Isaías 45
45
Rey Cirota Tayta Dios kamachisqanmanta
1Tayta Diosmi Cirota rey kananpaq sapaqcharqa, nacionkunapi munaychakuspa reykunata tuñichinanpaqmi makinmanta pusamurqa. Tayta Diosmi llaqtakunapa punkunkunata Ciropa ñawpaqninpi kichanqa, manaña pipas wichqayta atinankama. Paytam Tayta Dios kaynata nin:
2Ñoqam ñawpaqnikita risaq,
alto orqokunatam pampayachisaq,
broncemanta punkukunatam ñutupasaq,
fierromanta cerrojokunatam kuchusaq.
3Pakasqa qori-qollqekunatam qosqayki,
Israelpa Tayta Diosnin kasqayta yachanaykipaq;
pakaspa waqaychasqa kaqkunatam qosqayki,
sutikimanta qayaqniki kasqayta yachanaykipaq.
4Akllakusqay serviqniy Jacobraykum,
Israel llaqtayraykum,
sutikimanta qayayki.
Mana reqsiwachkaptikipas ancha reqsisqa sutitam churayki.
5Ñoqam Tayta Diosqa kani,
ñoqamanta sapaq Diosqa manam kanchu.
Mana reqsiwachkaptikipas ñoqam kallpanchasqayki.
6Chaynapi llapallanku kay allpa pachapi
ñoqalla Dios kasqayta yachanankupaq,
manam hukqa kanchu,
ñoqallam Tayta Diosqa kani.
7Achkiytapas tutayaytapas ñoqallam paqarichini,
hawkayaytapas sasachakuytapas ñoqallam rikurichini,
ñoqa Tayta Diosmi tukuy chaykunata ruwani.
Tayta Diospa munaychakuyninmanta
8Tayta Diosyá allin ruwayta hanaq pachamanta chayachimuchun,
allin ruwaytayá sullata hinaraq hanaq pachamanta uraykachimuchun,
puyukunamantayá parata hina chayachimuchun,
allin ruwayá kay pachapi kachun,
Tayta Diosyá salvacionta chayachimuchun.
9 #
Ro 9.20. Huk allpa mankaqa,
manam ruwaqninta kutipanmanchu.
Mituqa manam manka ruwaqta ninmanchu:
“¿Imatataq ñoqata ruwawachkanki?” nispaqa.
Allpa mankaqa manam ruwaqninta ninmanchu:
“Qamqa manam llamkayta yachankichu”, nispaqa.
10¡Ay! Imaynaraq kanqa taytanta qaqchaspan
“imapaqtaq churyawarqanki”, niq runaqa
¡Ay! Imaynaraq kanqa imapaqtaq wachawarqanki, nispa
mamanta kamiq runaqa.
11Israelta unanchaq Chuya Tayta Diosmi kaynata nin:
Hamuq punchawkunamanta tapuykuwaychik,
churiykunamanta cuentata mañaykuwaychik,
imaynam ruwasqaymanta cuentata mañaykuwaychik.
12Kay pachatapas runankunatapas ñoqam unancharqani,
atiyniywanmi hanaq pachatapas mastarirqani,
chaskakunapas rikurinankupaqmi kamachirqani.
13Rey Cirotam allinta ruwananpaq hatarichini,
ñanninkunatam ñoqa allichapusaq;
Jerusalén llaqtaytam musoqmanta hatarichinqa,
presochasqa runaykunatam kacharinqa,
mana imallapaqmi chaykunata ruwanqa.
Ñoqa Tukuy Atiyniyuq Tayta Diosmi chaynata nini.
14Tayta Diosmi kaynata nin:
Egipto allpapi qespiq kawsaykunapas,
Etiopía nacionpa kapuqninkunapas,
Sabá llaqtayuq hatunkaray runakunapas,
qampañam kanqaku.
Qepaykitam cadenasqa rinqaku,
ñawpaqnikipim qonqorakuspanku mañakusunki:
“Cheqaptapunipas Diosmi qanwan kachkan,
paymanta sapaq Diosqa manam kanchu”, nispanku.
15Cheqaptapunipas qamqa mana rikuna Diosmi kanki,
qamqa Israel llaqtapa salvaqnin Diosmi kanki.
16Idolokuna ruwaqkunaqa
llapallankum hatun penqaypi tarikunqaku,
uchuychaspa penqayman churasqam kanqaku.
17Tayta Diosmi ichaqa Israel llaqtanta wiñaypaq salvanqa,
manañam penqaypaqñachu kankichik,
nitaqmi pipas usuchisunkichikñachu.
18Hanaq pacha unanchaqmi,
kay pachata ruwaspa takyachiqmi,
runakunata chaypi yachananpaq unanchaq Tayta Diosmi kaynata nin:
Ñoqallam Diosqa kani, manam hukqa kanchu, nispa.
19Ñoqaqa manam pakasqallapichu rimarqani,
nitaqmi kay pachapa tutayay sitionkunapichu rimarqani;
Israelpa mirayninkunataqa manam nirqanichu:
“Yanqapaqñam maskawankichik”, nispaqa.
Ñoqa Tayta Diosqa cheqap kaqtam rimani,
ñoqaqa allin kawsakuyllamantam willakuni.
Tayta Dioslla cheqap kasqanmanta
20Nacionkunamanta lluptiqkuna huñunakuspa asuykamuwaychik.
Kullumanta idolokunata llaqllaruspa apaykachaqkunaqa
mana serniyuq runakunam,
mana salvay atiq idolokunata mañakuqkunaqa
mana yuyayniyuq runakunam.
21Rimariychik hinaspa pruebakunata apamuychik,
kikikichikpura tapunakuychik:
¿Pitaq ñawpaqmantaraq kaykunamanta rimarqa?
¿Manachum ñoqa Tayta Dios chaykunataqa willakurqani?
Ñoqamanta sapaq Diosqa manam kanchu,
ñoqa hina allin ruwaqqa manam kanchu,
ñoqamanta hukqa manam pipas salvanchu.
22Tukuy hinastinpi yachaqkuna ñoqaman hamuwaychik,
ñoqam lliw runakuna salvaq Diosqa kani,
manam sapaq Diosqa kanchu.
23 #
Ro 14.11; Flp 2.10-11. Kikiyraykum juraspay cheqap kaqta rimarqani,
cumplikunanpaq kaqtam rimarqani:
“Ñawpaqniypim llapallan runakuna qonqorakunqaku,
sutiypim paykunaqa juranqaku”.
24Ñoqamantam ninqaku:
“Cheqaptapunipas Tayta Diosllapim tarikun
munaychakuypas kallpanchakuypas”, nispanku.
Llapallan cheqniqniy runakunam ñoqaman hamunqaku,
hinaspam penqaypi tarikunqaku.
25Israelpa mirayninkunaqa
ñoqaraykum mana huchayuqpaqña chaskisqa kanqaku,
ñoqa Tayta Diosraykum alabakunqaku.
Currently Selected:
Isaías 45: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012