Josué 11
11
Rey Jabinta vencesqankumanta
1Hazor llaqtapa reynin Jabinmi chaykunamanta uyariruspan willakuqkunata kacharqa, Madón llaqtapa reynin Jobabman, Simrón llaqtapa chaynataq Acsaf llaqtapa reyninkunaman, 2norte law orqokunapi kaq reykunaman, Cineret qochapa sur lawnin Arabá qechwapi kaqkunaman, intipa seqaykunan Dor llaqta lawpa waqtankunapi, orqonkunapi kaq reykunaman, 3hinaspa intipa qespimunan hinaspa seqaykunan lawpi kaq cananeokunamanpas. Paykunam karqaku amorreokuna, heteokuna, ferezeokuna, orqokunapi kaq jebuseokuna chaynataq Hermón orqopa waqtan Mizpa lawpi kaq heveokuna. 4Chay reykunam llapa tropankunawan lloqsirqaku. Paykunaqa lamar qochapa patanpi aqo hinañam karqaku. Guerrapaq caballonkupas, carretankupas mana yupay atinam karqa. 5Chay reykunam Israelpa mirayninkunawan peleanankupaq Merom qochapa hichpanpi huñunakuruspanku chaypi campamentonkuta sayachirqaku.
6Ichaqa Josueytam Tayta Dios nirqa:
Ama paykunataqa manchakuychu, paqarinmi kay horata llapallankuta wañusqata Israelpa mirayninkunaman qoykusaq. Qamñataqmi caballonkunapa atakankunata kuchuspa carretankunatapas kañanki, nispa.
7Chaymi Josueyqa llapa tropankunawan paykunapa contranpi rispanku Merom qochapa hichpanpi qonqayllamanta atacarurqaku. 8Tayta Diosmi Israelpa mirayninkunaman qoykurqa, chaymi Sidón sutiyuq hatun llaqtakama, Misrefot-maim lawkama chaynataq intipa qespimunan lawpi Mizpa qechwakama wañuchistin qatirqaku. Lliwtam wañurachirqaku manam chullapas puchurqachu. 9Josueymi Tayta Diospa nisqanta hina ruwaspan enemigonkunapa caballonkupa atakanta kuchuspan carretankunatapas kañaykurqa.
10Chaymanta kutispanmi Josueyqa, Hazor llaqtaman yaykuruspan reynintapas espadawan wañurachirqa. Hazorqa karqa wakin llaqtakunapa kamachiqninmi. 11Hazorpi yachaqkunatam espadawan wañurachirqaku. Pasaypaqta purmarachispankum kañaykurqaku. 12Josueyqa wakin llaqtakunatapas purmarachispanmi reyninkunatapas espadawan wañurachirqa, Tayta Diospa serviqnin Moisespa kamachisqanman hina. 13Chaywanpas moqokunapi kaq llaqtakunataqa manam kañarqakuchu, aswanqa Hazor llaqtallatam. 14Chay llaqtakunapa runankunatam mana chullatapas puchuykuspa espadawan lliwta wañurachispanku tukuy imankutawan llapa animalninkuta apakurqaku.
Moisespa kamachisqanta Josué ruwasqanmanta
15Tayta Diospa kamachisqanta hinam Moisespas Josueyman kamachirqa. Josueyñataqmi mana imatapas qonqaykuspa ruwayman churarqa, imaynam Moisesman Tayta Diospa kamachisqanman hina. 16Josueymi chay allpata, orqokunata, llapallan Neguev lawta, Gosén law allpakunata, pampakunata, Jordán mayupa qechwankunata, Israelpa orqonkunata hinaspa qechwankunatapas hapikuykurqa. 17Seir lawman riq Halac orqomanta Hermón orqopa uraynin Líbano law pampapi Baal-gad llaqtakamam Josué venceruspan reyninkunatapas wañurachirqa. 18Josueyqa unay watakunam chay reykunawan guerrapi karqa. 19Manam karqachu Israelpa mirayninkunawan hawkalla kanankupaq contrato ruwaq llaqtaqa, aswanqa Gabaón llaqtapi yachaq Hev castakunallam. Llapallan chay llaqtakunatam guerrapi peleaspa vencerurqaku. 20#Dt 7.16.Kikin Tayta Diosmi chay runakunapa sonqonta rumiyarachirqa Israelpa mirayninkunapa contranpi hatarinankupaq, chaynapi Israelpa mirayninkuna puchukachinankupaq, imaynam Moisesman Tayta Diospa kamachisqanman hina.
21Hina chay tiempopim Josueyqa rispan Hebrón law orqokunapi, Debir law orqokunapi, Anab law orqokunapi, Judá law orqokunapi, Israel law orqokunapi yachaq anaceokunata puchukarachimurqa, llaqtankutapas pasaypaqtam purmarachirqa. 22Israelpa mirayninkunapa yachanan allpapiqa manam Anac castakunamantaqa chullapas puchurqachu; aswanqa Gaza llaqtapi, Gat llaqtapi chaynataq Asdod llaqtapi kaqkunallañam puchururqaku.
23Josueymi llapallan allpata hapikuykurqa, Moisesman Tayta Diospa nisqanman hina. Chay allpatam Israelpa mirayninkunaman herencianku kananpaq sapa aylluman tupaqninta qorqa. Chaymantapunim chay allpapiqa manaña guerra karqachu.
Currently Selected:
Josué 11: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
