Ezequiel 47
47
Templomanta lloqsiq yakumanta
1 #
Zac 14.8; Jn 7.38; Ap 22.1. Chay pusawaqniy runam templopa punkunman kutirachiwarqa. Hinaptinmi rikurqani templopa punkunpa uku pampanmanta yaku lloqsispan templopa punkun lawman otaq intipa qespimunan lawman kallpaqta. Chay yakum templopa alleq lawninta uraykuspan altarpa sur lawninman risqa. 2Chaymantam norte lawman qawaq punkunta lloqsichiwarqa, hinaspam hawa lawninta intipa qespimunan lawpi punkukama muyuchimuwarqa. Chaypim rikurqani punkupa sur lawninmanta yaku lloqsimuchkaqta. 3Chay runam huk cordelta aptarikuspan intipa qespimunan lawman lloqsirqa, chaymi pichqa pachak metrota tupuruspan chay yakuta chimpachiwaptin chaki senqaykama hayparqa. 4Pichqa pachak metrotawan tupuruspanmi kaqllamanta chimpachiwarqa, hinaptinmi yakuqa moqoykamaña hayparqa. Pichqa pachak metrotawan tupuruspan chimpachiwaptinmi chay yakuqa weqawniykamaña hayparqa. 5Pichqa pachak metrotawan tupuruptinmi chay mayuqa mana chimpay atinayña rikurirurqa; hatun mayuman tikrakurusqanraykum nadeaspa pasanallaña karqa. 6Chaymi niwarqa:
Runapa churin ¿allintachu kayta rikurqanki? nispa.
Chaymantam mayu patantakama kutichimuwarqa. 7Kutimuchkaspaymi mayupa kaylaw-waklaw chimpanpi achkallaña sachakunata rikurqani. 8Hinaptinmi niwarqa:
Kay mayuqa richkan intipa qespimunan lawmanmi, hinaspam Jordán mayupa kallpanan wayqoman uraykuchkan, chaymantam Puchqo lamar qochaman yaykunqa. Chayman chayaruptinmi chay qochapa yakunkuna miski yakumanña tikrakurunqa. 9Maymanpas kay mayupa chayasqanpiqa tukuy rikchaq animalkunawan challwakunam kawsanqa. Kay mayupa yakunkunam qatqe yakukunatapas miskiyachinqa, hinaptinmi tukuy rikchaq animalkunaña kawsanqa. 10En-gadi lawmanta En-eglaim lawkamam challwaqkunapas kanqa, chaypim mallankutapas chakichinqaku. Mediterráneo lamar qochapi hinam challwakunapas tukuy rikchaq hinaspa nana-nanaq kanqa. 11Puchqo lamar qochapa waqtan pukyukunapiwan qochakunapim ichaqa hinalla puchqo yaku kanqa, chaymanta kachita hurqonankupaq. 12Chay mayupa kaylaw-waklaw patanpiqa tukuy rikchaq fruta sachakunam wiñanqa, llaqenkunapas manam haykapipas qawinqachu, mana tukuytam rurunqapas; templomanta lloqsiq yakuwan parqosqa kasqanraykum killan-killan poqonqa. Rurunkunam mikunapaq kanqa, llaqenkunañataqmi hampipaq kanqa.
Allpankupa linderonkunamanta
13Ñoqa Tayta Diosmi kaynata nini: Israelmanta miramuq chunka iskayniyuq ayllukunapa chaskisqanku allpapa linderonkunaqa kaynam kanqa: Joseypa mirayninmanmi wakin ayllukunaman qosqaykichikmanta huk chaynatawanraq qonkichik. 14Kay nacionpi allpakunatam ñawpaq taytaykichikkunaman qonaypaq prometekurqani, chaynaqa chay sayaytakamallam partenakunkichik. Kay nacionmi tupaqnikichik allpa kanqa.
15Allpaykichikpa norte lawman linderonmi Mediterráneo lamar qochamanta qallarinqa, hinaspam Hetlón, Zedad, 16Hamat, Berota, Sibraim hinaspa Haurán llaqtawan tupanakuq Hazar-haticón lawninta pasanqa. Chay llaqtakunaqa tarikun Damasco llaqtawan Hamat llaqta tupanakuqpim. 17Chaynaqa, norte lawman linderonmi kanqa Mediterráneo lamar qochamanta qallarispa Hazar-enán lawkama. Hinaptinmi Damasco lawpi chaynataq Hamat lawpi llaqtankuna norte lawninpi tarikunqa.
18Intipa qespimunan lawpi linderonmi Haurán llaqtawan Damasco llaqta tupanakuqpi qallarinqa, hinaspam Jordán mayuntakama Puchqo lamar qochapa patanpi tarikuq Tamar llaqtakama chayanqa. Jordán mayum Galaad allpamanta Israel nacionpa allpanta rakinqa.
19Sur lawpi linderonmi qallarinqa Tamar llaqtapi, hinaspam yakupa kanan Meriba-cades lawkama chutarikuspan Egipto wayqonta Mediterráneo lamar qochaman chayanqa.
20Intipa seqaykunan lawpi linderonñataqmi Egipto nacionwan tupanakuqpi qallarispa Mediterráneo lamar qochapa patanta Hamat llaqtapa patankama chayanqa.
21Chay allpatam Israelmanta miramuq chunka iskayniyuq ayllukuna rakinakunkichik. 22Kay allpam tupasuqnikichik herencia kanqa, qonkichiktaqmi chawpikichikpi yachaq huklaw llaqtayuqkunamanpas chaynataq churinkunamanpas. Paykunataqa Israel ukupi naceqta hinam qawankichik. Kay allpata partenakuspaykichikqa paykunamanpas tupaqnintam partenkichik. 23Huklaw llaqtayuqkunaqa tupaqninku allpataqa chaskinqaku maymi yachasqanku ayllupa allpanpim. Ñoqa Tayta Diosmi chaynata nini.
Currently Selected:
Ezequiel 47: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
