Josué 10
10
Amorreokunata vencesqankumanta
1Jerusalén llaqtapa reynin Adonisedecmi uyarirurqa Israelpa mirayninkuna Jericó llaqtata chaynataq reynintapas ruwasqanta hina Hai llaqtatapas chaynataq reynintapas ruwarusqanta. Yacharurqataqmi Gabaón llaqtayuqkunapas Israelpa mirayninkunawan hawkalla kanankupaq contratota ruwaruspa kuskaña yachasqankutapas. 2Gabaón llaqtaqa Hai llaqtamantapas aswan hatunmi karqa, runankunapas allinnin qari-qarikunam karqaku. Chayraykum rey Adonisedecpas chaynataq runankunapas llumpay mancharisqallaña karqaku. 3Chaynapim Jerusalenpa reynin Adonisedecqa, Hebrón llaqtapa reynin Hohamman, Jarmut llaqtapa reynin Pireamman, Laquis llaqtapa reynin Jafiaman hinaspa Eglón llaqtapa reynin Debirman kaynata nichimurqa:
4Hamuychik hinaspa yanapawaychik Gabaón llaqtapa contranpi peleananchikpaq. Paykunam Josueywan chaynataq Israelpa mirayninkunawan hawkalla kanankupaq contratota ruwarunku, nispanku.
5Chaymi amorreokunapa pichqa reyninkuna huñunakuruspanku Gabaón llaqtata atacanankupaq muyuriqninpi churakururqaku. Paykunaqa karqaku Jerusalenpa, Hebronpa, Jarmutpa, Laquispa chaynataq Eglonpa reyninkunam.
6Gabaonpi yachaqkunañataqmi, Gilgalpi kachkaptin Josueyman kaynata willachimurqaku:
Ama saqeruwaykuchu, chaylla hamuspa kay serviqnikikunata yanapaykuwayku hinaspa salvaykuwayku. Orqo lawkunapi yachaq amorreokunapa llapa reyninkunam atacawanankupaq huñunakurunku, nispanku.
7Chaymi Josueyqa, llapallan allinnin qari-qari soldadonkunawan Gilgal lawmanta lloqsirqaku. 8Hinaptinmi Josueyta Tayta Dios nirqa:
Ama manchakuychu, paykunataqa ñoqam makikiman churasaq. Manam mayqanninpas qanwan peleaytaqa atinqakuchu, nispa.
9Chaymi Josueyqa Gilgal lawmanta tukuy tuta rispan amorreokunata qonqayllamanta atacarurqa. 10Tayta Diosmi Israelpa mirayninkunapa ñawpaqninpi amorreokunata musparachirqa. Chaymi Israelpa mirayninkunaqa Gabaón llaqtapa hichpanpi anchallataña wañurachirqaku. Bet-horonman riq ñanninta qatispankuñataqmi Azeca llaqtakama chaynataq Maceda llaqtakama wañuparachirqaku. 11Israelpa mirayninkunamanta amorreokuna Bet-horonpa uraynin waqtata ayqechkaptinkum Tayta Diosñataq cielomanta runtu parata hatun rumikunata hina chayachimurqa Azeca llaqtakama. Chay runtu parawan wañuchisqakunam aswan achka karqaku Israelpa mirayninkunapa espadanwan wañuqkunamantaqa. 12Amorreokunata Israelpa mirayninkunaman Tayta Diospa qosqan punchawmi, Israelpa mirayninkunapa qayllanpi Tayta Diosta qayakuspan Josué nirqa:
Inti, Gabaón llaqtapa altonpi sayay,
killa, Ajalón qechwapa altonpi sayay, nispa.
13 # 2 S 1.18. Hinaptinmi intipas killapas sayarurqa
llapa enemigonkuta Israelpa mirayninkuna vengakunankukama.
Chaykunaqa Jaserpa libronpi qellqasqam kachkan.
Intim chawpi punchawpi sayaruspan huk punchawpuni mana seqaykurqachu. 14Manam chayna punchawqa karqachu ñawpaqtapas nitaq qepatapas. Chay punchawllapim Tayta Dios kasurqa runapa chayna mañakusqanta. Chaynatam Tayta Dios ruwarqa Israelpa mirayninkupa favorninpi peleaspan.
15Josueymi lliw runankunawan Gilgal lawpi campamentonkuman kutikurqaku. 16Pichqan reykunañataqmi lluptikuspanku Maceda law machaypi pakakururqaku. 17Josueymanmi willaykurqaku chay pichqan reykuna Maceda law machaypi pakakusqankuta. 18Chaymi Josué kaynata kamachirqa:
Hatun rumikunata tanqaspa machaypa punkuta taparamuychik hinaspa machay cuidaqkunata churamuychik. 19Qamkunaqa ama samaykuspa utqayman enemigoykichikta qatiychik, ama llaqtankuman kutinankuta saqeychikchu. Paykunataqa Tayta Diosmi makikichikman churaykun, nispa.
