuñichin,
allin kawsakuq runatam ichaqa
yachaynin libraykun.
10Allin ruwaq runakuna apuyaptinqa
llaqtam kusikun,
mana allin runakuna wañuruptinñataqmi
kusikuymanta pawaykachanku.
11Allin ruwaq runakunapa bendecisqanwanmi
llaqta hatunchasqa,
mana allin runakunapa rimayninmi ichaqa
llaqtata tuñichin.
12Mana yachayniyuq runaqa
runamasinmantam mana allinta riman,
yachayniyuq runam ichaqa upallakun.
13Cuento qepi runaqa
pakasqa kaqkunatam willakachakun,
confianza runam ichaqa
imam willasqaykitapas pakaykun.
14Mana allin kamachikuqkunawanqa
nacionpas tuñirunmi;
achka consejaqkuna kaptinmi ichaqa takyanqa.
15Mana reqsisqata garantizaq runaqa
llakipim tarikunqa,
mana garantizay munaqmi ichaqa
hawka kawsakunqa.
16Kuyapayakuq warmiqa respetasqam kanqa;
imapiñapas llamkakuq runaqa apuyanqam.
17Llakipayakuq runaqa
kikintapas allintam ruwakun,
mana llakipayakuq runam ichaqa
kikillan mana allinta ruwakun.
18Mana allin runapa pagonqa
mana allin kaqkunallam;
allinta kawsakuqmi ichaqa
allin pagota chaskikunqa.
19Allin kawsakuyqa kawsaymanmi apakun,
mana allin kawsaymi ichaqa wañuyman apakun.
20Tayta Diosqa millakunmi
huchallapi yuyaymanaqtaqa,
mana huchallikuspa kawsakuqwanmi ichaqa kusikun.
21Mana allin runaqa castigasqapunim kanqa,
allin kawsakuqmi ichaqa librasqa kanqa.
22Kuchipa chuñunpi qorimanta anillo hinam
mana yachayniyuq kuyayllapaq warmiqa.
23Allin ruwaq runakunaqa
allin kaqkunallatam munanku,
mana allin runakunapa munayninmi ichaqa
piñakuyta hatarichin.
24Imallantapas qokuykuq runaqa
qosqanmantapas mastaraqmi chaskikun,
maqlla runam ichaqa wakchayayman chayanqa.
25Kuyakuywan qokuykuq runaqa
tukuy imayuqmi kanqa,
runamasinman mikuykachiq runaqa
saksachisqam kanqa.
26Trigon kachkaptin mana rantikuy munaq runataqa
llaqtamasinkunam ñakanqa,
kusikuywan rantikuqtam ichaqa bendecinqa.
27Allin kaqkunata maskaq runaqa yanapakuytam tarinqa,
mana allinta maskaq runatam ichaqa mana allin hayparunqa.
28Kapuqninkunapi hapipakuq runaqa
chakisqa rapi hinam wichirunqa,
allin kawsakuq runam ichaqa
musoq rapi hinaraq ikllirinqa.
29Wasinta sasachakuyman apaq runaqa
tukuy ima hatallisqantam wischurunqa,
pisi yuyayniyuq runaqa
yachayniyuq runapa criadonmi kanqa.
30Allin kawsakuypa rurunqa kawsaymi,
alma ganaqmi ichaqa allin yachayniyuq.
31 # 1 Pe 4.18. Allin kawsakuq runa pagonta
kay pachallapiraq chaskiptinqa,
aswanraqmi mana allin runawan huchasapapas
pagonkutaqa chaskinqaku.
Currently Selected:
Proverbios 11: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012