Proverbios 10
10
Rey Salomonpa yachachikuyninmanta
(10.1-22.16)
1Kaykunam Salomonpa rimarisqan yachachikuykuna:
Yachayniyuq warmaqa taytantam kusichin,
mana yachayniyuqñataqmi mamanta llakichin.
2Yanqapaqmi mana allinta ruwaspa apuyayqa,
allin ruwaymi ichaqa wañuymanta librakun.
3Tayta Diosqa allin ruwaq runataqa
manam yarqaypi kanantaqa saqenqachu,
mana allin ruwaq runatam ichaqa
yarqaymanta ñakarichinqa.
4Qella kayqa wakchayaytam apamun,
llamkakuq runam ichaqa apuyanqa.
5Cosecha tiempopi huñukuq runaqa yachayniyuqmi,
cosecha tiempopi puñukuq runam ichaqa hatun penqay.
6Allin ruwaq runaqa bendecisqam kanqa,
millay runam ichaqa runamasin wañuchiyllata munan.
7Allin ruwaq runaqa yuyarispa bendecisqam kanqa,
mana allin runañataqmi chaylla qonqarachikunqa.
8Yachayniyuq runaqa kamachikuytam kasukun,
kutipakuq runañataqmi mana allinpi tukunqa.
9Allin ruwaq runaqa hawkam kawsakun,
mana allin ruwaq runam ichaqa mana allinpi tukunqa.
10Runamasin qemchiq runaqa sasachakuytam apamun,
mana yachaywan rimaqñataqmi mana allinpi tukunqa.
11Allin runapa rimayninqa kawsachikuq yaku hinam,
mana allin runapa siminñataqmi
wañuchinakuyllata riman.
12 #
Stg 5.20; 1 Pe 4.8. Cheqninakuyqa piñanakuyllatam qosnirichin,
kuyakuymi ichaqa maynaña huchatapas pampaykun.
13Yachayniyuqpa siminpiqa yachaymi tarikun,
azoteñataqmi mana yachayniyuq runapa wasanpaq.
14Yachayniyuqkunaqa yachaytam taqekunku,
mana yachayniyuqkunapa siminñataqmi
sasachakuyta apamun.
15Apukunapa nanachikuqninqa apu kayninmi
wakchakunapa wichichiqninñataqmi wakcha kaynin.
16Allin ruwaq runapa pagonqa kawsaymi,
millay runapa pagonñataqmi hucha.
17Yachachikuyta kasukuqqa
kawsaymanmi richkan,
yachachikuyta wischupakuqñataqmi
chinkayman richkan.
18Llulla runaqa cheqnikuynintapas pakanmi,
mana yachayniyuq runaqa cuento qepim.
19Rimaysapa runaqa pantanpunim,
siminta wichqakuy yachaqmi ichaqa yachayniyuq.
20Allin ruwaq runapa rimayninqa akllasqa qollqe hinam,
mana allin runapa sonqonmi ichaqa mana imapaq valeq.
21Allin runapa siminqa achkaqtam yachachin,
mana yachayniyuqñataqmi
mana yachayniyuq kayninpi wañun.
22Diospa bendicionninqa apuyachikuqmi,
Diospa bendicionninqa manam llakikuytaqa apamunchu.
23Mana yachayniyuq runaqa
mana allin ruwayninpim kusikun,
yachayniyuq runañataqmi yachaywan kusikun.
24Mana allin runataqa
imapas manchakusqan kaqraqmi pasarun,
allin ruwaq runapaqmi ichaqa
imam munasqanpas cumplikun.
25Mana allin runaqa sinchi wayra hina chinkaruqllam,
allin runam ichaqa wiña-wiñaypaq takyan.
26Kamachiqninpaqpas qella runaqa
kirupaq vinagre hinam,
ñawi waqachiq qosni hinam.
27Tayta Diosta kasukuq runaqa
unay punchawkunam kawsakunqa,
mana allin runapa kawsayninmi ichaqa
menosyachisqa kanqa.
28Allin ruwaq runakunapa suyayninqa kusikuymi,
mana allin runapa suyayninmi ichaqa chinkarunqa.
29Tayta Diosqa allin ruwaqkunatam waqaychan,
mana allin ruwaq runakunatam ichaqa tuñichin.
30Allin ruwaq runaqa
manam haykapipas kuyurinqachu,
mana allin runam ichaqa
kay pachapipas mana takyanqachu.
31Allin runapa siminmantaqa
yachaymi lloqsimun,
mana allinllata rimaqtam ichaqa
qalluntapas kuchurunqaku.
32Allin ruwaq runaqa
sumaq kaqkunallatam riman,
mana allin runam ichaqa
mana allinllata riman.
Currently Selected:
Proverbios 10: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012