20Josueymi Israelpa mirayninkunawan llapa amorreokunata wañuparachirqaku, puchuqkunallañam murallasqa llaqtakunaman ayqerurqaku. 21Israelpa mirayninkunañataqmi Josueypa kasqan Maceda lawpi campamentoman hawkalla kutimurqaku. Chaymantapunim Israelpa mirayninkunapa contranpiqa manaña pipas rimarqakuñachu.
22Chaymantam Josué kamachirqa:
Machaypa punkunta kichamuspa chay pichqa reykunata hurqomuychik, nispa.
23Chaynata ruwaspankum machaymanta hurqomurqaku: Jerusalenpa, Hebronpa, Jarmutpa, Laquispa chaynataq Eglonpa reyninkunata. 24Chay reykunata Josueypa qayllanman pusaramuptinkum, Israelpa mirayninkunata qayaykuspan soldadokunapa kamachiqninkunata nirqa:
Asuykamuspaykichik kay reykunata matankapi saruychik, nispa.
Hinaptinmi asuykuspanku chay reykunata matankapi sarurqaku. 25Josueyñataqmi nirqa:
Ama manchakuychikchu nitaq hukmanyaychikchu. Kallpanchakuspa qarinchakuychik. Kaynatam Tayta Dios ruwanqa contraykichikpi peleaq llapallan enemigoykichikta, nispa.
26Chaynata niruspanmi chay reykunata Josué wañurachirqa, hinaspam tardeykuqkama pichqa sachakunapi warkurachirqa. 27Inti seqaykuytañam Josué kamachirqa warkusqankumanta hurqospanku pakakusqanku machayman wischumunankupaq. Chaynata ruwaspankum hatun rumikunawan machaypa punkunta wichqarurqaku. Chaynam kachkan kunankamapas.
Wakin llaqtakunata vencesqankumanta
28Josueyqa Maceda llaqtamanpas hina chay punchawllapim yaykuruspan lliw runankunata wañuparachirqa. Reynintapas Jericó llaqtapa reyninta hinam ruwarurqa.
29Chaymantam Josueyqa Israelpa mirayninkunawan Libna llaqtaman rispanku atacarurqaku. 30Chay llaqtatapas reynintintam Israelpa mirayninkunaman Tayta Dios qoykurqa. Chaymi espadawan lliwta wañurachirqaku. Reynintapas Jericó llaqtapa reyninta hinam ruwarurqaku.
31Josueymi llapa tropankunawan Libna llaqtamanta Laquis llaqtaman rispan, chay llaqtapa hichpanpi campamentonta sayachirqa, hinaspam atacarurqa. 32Laquis llaqtatapas Tayta Diosmi paykunaman qoykurqa. Chaymi paqarinnintin punchaw lliwta wañurachirqaku, Libna llaqtapa runankunata hina. 33Gezer llaqtapa reynin Horammi Laquis llaqtata yanapananpaq rirqa. Aswanqa Josueymi paytawan tropankunata, mana chullallapas puchunankama lliwta wañurachirqa.
34Laquismantam Josueyqa llapa tropankunawan Eglón llaqtaman rispa, chay llaqtapa muyuriqninpi churakuruspa atacarurqaku. 35Hina chay punchawllapim llapallan chaypi yachaqkunata espadawan wañurachirqaku, Laquis llaqtapa runankunata hina.
36Eglonmantam Josueyqa tropankunawan rispanku Hebrón llaqtata atacarurqaku. 37Yaykuruspankum Hebrón llaqtapa runankunata reynintawan kuskata lliwta espadawan wañurachispanku llaqtatapas pasaypaqta purmarachirqaku, Eglón llaqtata ruwasqankuta hina. 38Chaymantam Josueyqa llapa tropankunawan kutimuspanku Debir llaqtata atacarurqaku. 39Yaykuruspankum Debir llaqtapa runankunata reynintawan kuskata lliwta espadawan wañurachirqaku, imaynam Hebronpa, Libnapa, Debirpa runankunata chaynataq reyninkunatapas wañuchisqanta hina.
40Josueymi puchukarachirqa orqokuna lawpi, Neguev lawkunapi, qechwa lawkunapi chaynataq waqtakunapi llaqtakunatapas. Runankutapas reyninkutapas mana puchuykuspam lliwta wañuchirqa. Chaynataqa ruwarqa Israelpa yupaychasqan Tayta Diospa kamachisqanman hinam. 41Chaynatam Josueyqa enemigonkunata chinkarachirqa Cades-barnea lawmanta qallaykuspa Gaza lawkama chaynataq Gosén lawmanta Gabaón llaqtakama. 42Josueymi chay llaqtakunata patanmanta qallaykuspa lliwta chinkarachirqa. Chaynataqa ruwarqa Israelpa yupaychasqa Tayta Dios yanapasqanraykum. 43Chaymantam Josueyqa llapallan tropankunawan Gilgal lawpi campamentoman kutirqa.
Currently Selected:
Josué 10: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
